San Salvador de Priesca

San Salvador de Priesca
Patrimoniu de la Humanidá UNESCO Bien d'Interés Cultural
ilesia y monumentu
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Villaviciosa
Coordenaes	43°29′07″N 5°21′31″W
San Salvador de Priesca San Salvador de Priesca (Asturies)
Historia y usu
Apertura	sieglu X
Relixón	catolicismu
Dedicación	Xesús
Arquiteutura
Estilu	arte prerrománicu
Superficie	0,03 ha
Patrimoniu de la Humanidá
Referencia	669bis-013
Rexón	Europa y América del Norte
Inscripción	)
BIC	RI-51-0000127

La ilesia de San Salvador alcuéntrase na parroquia de Priesca, al noreste del conceyu de Villaviciosa (Asturies). Constituye unu de los exemplares de la arquiteutura prerrománica asturiana daqué serondu. Foi declarada Monumentu Nacional el 5 de febreru de 1913.

Existió una inscripción lapidaria yá desaparecía, de la que se conoz el testu («IN ERA DCCCcLA VIIIA/ SAGRADUM EST/ TEMPLUM SANCTI SALVA/ TORIS») , qu'informaba de que'l templu fuera consagráu na era DCCCCLVIIII, esto ye, nel añu 921. Ye, polo tanto, posterior al de San Salvador de Valdediós (El Conventín) col que lu xunen delles afinidaes, perteneciendo al reináu d'Ordoñu II, cuando la corte asturiana treslladara yá la so capital a la ciudá de Lleón (910).

Non tolo que podemos ver anguaño ye orixinal. En dómina ensin determinar amestóse-y una sacristía a la nave meridional y depués un pórticu cerráu que s'allargó per tol llau sur d'esta nave. Per otru llau, l'incendiu que sufrió la ilesia durante la Guerra Civil Española asina como les dos restauraciones de que foi oxetu durante el sieglu XX, aunque nun supusieren cambeos formales, sí dieron como resultáu la sustitución d'elementos primitivos por otros modernos.

Fachada sureste.

Interior.

Tien planta basilical de tres naves rectangulares con cubierta de madera, siendo la central de anchura doble que la de les laterales y de mayor altura. Les tres van remataes por capielles absidiales nel so testeru oriental, mientres que nel occidental se dispón un pórticu tripartitu nel que s'abre una portada d'arcu de mediu puntu. Tan constituides por tres tramos d'arcos de mediu puntu que descarguen sobre pegollos de seición cuadrada remataos por capiteles prismáticos. L'arcu de trunfu descarga sobre columnes de fuste circular monolíticu con interposición d'un capitel corintiu de fueyes lanceolaes y collarín sogueáu. Les naves cúbrense per aciu de teyáu a dos agües sobre armadures de madera, mientres que les capielles ciérrense con bóvedes de cañón.

Los furacos fechos na fábrica pa la illuminación interior siguen los modelos prerrománicos asturianos: cierre de dolosía nos laterales sobresalientes de la nave central y nos testeros de les tres capielles, y ventana xeminada con doble arcu de ferradura y columna formando el partelluz nel frente de la denominada «cámara secreta» sobre la capiella principal.

La decoración escultórica ye probe, sobremanera, nos capiteles de grandes fueyes de la cabecera. Les muries interiores de la capiella central decórense con arcos ciegos de mediu puntu sofitaos en columnaes entregues sobre les que se disponen capiteles corintios asemeyaos a los del arcu trunfal. Otru elementu decorativu ye'l que formen les pintures al fresco de les que tovía se conserven abondos restos nes muries y bóvedes interiores como pa facese una idea de cómo yeren orixinalmente; apaeciendo figures, escenes historiaes, representaciones d'edificios y motivos xeométricos. Los ábsides dexan ver arqueríes simulaes nes pares, grandes casetones nes bóvedes y, nel testeru, cruces, de les que cuelguen l'alfa y l'omega. Estos recursos son herederos de la tradición de la ilesia de Santullano d'Uviéu.

L'imafronte encuma agora con una espadaña de dos güeyos. La entrada al interior del templu ye un vanu d'arcu de mediu puntu, con dos impostes o moldures decoraes aselando sobre tres columnes de capiteles.

Enllaces esternos

• Wikimedia Commons acueye conteníu multimedia sobre San Salvador de Priesca.

• Datos: Q1130947
• Multimedia: Church of San Salvador, Priesca