Swift
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Swift is die naam van ’n satelliet vir sterrekundige waarnemings, veral van sogenaamde gammaflitse (Engels: gamma-ray bursts of GRBs). Die volle Engelse naam is die Swift Gamma-Ray Burst Mission; dit is genoem na die vinnige swaaivermoë van die satelliet se instrumente asook na die windswaels, ’n familie voëls wat in Engels swifts genoem word.[1]
Die Swift is op 20 November 2004 gelanseer. Die hoof van die sending is Neil Gehrels van Nasa se Goddard-ruimtevlugsentrum en die projek is deel van ’n samewerkingsooreenkoms tussen Goddard en ’n internasionale konsortium van die VSA, Brittanje en Italië. Die sending word bestuur vanaf die Universiteit van Pennsilvanië.
Oorsig
[wysig | wysig bron]Swift is ’n ruimtesterrewag wat verskeie soorte strale kan waarneem en vir veral die bestudering van gammaflitse gebruik word. Sy drie instrumente werk saam om gammaflitse en ander nagloede in die gammastraal-, X-straal-, ultraviolet- en optiese golflengte te bestudeer.
Een van Swift se monitors skandeer die lug voortdurend en die instrumente swaai dan in die rigting van moontlike gammaflitse. Alles wat Swift ontdek, word na die Aarde gestuur en dié data is beskikbaar aan ander sterrewagte. Tussendeur is Swift beskikbaar vir ander wetenskaplike ondersoeke; wetenskaplikes van universiteite en ander organisasies kan voorstelle vir moontlike waarnemings instuur.
Die sentrum van waar die satelliet beheer word, is by die Universiteit van Pennsilvanië geleë. Die bestuur daarvan word behartig deur die universiteit en subkontrakteurs.
Op 23 April 2009 het Swift ’n gammaflits waargeneem van ’n ster wat ontplof het toe die heelal net 630 miljoen jaar oud was. Die flits (GRB090423), wat net in die X-straal-golflengte waarneembaar was, was toe die verste kosmiese ontploffing wat nog waargeneem is – sowat 13,035 miljard ligjare ver.[2]
Die satelliet het drie instrumente aan boord:
- XRT (X-Ray Telescope)
- BAT (Burst Alert Telescope)
- UVOT (Ultraviolet/Optical Telescope)
Verwysings
[wysig | wysig bron]- ↑ J.D. Myers (26 September 2007). "Swift Guest Investigator Program Frequently Asked Questions" (in Engels). NASA/GSFC. Geargiveer vanaf die oorspronklike op 6 Maart 2013. Besoek op 2 Mei 2009.
- ↑ "NASA: New Gamma-Ray Burst Smashes Cosmic Distance Record". Geargiveer vanaf die oorspronklike op 16 Mei 2020. Besoek op 1 November 2016.
Eksterne skakels
[wysig | wysig bron]- Swift se webtuiste by NASA/GSFC
- Swift se webtuiste by die UK Swift Science Data Centre
- Swift se webtuiste by die Universiteit van Pennsilvanië
- Kaart: Gamma-ray Burst Real-time Sky Map
Wikimedia Commons het meer media in die kategorie Swift.
Hierdie artikel is vertaal uit die Engelse Wikipedia
