Trollinger
| Dialäkt: Schwäbisch |
Dr Trollinger isch a rode Räbsorde, wo en Deutschland faschd ausschließlich im Woebaugebied Wirrdaberg ohbaud wird. Em Allgemoina geld der Woe onder Kenner edd als b'sonders hochwerrdich, er isch abr en wiachtigr Doel voh dr Schwäbischa Läbensard, ond wird auf Woifeschdle (wia zom Beischbiel in Schduergerd und en Bäsawirrdschafda (andserswo im Allemannischa Sprachraum sächd mr „Schdraußawirrdschafd“) virrdlidderswoes aus volle Gläser ohne Schdiel dronga, was mr em Schwäbischa als "an Virddele schlodza" bezoechna duad. Oft wird dr Trollinger mid em Lemberger vermischd. Viele Schwoba kibbad au no Sprudl nei (Schorle). Außerhalb vom Woebaugebied Wirrdaberg wird der Trollinger noch en Tirol (Vernatsch] kuldiviert, wo er voh de Rehmer schon zu denna ihrer Zeid wohl au in da Südweschddeutscha Raum herbrachd worra isch. Dr Name Trollinger loeded sich au vo Tirolinger ab.
Älles en Ällem schdohd dr Trollinger auf um dia 2.500 Hegdar Fläche en Wirrdaberg (was ohgfär em Virrdl vom g'samda Gebied entsprecha duad). Mr fänd viele Wengerde vor Ällem am Neggar ond an dr Rems. Em Nadurell voh Wirddaberg endsprechend, gedeihd dr Trollinger auf Keuber ond Muschlkalk. An Nachdoel isch, dass die Räba em Vrgleich zu andre Woensorrda leicht vrfierad. dazua kommad noh G'fähdonga durch da Echde ond da Falsche Mähltau. Wachsa duad er zemmlich schnell, drom isch au dr Erdrag reachd hoch. Des isch allerdings au dr Grond, warom der Woe eher zu de Schechdere zähld (des isch abr au technisch zom Erklära, weil mr d' Maische erhitza duad). Voh dr Qualidäd her kriegd mr selda ebbes Besseres noh wia an Kabinedd-Woe noh, normal isch QbA. Greizd hodd mr Trollinger-Räba em ledschda Jahrhonderd middam Riesling, der au in Wirrtaberg gern ohbaud wird. S Ergebnis war dr Kerner.
Dr Woi, den mr aus de Trauba kellerd, hodd em Allgemoina zwischa 12 ond 13 Prozend Alkohol, ond mr sächd, dass er fruchtich ond frisch schmegga däd (er isch also koe schwärer Woe). Dr Woe bassd guad zom Roschbroda, Maudascha ond andres Essa mit Floesch.