Konkordia GmbH

D Konkordia GmbH isch e Druckerei un e Verlag z Bihl gsii. D Konkordia isch anne 1881 grindet wore un het aafangs vor allem Schuelbiecher druckt. Im Lauf vu dr struturälle un tächnische Umbrich in dr Druckbranche het mer syt dr 1990er Johr au modärni digitali Medie as nei Gschäftsfäld ufböue. 2008 isch d Konkordia Dail vu dr Düsseldorfer Vereinigte Verlagsanstalten GmbH (VVA) wore. Wäg dr Insolwänz vu dr VVA 2010 isch d Konkordia z Bihl im Juni 2010 zuegmacht wore. Di friejer Mediesparte git s hite no as Softwaredienschtlaischter.

Gschicht

Am 6. Merz 1881 het dr Hauptlehrer Gottfried Dühmig zäme mit andere Lehrer d Konkordia AG für Druck und Verlag grindet. Die hän si wäg dr wirtschaftlige Not vu dr Lehrer un ire Familie zum Pestalozi-Verain zämegschlosse ghaa. Wel där Verain aber au kai Gäld ghaa het, het mer d Konkordia AG grindet. Näb ere Buechhandlig het mer au ne Verlag un e Druckerei grindet zum Härstelle un Verchaufe vu vu Schuelbiecher un anderi Schrybware, wel s dodmol fascht kai Unternäme gee het, wu Schuelbiecher gmacht hän.

Aafangs het mer d Gschäft us eme Hinterzimmer vun ere Buechhandlig ääne an dr Bahnlinie gfiert, s Startkapital sin 28.350 Rychsmark gsii. S isch aber schnäll wirtschaftli ufezues gange, scho 1883 het mer e Grundstuck in dr weschtlige Yysebahnstroß gchauft, wu d Firma ne aige Bedribsgebei mit Setzerei, Druckerei, Buechbinderei, Verwaltig un ere Buechhandlig het böue loo.

Wel di wirtschaftlig Entwicklig guet gsii isch, het mer an däm Standort in dr Johr druf verschideni Neiböu zuesätzli hintedraa chenne böue. Vor em Erschte Wältchrieg het d Firma 46 Mitarbaiter*ne ghaa. Anne 1929 het s e großi Brunscht gee, s Bedribsgebei isch derno wider nei ufböue un greßer gmacht wore. 1933 het d Firma 80 Mitarbaiter*ne ghaa. Mit dr verlegerische Bschränklige in dr Nazi-Zyt isch dr Umsatz zruckggange. Noch em Zweete Wältchrieg isch d Firma unter franzesischi Verwaltig gstellt gsii.

Anne 1956 isch di erscht Schuelbuechraie noch em Chrieg uusechuu. Im nämlige Johr het mer au ne Farbdruckabdailig yygrichtet. 1962 het mer mit dr Hermann Schroedel Verlag KG Hannover, dodmol ain vu dr greschte dytsche Schuelbuechverlag, e Gmainschaftsverlag grindet, 1964 het dr Schroedel Verlag au ne Akziepaket vu dr Konkordia gchauft

Im Johr 1974 isch d AG in e GmbH umgwandlet wore, d Konkordia Druck GmbH. In dr Johr druf het s au tächnischi Umbrich gee, dr Bleisatz isch dur dr Fotosatz abglest wore un mer het di erscht EDV-Aalag inschtalliert. 1983 het mer si wider us em Schroedel-Konzärn uuseglest un fir di drei Gschäftsfälder d Muetergsellschaft Konkordia Verwaltung GmbH un di zwoo Doochtergsellschafte Konkordia Druck GmbH un d Konkordia Verlag GmbH ufböue.

Im Rame vu dr Modärnisierig isch d Konkordia 1993 vum Druck- zum Mediunternäme wore. Mer het s Gschäftsfäld MedienService ufgmacht un näbe dr Chärnlaischtig im Printberaich e Non-Print-Beraich ufböue mit CD, Internet, Schnittstellebrogrammierig, Datebanke usw. D Drucktächnik isch uf digital umgstellt wore un mer het e Verchnipfig vu Printmedie un digitale Medie (Crossmedia) gschaffe.

Anne 1999 isch d Konkordia Verlag GmbH Dail vu dr niderländische Verlagsgruppe Wolters Kluwer wore, bi dr Konkordia het mer si uf s Chärngschäft welle kunzäntriere.

Im Johr 2000 isch d Konkordia Druck GmbH in KONKORDIA GmbH umgnännt wore, wu in zwoo Gschäftsfälder glideret woren isch, KonPrint (fir s Produziere vu Druckmedie) un KonMedia (as Mediedienschtlaischter). 2002 isch d Gschäftsfäld KonMedia as KonMedia GmbH sälbschtständig wore, wu s as Softwaredienschtlaischter hite no git (Stand 26. Jänner 2023).

Im Merz 2008 isch d Konkordia GmbH vu dr Düsseldorfer Unternäme Vereinigte Verlagsanstalten GmbH (VVA) ibernuu wore. Dodmol het d Konkordia GmbH 75 Mitarbaiter*ne ghaa. Im Augschte vum nämlige Johr isch dr Firmesitz vu dr Yysebahnstroß in s Induschtrygebiet im Bade-Badener Stadtdail Steinbach verlait wore, wu au d Franz W. Wesel Druckerei und Verlag GmbH & Co. KG gsii isch, wu au zue dr VVA-Gruppe ghert het. Zwai Johr speter isch d VVA insolwänt gsii, zum 8. Juli 2010 isch d VVA us em Handelsregischter glescht wore, d Konkordia het mer im Juni 2010 zuegmacht.

S ehmolig Druckereigebei vu dr Konkordia in dr Bihler Gartestroß vu 1971 isch zue me Meefamiliehuus umböue wore. Im Gebei in dr Yysebahnstroß isch bis 2018 no d Buechhandlig Ullmann gsii, wu derno vu Osiander ibernuu woren un in d Hauptstroß umzogen isch.

Uusglääseni Publikazione

Dr Konkordia Verlag het vor allem Schuelbiecher un Biecher zue dr Gschicht un Kultur vu dr Region uusegee. Bi dr Konkordia sin au Publikazione vum Alemannisch Inschtitut uusechuu, dodrunter d Raie „Themen der Landeskunde“.

• Probleme der Dialektgeographie. 8. Arbeitstagung alemannischer Dialektologen Triesenberg, Fürstentum Liechtenstein, 20.–22. September 1984. Hrsg. von Eugen Gabriel und Hans Stricker. Konkordia-Verlag, Bühl/Baden 1987 (Veröffentlichungen des Alemannischen Instituts 58)
• Gerhard W. Baur (Hrsg.): Alemannische Mundartliteratur seit 1945 in Baden und im Elsass. Konkordia-Verlag, Bühl/Baden 1987 (Themen der Landeskunde 2).
• Gerhard W. Baur (Hrsg.): Alemannisch-schwäbische Mundartliteratur nach 1945: Formen – Entwicklungen – Tendenzen diesseits und jenseits des Rheins. Konkordia-Verlag, Bühl/Baden 1989 (Themen der Landeskunde 3). ISBN 3-7826-0163-7
• Norbert Feinäugle, Thomas Eha (Hrsg.): Mei Sprooch - dei Red, Mundartdichtung in Baden-Württemberg. Konkordia-Verlag, Bühl/Baden 1989
• Gerhard W. Baur (Hrsg.): Mundart und Schule in Baden-Württemberg. Konkordia-Verlag, Bühl/Baden 1990 (Themen der Landeskunde 5). ISBN 3-7826-0165-3
• Hubert Klausmann, Konrad Kunze, Renate Schrambke: Kleiner Dialektatlas. Alemannisch und Schwäbisch in Baden-Württemberg Konkordia-Verlag, Bühl/Baden 1993 (Themen der Landeskunde 6).., ISBN 3-7826-0166-1 (3., durchgesehene und ergänzte Auflage, ebenda 1997).

Literatur

• Konkordia fehlt in Erhaltungssatzung. Acher und Bühler Bote, 18. Merz 2015, Nr. 64, S. 19 (Online bim Historische Verein Bühl)

Weblink

• Chronik uf dr friejere Websyte vu dr Konkordia GmbH im InternetArchive (Stand 28. Merz 2007, abgruefen am 25. Jänner 2023)