Dr Oberchiifer bi de Wirbeldier

Dr Oberchiifer (lat. Maxilla) isch e Chnoche vom Gsichtsschädel, wo us eme Chnochebäärli bestoht. Er bildet dr Bode vo dr Augehöhli (Orbita), dr Bode und d Siitewand vo dr Nasehöhli (Cavum nasi) und e Deil vom Guume^[1] und eso s Dach vo dr Muulhöhli (Cavum oris proprium). Im Oberchiifer isch au d Chiiferhöhli (Sinus maxillaris).

Flechene

Am Oberchiiferkörper löön sich vier Flechene lo underscheide: D Gsichtsflechi (Facies anterior) befindet sich vorne am Oberchiiferkörper. D Underschlööfeflechi (Facies inftratemporalis) schliesst noch hinde an d Gsichtsflechi aa und wird vo dr Underjochbeileiste gege d Gesichtsflechi drennt. D Augehöhleflechi (Facies orbitalis) bildet dr grössti Deil vom Augehöhlibode. D Naseflechi (Facies nasalis) bildet die siitligi Wand vo de Nasehöhlene.

Fortsetz und Öffnige

Dr Stirnfortsatz (Processus frontalis) isch d Verbindig zwüschen em Nasebei, em Dränebei und Stirnbei. Dr Jochfortsatz (Processus zygomaticus) het e dreieggigi Form und befindet sich under dr Augehöhliflechi. Dr Alveolarfortsatz (Processus alveolaris) dräit d Zehn und isch entsprächend bogeförmig. Dr Guumefortsatz (Processus palatinus) isch e woogrächti Blatte und befindet sich zwüsche dr Naseflechi und em Alveolarfortsatz.

Bi Dier het dr Oberchiiferkörper e mehr oder weniger usprägti Chnocheleiste, d Crista facialis. Si isch bi Ross bsunders markant und mä cha se dur d Huut gspüüre. D Crista facialis isch dr oberi Rand wo dr Musculus masseter aasetzt.

Dur en Oberchiifer zieht dr Nervus infraorbitalis (en Ast vom Nervus maxillaris vom Nervus trigeminus) und innerviert dä Chnoche zsämme mit alle Oberchiiferzehn. Er chunnt am Foramen infraorbitale underhalb vo dr Augehöhli us em Oberchiifer an d Oberflächi. Drüber si no meh Est vom Nervus maxillaris Deil vo dr Innervation vom Guume.

Bluetversorgig

D Bluetversorgig erfolgt dur d Arteria maxillaris.

Dr Guumechnoche

Dr Guumechnoche (Palatum osseum) bestoht us em Alveolarfortsatz vom Oberchiifer und em Guumebei. Drei Chnochenöht bilde d Begränzig vo de einzelne Deil:

Die mittleri Guumenoht (Sutura palatina mediana) goot vom Schniidzahnloch bis zum hindere Nasedorn. Die queri Guumenoht (Sutura palatina transversa) chrüzt die mittleri Guumenoht hinde zwüschen em erste und zweite Stockzahn. D Zwüschechiifernoht (Sutura incisiva) verbindet s Zwüschechiiferbei (Os incisivum) mit em Oberchiiferbei. D Löcher im Guumechnoche si für d Närve und d Bluetgfäss, wo d Guumeschliimhuut versorge.

Fuessnoote

↑ S Wort Guume isch im Dialäkt nit glöifig und isch us em Hoochdütsche übernoo. Lueg Schwizerischs Idiotikon, Band 2, Spalte 306 (Memento vom 6. April 2013 im Internet Archive)

Dä Artikel basiert uff ere fräie Übersetzig vu dere Version vum Artikel „Oberkiefer“ vu de dütsche Wikipedia. E Liste vu de Autore un Versione isch do z finde.

[1] S Wort Guume isch im Dialäkt nit glöifig und isch us em Hoochdütsche übernoo. Lueg Schwizerischs Idiotikon, Band 2, Spalte 306 (Memento vom 6. April 2013 im Internet Archive)

[1]