Epoche (Musik)

As Epoche bezäichnet mä in dr Muusig e Zitabschnitt, wo stilistischi Gmäinsamkäite din gherrscht häi.

In dr öiropäische Muusiggschicht gseet s öbben eso us:

• Muusig vo dr Vor- und Früegschicht
• Muusig vo dr Antike
• Muusig vom Middelalter (8. bis 15. Joorhundert)
• Rönessansmuusig (15. und 16. Joorhundert)
• Barockmuusig (öbbe 1600 bis 1750)
• Klassik (Früeklassik, Wiener Klassik) (öbbe 1730 bis 1830)
• Muusig vo dr Romantik (19. Joorhundert)
• Nöiji Muusig (20. und 21. Joorhundert)

In dr nöiste Zit däilt mä je noch dr Stilrichdig fiiner ii, z. B. d Gschicht vom Dschääs däilt mä ii in:

• Oldtime Jazz (New Orleans, Dixieland, Ragtime usw.)
• Klassische Dschääs (Swing, Mainstream Jazz)
• Modärne Dschääs (Bebop, Cool Jazz, usw.)
• Freie Dschääs

In dr Popmuusig däilt mä im Allgemäine noch Joorzäänt ii.

Musikalischi Epochebegriff si allerdings broblematisch, wil mä dr Iidruck chönnt überchoo, as sich die verschiidene Stiil immer sofort und vollständig abglööst häige. Eso git s immer wider Brobleem bi dr Abgränzig, wil s in dr Wirklichkäit immer wider gliichzitigi stilistischi Ströömige gee het, wo nume weenig gmäinsam gha häi und sich mänggisch sogar widersproche häi, fliessendi Übergäng, Stiil, wo nume in ere Regioon Bedütig gha häi usw. Es git dorum Muusigwüsseschaftler, wo z. B. dängge, ass d Wiener Klassik und d Romantik e Groossepoche mit ere innere Stiilvilfalt bilde.

Es weer dorum villicht besser, nit vo Muusigepoche, sondern vo Muusigstiil z reede.

Dä Artikel basiert uff ere fräie Übersetzig vum Artikel „Epoche_(Musik)“ vu de dütsche Wikipedia. E Liste vu de Autore un Versione isch do z finde.