Maingau

Die Maingau ("landskap aan die Mainrivier") is 'n historiese landskap wat in 'n buiging van die Main se rivierloop oos van Frankfurt am Main en in die noordelike Odenwald-streek rondom die Main se takriviere Rodau, Gersprenz en Mümling, asook aan die Main se regteroewer rondom Aschaffenburg geleë is.

Die naam dateer uit die tyd van die Frankiese Ryk toe die term gau na 'n bewoonde streek met vas-omlynde grense verwys het. Die Maingau was oorspronklik in die Hertogdom Franke, later in die hertogdom Wes-Franke (ook Rynfranke genoem) geleë en word onder meer verbind met Einhard, een van die mees befaamde middeleeuse geleerdes, wat hier (in pago Moingewi) omstreeks 770 gebore is. As geografiese naam is die term steeds in gebruik.