Petanca
| Petanca | ||
|---|---|---|
 | ||
| [editar datos en Wikidata] |
La petanca ye un deporte nel que l'oxetivu ye llanzar boles metáliques tan cerca como sía posible d'una pequeña bola de madera, llanzada enantes por un xugador, con dambos pies nel suelu y en posición estática dende una determinada zona.
El deporte na so forma actual surdió en 1907 en La Ciotat, Provenza, nel sur de Francia, anque los antiguos romanos yá xugaben una versión primitiva con boles de piedra, que foi llevada a Provenza por soldaos y marineros romanos. El so nome vien de la espresión "pè(s) tancats" ("pies xuntos") en llingua provenzal.[1] Esisten delles federaciones que regulen les competiciones oficiales d'esti deporte.
El deporte puede practicase en tou tipu de terrén, anque de normal faise en zones llanes, de normal arenoses. Les pistes son rectangulares con una llongura de 15 m y un anchu de 4 m pa competiciones nacionales ya internacionales, anque pueden tener unes dimensiones mínimes de 12 m x 3 m pa otres competiciones.
Les boles usaes nel xuegu son metáliques (nun tienen de contener plomu nin sable nel so interior) con unes estríes que dibuxen tou la so contorna. El so diámetru tien de midir ente 70,5 y 80 mm, ente que'l so pesu bazcuya ente los 650 y los 800 g. La bola pequeña o boliche ye de madera o de material sintético y tien de tener un diámetru de 30 mm.[2]
El xuegu
[editar | editar la fonte]Al empezar el xuegu llánzase la bola de madera o boliche dende una circunferencia de llanzamientu que tien d'asitiase a lo menos a 1 m de cualquier torga. Por que dichu llanzamientu sía válidu, el boliche tien de quedar a una distancia ente 6 y 10 m de la circunferencia de llanzamientu y siquier a 1 m de cualquier torga. Dempués, cada xugador llanza, por vez, tres boles na modalidá individual y en dupletas (dos equipos de dos xugadores) y dos si xugar por tripletas (dos equipos de trés xugadores). Los llanzamientos pueden ser de tres tipos: d'aproximamientu al boliche; de "tiru" (al tiru perfectu llámase-y carru secu, nel cual la bola tirada queda nel mesmu llugar que la bola a la que se llanzó), pa intentar alloñar una bola d'un xugador contrariu cutiéndola; y de "sofitu", faciendo rodar la bola p'averar más una propia al boliche o p'alloñar una contraria.
Una vegada concluyida la partida, cada bola que s'atope más cerca del boliche que les de los contrarios apunta un puntu. Gana'l xugador o l'equipu que llegue antes, xeneralmente, a trece puntos pa partíes ente xugadores individuales, dupletas o tripletas y a quince puntos nel casu de finales (anque non siempres ye asina). Anguaño, nes principales divisiones de Lliga o Campeonatos xuégase a tiempu.
Poles sos regles y dinámica la petanca ta emparentada col curling, deporte sobre xelu d'orixe escocés.
Referencies
[editar | editar la fonte]- ↑ Marcu Foyot, Alain Dupuy, Louis Dalmas, Pétanque - Technique, Tactique, Entrainement, Robert Laffont, 1984.
- ↑ Reglamentu de xuegu oficial de petanca. Federación Española de Petanca.
Ver tamién
[editar | editar la fonte]Enllaces esternos
[editar | editar la fonte]
Wikimedia Commons tien conteníu multimedia tocante a Petanca.- Federación Española de Petanca
- Federación Andaluza de Petanca
- Federación Galega de Petanca
- Web sobre la Petanca
