Regine Hengge

Dialäkt: Undermarkgreflerisch

D Regine Hengge (* 2. Novämber 1956 z Drossinga) isch e dytschi Mikrobiologi un Molekularbiologi. Si isch Brofässeri vu dr Humboldt-Universiteet z Berlin un forscht zue dr Frog wie Bakterie uf Sträss reagiere un zue dr Bildig vu Biofilm. Anne 1998 isch si mit em Gottfried Wilhelm Leibniz-Bryys vu dr Dytsche Forschigsgmainschaft (DFG) uuszaichnet wore.

Lääbe un Wiirke

D Regine Hengge het ire Biologystudium an dr Universiteet Konschtanz absolviert un isch dert in dr Arbetsgruppe vum Winfried Boos mit ere Arbet iber d Sekretion vu periplasmatische Protein bi Escherichia coli promoviert wore. Si isch derno an d Princeton University gange, wu si in dr Arbetsgruppe vum James R. Broach gschafft het. Anne 1989 isch si an d Universiteet Konschtanz retuurchuu un het dert iri aige Arbetsgruppe zur Forschig an dr bakteriälle Strässreaktione uböuef. Dr Schwärpunkt isch doderby uf dr molekulare Signaltransduktion un Genregulation in Bakterie gsii, wu Nährstoffmangel uusgsetzt sin. Im Johr 1994 isch si in Mikrobiology un Molekularbiology habilitiert wore.

Anne 1998 het si fir iri Forschig dr Gottfried Wilhelm Leibniz-Bryys vu dr Dytsche Forschigsgmainschaft (DFG) iberchuu. Im nämlige Johr isch si as Brofässeri fir Mikrobiology an di Frei Universiteet Berlin gruefe wore, isch 2013 an d Humboldt-Universiteet gwächslet un het dert dr Lehrstuel fir Mikrobiology im Inschtitut fir Biology ibernuu. Iri neiere Forschigsarbete kunzäntriere si syterhär uf bakterielli Biofilm, wu fir chronischi Infäktionschrankete zäntral wichtig sin. Do inträssiert vor allem d Funktion vum sekundäre Botestoff Cyclic-di-GMP, di kumpläx Architäktur vu Biofilm un d Hämmig vu dr Biofilmbildig dur Naturstoff.

D Regine Hengge isch Sprächeri vu dr DFG-Schwärpunktprogramm „Proteolysis in Prokaryotes“ un „Nucleotide Second Messengers in Bacteria“ un Mitglid vum Exzellänz-Cluster „BildWissenGestaltung“ vu dr Humboldt-Universiteet z Berlin. Syter 2010 macht si zäme mit em Günther Grosser s Wisseschaftskommunikationsprojäkt Science&Theatre am English Theatre Berlin.

Uuszaichnige un Mitglidschafte

Fir iri wisseschaftlig Arbet isch d Regine Hengge 1998 e baar Mol uuszaichent wore, dodrunter

• 1984–1987: Postgraduate Fellowship vum Boehringer Ingelheim Fonds
• 1993: Noowuchsforschigsbryys vu dr Dytsche Gsellschaft fir Mikrobiology un Hygiene (DGHM)
• 1995: Dozäntestipendium vum Fonds vu dr Chemische Induschtry
• 1996: Landesforschigsbryys Bade-Wirttebärg
• 1998: Gottfried Wilhelm Leibniz-Bryys Dytsche Forschigsgmainschaft (DFG)
• 2009: ERC Advanced Researcher Grant

D Regine Hengge isch Mitglid vu dr Berlin-Brandenburgische Akademy vu dr Wisseschafte, dr Dytsche Akademy vu dr Naturforscher Leopoldina, dr European Molecular Biology Organization (EMBO), dr European Academy of Microbiology (EAM) un dr American Academy of Microbiology (AAM).

Familie

D Regine Hengge isch d Dochter vum Grafiker un Fotograf Felix Hengge (1924–2013). Iri Dochter isch s Model Elisabeth Aronis.

Weblink

• Websyte vu dr Arbetsgruppe Hengge uf dr Syte vu dr Humboldt-Universiteet z Berlin
• Regine Hengge: Bakteriellen Biofilmen auf der Spur, Porträt uf biotechnologie.de vum 20. Juli 2010

Fueßnote

Dä Artikel basiert uff ere fräie Übersetzig vu dere Version vum Artikel „Regine_Hengge“ vu de dütsche Wikipedia. E Liste vu de Autore un Versione isch do z finde.