Трэці шлях (супольнасьць)

«Трэці шлях» — сеціўнае згуртаваньне беларускай моладзі лібэральнага кірунку, што імкнецца да ўсталяваньня народаўладзьдзя ў Беларусі пры дапамозе засьценнага ўплыву за мяжою.

Пры заснаваньні, 21 жніўня 2004 году, налічвала 5 чалавек, сярод якіх былі магістранты зачыненага ў Менску Эўрапейскага гуманітарнага ўнівэрсытэту, а таксама іх калегі. Акрамя зачыненьня ўнівэрсытэту, падставаю ўтварэньня паслужыла абвяшчэньне Аляксандрам Лукашэнкам супярэчнага Канстытуцыі рэфэрэндуму аб падаўжэньні сваіх прэзыдэнцкіх паўнамоцтваў. У 2006 годзе мела сваіх прадстаўнікоў у Беларусі, ЗША, Нямеччыне, Польшчы, Расеі, Украіне, Чэхіі, Швэйцарыі, Швэцыі й Эстоніі.

Мэта, задачы й погляды

Мэта — мадэрнізаваньне Беларусі дзеля яе пасьпяховасьці й канкурэнтаздольнасьці на грунце лібэральных каштоўнасьцяў.

Задачы:

1. утварэньне адзінага бачаньня будучыні Беларусі ў колах пасьпяховай беларускай моладзі, што мае скласьці эліту,
2. стварэньне грамадзянскага руху з уплывовасьцю, дастатковаю для схіленьня дзяржаўнага ладу да разьвіцьця ў бок мэрытакратыі.

Погляды:

1. Свабода асобы — права самастойна прымаць рашэньні,
2. Адказнасьць — умова свабоды асобы,
3. Прыватная ўласнасьць — аснова незалежнасьці асобы,
4. Сьвядомая грамадзкая дзейнасьць — умова дабрабыту грамадзтва,
5. Салідарнасьць — сумеснае сьцьвярджэньне й абарона супольных зацікаўленасьцяў,
6. Разнастайнасьць — умова росквіту грамадзтва,
7. Талерантнасьць — права на існаваньне разнастайных меркаваньняў, поглядаў і ладаў жыцьця,
8. Дыялёг — аснова грамадзкай згоды,
9. Сумленнасьць і адкрытасьць — прынцыпы існаваньня грамадзтва,
10. Праца — ўмова самасьцьвярджэньня асобы й дабрабыту грамадзтва.

Прынцыпы:

1. Ладжаньне дзейнасьці ад разуменьня свайго жаданьня да ўменьня яго ажыцьцявіць і скарыстаць вынік дасягненьня;
2. Цярплівасьць у імкненьні да мэты;
3. Памяркоўнасьць да іншых пры адначаснай патрабавальнасьці да сябе;
4. Першаснасьць дапамогі ў ажыцьцяўленьні мэтаў іншых людзей перад яе пошукам з іх боку;
5. Дасягненьне посьпеху праз самапазнаньне й разьвіцьцё сваіх здольнасьцяў;
6. Навучаньне з досьведу;
7. Ініцыятыўнасьць — сродак пераадоленьня неспрыяльных абставінаў;
8. Разуменьне значнасьці сваіх дзеяньняў;
9. Пэўнасьць у сабе й сваёй дзейнасьці.

Дадатковыя зьвесткі

Адметныя перавагі супольнасьці: Разьмеркаваная сеткавая структура, заснаваная на выкарыстаньні інфармацыйных тэхналёгій, стаўка на здольных маладых беларусаў, адпавядаючых якасным крытэрам, што прад’яўляюцца да прадстаўнікоў эліты.

Каштоўнасная арыентацыя ўдзельнікаў супольнасьці: Лібэральныя каштоўнасьці

Зьнешнепалітычная арыентацыя Беларусі (бачаньне): Роўнааддалены статус Беларусі, прагматычныя адносіны з Расеяй, ЭЗ і НАТА. Няўступ у НАТА, ЭЗ, неўваходжаньне ў РФ, рэфармаваньне праекту Саюзнай дзяржавы ў эканамічны замест палітыка-эканамічнага, удзел у формах рэгіянальнай каапэрацыі ў межах нацыянальных інтарэсаў, адказнасьць за ўзятыя краінай палітычныя і эканамічныя абавязальніцтвы.

Вонкавыя спасылкі

•  (рас.)Сайт
•  (рас.)Жывы часопіс
• ЛуНэт
• Мультклюб
•  (рас.)Бліжэй да сакавіка (I)
• Любоў Лунёва. Расея адмовілася выдаць стваральніка мультфільмаў пра Лукашэнку // Радыё «Свабода». 29 сакавіка 2007
• Іна Студзінская. У Вашынгтоне праходзіць беларуская выстава «Мастацтва супраць дыктатуры» // Радыё «Свабода». 16 лютага 2009