Тар’я Турунэн
Тар'я Турунэн | |
Тар’я Сойлэ Сузана Турунэн Кабулі | |
![]() | |
Дата нараджэньня | 17 жніўня 1977 (47 гадоў) |
---|---|
Месца нараджэньня | Кітэе, Фінляндыя |
Месца вучобы | |
Прафэсія | сьпявачка |
Гады дзейнасьці | 1996 — цяперашні час |
Псэўданімы | Tarja[1] |
Сябра ў | Nightwish[d], Raskasta Joulua[d] і Outlanders[d] |
Жанры | паўэр-мэтал сымфа-мэтал опэра |
Вакал | сапрана[d] |
Інструмэнты | вакал, піяніна, барабаны, флейта |
Псэўданімы | Тар’я |
Гурты | «Nightwish» «Beto Vázquez Infinity» |
Супрацоўніцтва | Schiller |
Лэйблы | Universal Music Group |
Сайт | tarjaturunen.com |
Та́р’я Со́йлэ Су́зана Ту́рунэн Кабулі (нарадзілася 17 жніўня 1977 году ў Кітэе, Фінляндыя) — сьпявачка і аўтарка песьняў, былая вакалістка фінскага сымфа-мэтал-гурту «Nightwish». Дзякуючы свайму моцнаму лірыка-драматычнаму сапрана Тар’я зьяўляецца адной з найвядомейшых сьпявачак у жанры сымфанічнага мэталу ва ўсёй Эўропе.
Біяграфія
[рэдагаваць | рэдагаваць крыніцу]Тар’я займаецца музыкай з шасьці гадоў. У васямнаццацігадовым узросьце яна пераехала ў горад Куопіё дзеля таго, каб займацца ў Акадэміі Сыбэліюса.
У складзе «Nigthwish»
[рэдагаваць | рэдагаваць крыніцу]У 1996 годзе на запрашэньне свайго аднаклясьніка Туомаса Халяпайнэна яна стала адной з удзельніц гурту «Nightwish». У гэтым жа годзе Тар'я выступіла на Саванлінскім опэрным фэсьце. Аднак сусьветную вядомасьць Тар'я атрымала менавіта пасьля другога альбому «Nightwish» пад назвай «Oceanborn», які быў выпушчаны у 1998 г.
![](http://upload.wikimedia.org/wikipedia/commons/thumb/5/50/Tarja_Turunen_2006.jpg/180px-Tarja_Turunen_2006.jpg)
Турунэн выконвала сольныя партыі ў рок-балеце 1999 году «Evankeliumi» (іншая назва «Evangelicum») з гуртом Waltari(en) ў Фінскай Нацыянальнай опэры. Яна працягнула выступы з «Nightwish» і прымала ўдзел у запісе альбомаў у 2000 і 2001 гадох, пасьля чаго паступіла ў Музычны Ўнівэрсытэт у Карлсруэ, Германія. У гэты час яна запісвала вакал для альбому «Nightwish» «Century Child» (выпушчаны ў 2002), а таксама для альбому аргентынскага гурту «Beto Vazquez Infinity».
У 2002 годзе Тар’я выступала ў Паўднёвай Амэрыцы з канцэртам «Noche Escandinava» (па-беларуску: Скандынаўская ноч). Пасьля працяглага сусьветнага турнэ «Nightwish» у падтрымку альбому «Century Child», калі гурт узяў адпачынак, Тар’я вярнулася ў Карлсруэ.
У 2003 годзе яна пабралася шлюбам з аргентынскім бізнэсоўцам Марсэла Кабулі.
Фінскі прэзыдэнт Тар'я Халанэн і ейны муж запрасілі Турунэн у прэзыдэнцкі палац у Хельсынкі ў сьнежні 2003 году на сьвяткаваньне Дню незалежнасьці Фінляндыі. Аглядальнікі фінскага тэлеканалу YLE назвалі яе самай уражвальна апранутай спадарыняй на гэтым сьвяце.
Пасьля перапынку Тар'я вярнулася ў «Nightwish» дзеля запісу новага альбому «Once» і ўдзелу ў сусьветным турнэ ў ягоную падтрымку ў 2004—2005 гадох. Увесну 2004 яна таксама ўдзельнічала ў другім турнэ з канцэртам «Noche Escandinava». На каляды 2004 году выйшаў самотнік «Мара аднаго анёла» (па-фінску: «Yhden Enkelin Unelma»), які атрымаў у Фінляндыі статус «залатога». Увесну 2005 Тар'я сьпявала ў дуэце «Leaving You for Me» зь нямецкім выканаўцам Мартынам Кезыцы. Іхні выступ быў выпушчаны таксама і на відэа.
21 кастрычніка 2005 году пасьля фінальнага канцэрту сусьветнага туру Туомас Халяпайнэн і іншыя ўдзельнікі «Nightwish» паведамілі Тар’і Турунэн адкрытым лістом[2][3], што яна больш не зьяўляецца вакалісткай гурту, абвінаваціўшы яе ў перамене прыярытэтаў і ўзрослых камэрцыйных інтарэсах. Туомас паведаміў, што ў апошнія гады Тар'я не прымала ўдзелу ў творчасьці і рэпэтыцыях гурту, ігнаравала прыхільнікаў, зрывала заплянаваныя канцэрты. Тар'я апублікавала адкрыты адказ на сваёй пэрсанальнай бачыне па-ангельску і па-фінску[4]. У сваім лісьце яна назвала тое, што адбылося, «неабгрунтавана жорсткім». У чэрвені 2006 Тар'яў муж Марсэла Кабулі апублікаваў на афіцыйнай бачыне Тар'і адказы на шматлікія пытаньні заўзятараў, што былі атрыманыя з пачатку году, наконт раздраю між Тар'яй і іншымі ўдзельнікамі гурту[5].
Сольная кар’ера
[рэдагаваць | рэдагаваць крыніцу]У сьнежні 2005 Тар’я дала некалькі калядных канцэртаў у Фінляндыі, Нямеччыне, Гішпаніі і Румыніі. У 2006 годзе яна запісала калядны альбом пад назвай «Подых зь нябёсаў» (па-фінску: «Henkäys Ikuisuudesta») і вакал для дэбютнага альбому свайго брата Тыма Турунэна, а таксама прыняла ўдзел у Саванлінскім опэрным фэсьце.
Першы сольны альбом Тар’і Турунэн, «My Winter Storm», быў выпушчаны ў лістападзе 2007 году і ў першы ж дзень атрымаў «залаты» статус у Фінляндыі, а пазьней у Вугоршчыне і Чэхіі. У Фінляндыі быў выпушчаны плятынавы альбом, у Расеі выйшаў залаты. Тар'я прыняла ўдзел у запісе складанкі «Into The Light» ад Nuclear Blast Allstars, выканаўшы разам з гітарыстам Віктарам Смольскім (гурт «Rage» і гуртом «Кипелов») песьню «In the Picture»[6].
![](http://upload.wikimedia.org/wikipedia/commons/thumb/6/65/Tarja_Turunen_at_Obras_Stadium_2008_29.jpg/200px-Tarja_Turunen_at_Obras_Stadium_2008_29.jpg)
Напрыканцы 2007 Тар’я была вылучаныя на прэміі «ECHO» як найлепшы новы выканаўца і «Emma» як найлепшая фінская выканаўца. Яна дала згоду стаць гэдляйнэрам першага дню фэсту жаночага вакалу ў мэталёвай музыцы 2008 году ў Wieze, Бэльгія.
9 траўня 2008 канцэртам на ляйпцыскім фэсьце «Wave-Gotik-Treffen» Тар’я распачала эўрапейскае турнэ ў падтрымку ўласнага альбому «My Winter Storm». У рамках турнэ 4 лістапада Тар’я наведае з выступам і Беларусь.
У ліпені 2008 цераз ейны блог былі анансаваныя дзьве новыя кампазыцыі: «The Crying Moon» для новага альбому і «Enough» ў якасьці бонус-трэку ў перавыданьні «My Winter Storm». Апошняя ўпершыню прагучала ў жніўні гэтага ж году ў ейным туры Storm in América.
10 верасьня 2008 прадстаўнікі гуказапісвальнай кампаніі Spinefarm UK абвесьцілі, што 1 сьнежня плянуецца выхад EP з новым матэрыялам[7].
Дыскаграфія
[рэдагаваць | рэдагаваць крыніцу]- 2001 - Beto Vázquez Infinity
Сольны праект «Tarja»
[рэдагаваць | рэдагаваць крыніцу]Сынглы й мініальбомы:
- 2004 - Yhden Enkelin Unelma
- 2006 - You Would Have Loved This (EP)
- 2007 - I Walk Alone (EP)
- 2008 - Die Alive (EP)
Студыйныя альбомы:
- 2006 - Henkäys ikuisuudesta
- 2007 - My Winter Storm
- 2010 - What Lies Beneath
- 2013 - Colours in the Dark
- 2015 - Ave Maria – En Plein Air
- 2016 - The Shadow Self
- 2017 - From Spirits and Ghosts (Score for a Dark Christmas)
- 2019 - In the Raw
Альбомы ўжывую:
- 2012 - Act I: Live in Rosario
- 2012 - Live in Luna Park
- 2018 - Act II
У складзе «Nightwish»
[рэдагаваць | рэдагаваць крыніцу]Студыйныя альбомы:
- 1997 - Angels Fall First
- 1998 - Oceanborn
- 2000 - Wishmaster
- 2002 - Century Child
- 2004 - Once
Альбомы ўжывую:
- 2001 - Over the Hills and Far Away
- 2005 - End of an Era
Крыніцы
[рэдагаваць | рэдагаваць крыніцу]- ^ https://tarjaturunen.com/new-release-dark-christmas/
- ^ Адкрыты ліст да Тар’і ад 22 кастрычніка 2005 году
- ^ Блог зь перакладам тэксту ліста ўдзельнікаў гурту да Тар’і Турунэн (рас.)
- ^ Ліст Тар'і да фанатаў і прэсы быў апублікаваны па адрасе [1], аднак пасьля выдалены. Копія засталася на deviantart.com і metalyou.com
- ^ Адказы на пытаньні фэнаў, захаваныя з арыгіналу 3 ліпеня 2007 году.
- ^ Nuclear Blast Records
- ^ https://web.archive.org/web/20110727081312/http://metalmarketing.org/spinefarm/index.php?showtopic=39
Вонкавыя спасылкі
[рэдагаваць | рэдагаваць крыніцу] Тар’я Турунэн — сховішча мультымэдыйных матэрыялаў