Farmacia

Pa la botiga a on se venden as medecinas se veiga apotica

A farmacia ye a ciencia d'a salud que s'ocupa d'o descubrimiento, producción, control, eliminación y uso seguro y efectivo de medecinas.

A farmacia (d'o griego φάρμακον /fármakon/, 'medecina, vereno, toxico') ye a ciencia y practica d'a preparación, conservación, presentación y dispensación de medecinas; tamién ye o puesto a on se preparan, dispensan y venden os productos de parafarmacia y medecinals, dito tamién mas comunment apotica. Ista definición ye a mas universal y clasica, que se solapa con o concepto de Farmacia Galenica (Galén estió un medico griego d'o sieglo II, experto en preparar medecinas).

Antis d'o sieglo XX y primerías d'o mesmo, a formulación y preparación de medecinas se feba por un solo farmaceutico u con o maestro farmaceutico. A partir d'o sieglo XX, a elaboración d'as medecinas corre a cargo d'a moderna industria farmaceutica, si bien continan estando farmaceuticos os que coordinan y investigan a formulación y preparación de medecinas en as grans empresas farmaceuticas.

Recientment se considera tamién practica d'as farmacias aconsellar a o pacient en lo que se refiere a la suya medicación y asesorar a os medicos u atros profesionals sobre as medecinas y o suyo emplego (farmacia clinica y atención farmaceutica).

Os farmaceuticos tamién colaboran en grupos d'investigación con os quimicos, bioquimicos, biologos y incheniers pa descubrir y desarrollar compuestos quimicos (y biolochicos) con valura terapeutica. Amás debiu a las nuevas regulacions internacionals en materia d'hichiene y salut publicas (OMS/ ICH), cada vegada con mas frecuencia se solicita o suyo consello en temas de salut publica.