Montes de Toledo
Montes de Toledo | |
---|---|
cordal | |
![]() | |
Situación | |
País | ![]() |
Autonomía | ![]() |
Provincia | ![]() |
Coordenaes | 39°N 4°W / 39°N 4°O |
Datos | |
Altitú | 1603 m |
Materiales | Roca sedimentaria |
Anchor | 100,000 m. |
Llargor | 350,000 m. |
![]() |
Los Montes de Toledo son un cordal de la península ibérica, formada por delles xerres, que dixebren la cuenca del Tajo de la del Guadiana. Tienen un llargor máximu d'este a oeste d'unos 350 km y un anchor máximu d'unos 100 km nes proximidaes de Sonseca y Puertollano. L'anchor mediu son unos cincuenta quilómetros. Rematen na Xerra de Guadalupe, onde'l Picu Villuercas (provincia de Cáceres) algama un altor de 1.603 m. Constitúi la llende norte de La Mancha na comunidá de Castiella-La Mancha.
Trátase d'una estructura remocicada pola oroxenia alpina, pero a diferencia del Sistema Central, nun son bloques llevantaos y fundíos, sinón un relieve apalachense puestu al descubiertu tres de la intensa erosión qu'afeutó a la zona dempués de la oroxenia. Son, poro, crestones cuarcíticos d'un altor uniforme, al rodiu de los 1.400 metros, que nun foron afeutaos pola erosión glaciar.
Pero entá hai otru elementu paisaxísticu bultable nestos montes, y son les numberoses pedrices (tamién llamaes casqueres o canchales) que puen reparase per auquiera nes fasteres. Cola so típica forma d'abanicu, y cuasi desprovistes de vexetación son, en realidá, grandes cúmulos de cantares angulosos de cuarcita formaos en series bien frecuentes de conxelación y destemple. Estos cantares atópense sueltos, ensin matriz que los una y ensin suelu desenvueltu, polo qu'apaecen desnudos, como grandes manches blanques pente la vexetación. Sicasí, al averanos, vamos comprobar que sobre elles desenróllense comunidaes pioneres de lliquen y mofos que los chisquen d'un ensame de colores, y que, amás, alluguen plantes típiques de roquéu, como los embelicos de Venus, por casu.
De los Montes de Toledo parten ríos como'l ríu Algodor (95 km de llargor y 1250 km² de cuenca), ríu Almonte (afluentes del ríu Tajo pela esquierda) y el Ríu Amarguillo (afluente del Guadiana pela drecha). Inclui'l parax protexíu del Parque Nacional de Cabañeros. Los Montes de Toledo dan nome a una comarca de la provincia de Toledo y a otra de la provincia de Ciudá Real, que son colindantes.
Ver tamién
[editar | editar la fonte]Referencies
[editar | editar la fonte]- MUÑOZ JIMÉNEZ, Julio (1976) “Los Montes de Toledo. Estudios de Xeografía Física”. Departamentu de Xeografía de la Universidá d'Uviéu. Institutu J. S. Elcano (CSIC), Uviéu.