Ross 458

Ross 458 A
Datos d'observación (Dómina J2000)
Constelación	Virgu
Ascensión reuta (α)	13h 00m 46,58s
Declinación (δ)	12° 22′ 3,6″
Mag. aparente (V)	+9,76
Carauterístiques físiques
Clasificación estelar	Nana colorada
Tipu	M2Ve
Masa solar	0,6 M☉
Radiu	(0,62 R☉)
Magnitú absoluta	+9,47
Lluminosidá	0,014 L☉
Temperatura superficial	3496 K
Metalicidá	[Fe/H] ≈ 0,2 - 0,3
Periodu de rotación	1,54 - 2,89 díes
Variabilidá	Estrella acandilante
Astrometría
Velocidá radial	-10,1 km/s
Distancia	37,3 ± 0,6 años lluz
Paralax	85,54 ± 1,53 mas
Sistema
Nᵁ de componentes	2
Acompañantes	1
Referencies
SIMBAD	enllaz
Otres designaciones
HIP 63510 / GJ 494 / LHS 2665 / BD+13 2618 / G 60-57 / Wolf 462
[editar datos en Wikidata]

Ross 458 (Gliese 494) ye un sistema estelar na constelación de Virgu de magnitú aparente +9,76. Non observable a simple vista, visualmente ta asitiáu 1,5º al norte de Vindemiatrix (ε Virginis). Alcuéntrase a 37 años lluz de distancia del Sistema Solar.

Carauterístiques del sistema

Ross 458 ye una estrella binaria que la so componente principal, Ross 458 A, ye una nana colorada de tipu espectral M2Ve. Tien una temperatura efectivo de 3496 K y una masa averada de 0,6 mases solares. Ye una estrella magnéticamente bien activa por cuenta de la so alta velocidá de rotación de 9,6 km/s, determinada per aciu l'espectrógrafu ELODIE. Ello ye que nun estudiu lleváu a cabu ente 69 nanes coloraes cercanes, ye la que rota a mayor velocidá. Consecuentemente, tien un curtiu periodu de rotación ente 1,54 y 2,89 díes. Presenta una metalicidá cimera a la solar ([Fe/H] ≈ 0,2 ó 0,3) y ye una estrella nueva, con una edá entendida ente 150 y 800 millones d'años.

El periodu orbital calculáu pa esti sistema ye de 14,5 años. Los dos componentes tán dixebraes unes 0,55 segundos d'arcu, lo qu'equival a una distancia real de siquier 6,3 UA. L'oxetu qu'acompaña a la estrella principal, denomináu Ross 458 B, tien aproximao tipu espectral M7V, lo que s'asitia na llende ente una estrella y una nana marrón. Utilizando modelos d'evolución estelar, l'oxetu hai de tener una edá inferior a 300 millones d'años pa ser una nana marrón; en casu contrariu, algamaría la secuencia principal, siendo la so masa averada de 0,09 mases solares. Dada la incertidume esistente na edá de la estrella principal, nun puede asegurase el tipu d'oxetu que ye.

Ross 458 ta catalogada como estrella acandilante y variable BY Draconis, recibiendo la denominación, tocantes a variable, de DT Virginis. Coles mesmes, ye una fonte de rayos X. La estrella conocida más cercana a esti sistema ye Gliese 505, asitiada a casi 4 años lluz de distancia.

Nana marrón acompañante

En 2010 afayóse la esistencia d'un tenue oxetu que paez tar físicamente amestáu cola binaria Ross 458 AB. Dichu oxetu, denomináu Ross 458 c, alcuéntrase visualmente a 102 segundos d'arcu de la binaria, lo qu'implica una separación de más de 1100 UA respectu al par AB. Piénsase que pue ser una nana marrón de tipu espectral T8. Tien una masa inferior a la llende de fusión del deuteriu —en redol a 8,5 vegaes la masa de Xúpiter— y un radiu un 25% más grande que'l d'esti planeta. La so temperatura averada ye de 650 ± 25 K.

Referencies

• Datos: Q951640