Teofilo B. Padua
Si Teofilo Buendia Padua (Desyembre 28, 1898 - ) sarong Bikolano asin sarong komandante namayo kan Camp Isarog Guerilla Unit laban sa mananakop na pwersa kan Hokbong Imperyal nin Hapon kan ini nagsakyada sa probinsya kan Camarines Sur poon kan Desyemnbre 16, 1941. An gerilyang grupo nagkuta' sa kakadlaganan kan Bukid Isarog.
Pamilya
[baguhon | baguhon an source]Si Padua aki kan mag'agom na si Severino Atole Padua asin Maria Buendia, pareho tubo sa banwaan nin Goa, Camarines Sur. Naagom niya iyo si Rosario Pardinas asin an saindang pagsasaro nagbunga nin walong aki: sinda Lorenzo, major sa Army asin man nagin dentista, Salvacion, parmasiutika, Prima, sarong doktora, Teresita, sarong nars, Jesus, sarong inhenyero marino, Maria, saro man parmasiutika, Jose, gradwadong AB, asin si Dolores, gradwado sa BSC.
Agi-agi
[baguhon | baguhon an source]Si Padua may pormal na pag'ensayo asin pag'adal bilang soldados mala ta siya kaapil duman sa inapod na Philippine Guards na may ranggong sarhento na isusubol kuta sa Europa sa pagtapsok sa Enot na Gerang Pankinaban kawasa lang dai nadagos gibo kan nagkaigwang pagkasurundo sa pag'ontok kan gera.
Enot na pagbiloga niya an grupo kan Marso 6, 1942, pighipa ninda an sarong grupo nin mga soldados na Hapon sa may Rangas River na kun saen saindang natigpo an walong Hapon asin magkapira nagkarulugadan. Poon kaini nabantog an grupo niya asin dakul na an nagbabarali mala ta an grupong gerilya man ni Faustino Flor kan Carolina, barangay sa banwaan nin Naga, harani sa pamitisan kan Bukid Isarog nagsaro na sa grupo niya. An pinagsarong pwersa inapod na Camp Isarog Guerilla Unit asin pinili si Kapitan Faustino Flor na commanding officer.
An pinagsarong pwersa iyo an naglusob sa banwaan kan Naga kan Mayo 1, 1942 kun saen 200 na soldados na Hapon natigpo, walong gerilya nagadan man asin pirang nagkarulugadan asin napabuhian kan grupo an 32 na Amerikano preso asin mga pira pang dayuhan na sentensyado na kutang gadanon. Duwang aldaw nakaptan kan gerilya an Naga asin ta kan ikatolong aldaw si nagdurulag na Hapon kaiba an pamilya ni Gobernador Mariano Villafuerte nasabat sa Vito, Siruma kan grupong gerilya ni Francisco "Turko" Boayes asin sa ralaban duman nadamay sa purutukan an pamilya Villafuerte asin ta nagkagaradan.
Pagbalik kan Hapon, nakumbinsi si Faustino Flor na magsuko. Si Teofilo Padua matagas na dai nagsuko asin saiyang pig-reorganisar an grupo asin siya na an nagin commanding officer. Sa saiyang pamamayo, dakula an perwisyo asin ratak na dinara kan grupo niya sa hokbo kan Hapon sa lawig kan gerang idto.
Pagpipilang
[baguhon | baguhon an source]Sa okasyon kan ginibong lektura-eksibit dapit sa Ikaduwang Gerang Pankinaban kan Sumaro Bikolnon, Abril 7, 2017, pinagmarhay na gawadan kan Gawad Hiyangta si Padua bilang pag'onra saiya sa makuring serbisyo niya sa banwaan bilang gerilya sa panahon na gerang idto.
Ginunuan
[baguhon | baguhon an source]- Obias, Jose Fernando. Teofilo Padua's Camp Isarog. The Paper: ABikol Newsmagazine. 20 June, 2000. ISSN 0119-8336 X.
- Baclagon, Uldavico, S. Col. The Philippine Resistance Movement Against Japan. Published under sponsorship of the Veterans Federation of the Philippines. Manila, Philippines. 1966.
