Bèlgi

Kerajaan Bèlgi Koninkrijk België (Welanda) Royaume de Belgique (Prasman) Königreich Belgien (Dèt)
Ibu negeri	Bresèl
Nama pengendek	Bèlgi

Bèlgi (hurup Arab Gundul: بلݢى; Welanda: België; Dèt: Belgien; Prasman: Belgique) atawa resminya Kerajaan Bèlgi (hurup Arab Gundul: کراجأن بلݢى; Welanda: Koninkrijk België; Dèt: Königreich Belgien; Prasman: Royaume de Belgique) ada atu negara pèderal nyang ada di Èropa Kulon. Bèlgi wates-watesan ama Welanda di blèlir, Dètslan di blètan, Leksembereh di belah kidul-wètan, èn Prasman di bekidul. Bèlgi punya lèbar entu 30.689 km² (atawa sepantes ama 11.849 mil persegi). Ada sekitaran 11,6 jutaan orang nyang tinggal di Bèlgi. Ni negara – atu negara anggota pendiri Uni Èropa èn negara markasnya. Dia punya hopstad nama Bresèl.

Ada tiga daèrah di Bèlgi:

• Plandèren (hurup Arab Gundul: فلنديرن; basa Welanda: Vlanderen; basa Prasman: Anvers; basa Dèt: Flandern; basa Limbereh: Vlaondere; basa Plam Kulon: Vloandern) entu ponggahan lornya Bèlgi, percis kidulnya Welanda. Kebanyakan orang di ni wilayah ngomongnya basa Welanda.
• Waloni (hurup Arab Gundul: والونى; basa Welanda: Wallonië; basa Prasman: Wallonie; basa Dèt: Wallonie(n); basa Leksembereh: Wallounien; basa Pikad: Walonnie; basa Wal: Walon(r)eye) entu ponggahan Bèlgi bekidul, percisnya di lornya Prasman. Di mari, orang sekitar, orang Walen, pada ngomongnya basa Prasman. Ada juga' sebagèan kecit Waloni punya sampingnya Dètslan nyang orang pada ngomong basa Dèt di sonoh.
• Daèrah Hopstad Bresèl (hurup Arab Gundul: دائرة هوفستاد برسل; basa Welanda: Brussels Hoofdstedelijk Gewest; basa Prasman: Région de Bruxelles-Capitale; basa Dèt: Region Brüssel-Hauptstadt) entu wilayah sintrem nyang di tenga-tenganya ni negara, dikulilingin wilayah Plandèren di semua sisinya. Itu témpo dulunya wilayah orang ngomong Welanda. Cuman sekarang mah paling banyak basa Prasman, ama beberapa basa Welanda.

Deri semua-muanya penduduk, 60%-nya ngomong basa Welanda, 39%-nya – Prasman, èn cuman seemprit doang, kurang lebi 1%, entu orang nyang ngomong basa Dèt (dikatanya: Deutschbelgier 'orang Dèt Bèlgi'). Bakal ngopènin ni semua pada, Bèlgi ada punya sistim guwernemèn nyang ribet paké daèrah-daèrah nyang otonom bangat.