LaPerm
| LaPerm | ||||
| ||||
| Land | VSA | |||
| Ontstaan | Mutasie | |||
| Soort lyf | Gemiddeld | |||
| Pels | Rex | |||
| Wetenskaplike naam | ||||
| Felis catus (huiskat) | ||||
| ||||
Die LaPerm is ’n katras met die krullerige pels van ’n rex-kat wat in die VSA ontstaan het.
Geskiedenis
[wysig | wysig bron]Die eerste LaPerm is in 1982 gebore[1] en was ’n spontane mutasie in ’n andersins normale werpsel. Linda en Richard Koehl, wat die ras ontwikkel het, het op ’n plaas in Oregon gewoon, waar een van die plaaskatte, ’n gestreepte korthaarkat, geboorte aan dié krulhaarkat geskenk het. Sy is Curly gedoop. Later het Curly ook ’n werpsel gehad – vyf mannetjies wat almal soos sy gelyk het. Hulle het ook op die plaas aangebly, waar nog katte met dieselfde voorkoms mettertyd gebore is. Daar was kort- en langharige katte en ’n verskeidenheid kleure, onder meer sjokoladebruin en met kleurpunte.
Met behulp van ander katliefhebbers het Linda die kat ontwikkel om ’n gevestigde kampioenskap-ras in Amerika en ander dele van die wêreld te word.
Die LaPerm het noue bande met die Indiaanse kultuur in Amerika[2] omdat die Koehls se plaas in ’n gebied is wat as ’n heilige gebied beskou word deur die Wishram-Indiane, ’n Chinook-sprekende stam. Baie Amerikaanse telers gee dus hul katte Indiaanse name en versier hul hokke in ’n Amerikaanse tema wanneer hulle hul katte skou. Linda het eers ander name oorweeg, maar toe op La Perm besluit weens die "permanente golwing" (Engels: perm) van die kat se pels. Dit is in lyn met die Chinook-tradisie om Franse leenwoorde aan te neem en die Franse onbepaalde lidwoord te gebruik om nuwe woorde te vorm.
Beskrywing
[wysig | wysig bron]Die LaPerm is geneties uniek en nie verwant aan ander rex-katrasse nie. ’n Dominante geen veroorsaak die krul in die pels. Hulle is atleties gebou, met ’n gespierde, Oosterse tipe lyf van gemiddelde grootte, en langerige bene en nek. Hulle het groot, amandelvormige oë en ’n breë neus. Soos by ander rex-katte word alle kleure en patrone aanvaar,[3] hoewel gestreepte, rooi en skilpaddop-patrone volop is vanweë hul herkoms. Veral die vroeë, oorspronklike kleure is gewild: lila, sjokoladebruin en met kleurpunte. Die pels is krullerig, maar sag en het dikwels ’n taamlik veeragtig gevoel as ’n mens daaraan raak. Die langste krulle kom aan die nek en maag en agter die ore voor. Hulle het ’n wollerige, krullerige stert.
Die LaPerm is liefdevol en sosiaal. Hulle is na bewering hipoallergenies en veroorsaak dus heelwat minder allergiese reaksies by die mens as ander katte.
Sien ook
[wysig | wysig bron]Verwysings
[wysig | wysig bron]- ↑ LaPermCats.com
- ↑ "LaPerm.co.uk". Geargiveer vanaf die oorspronklike op 11 Februarie 2012. Besoek op 21 Januarie 2012.
- ↑ "LaPerm-kleure" (PDF). Geargiveer vanaf die oorspronklike (PDF) op 3 Oktober 2011. Besoek op 21 Januarie 2012.
Bronne
[wysig | wysig bron]- Morris, Desmond. 1996. Cat World: A Feline Encyclopaedia
- Lawrence, A.D. 2000. The LaPerm Cat: The New Wave in Cats for the Millennium
- Helgren, J. Anne. 2001. Rex Cats
- Verskeie. 2007. LaPerm Cats, the Cat to Curl Up With
Eksterne skakels
[wysig | wysig bron]- Suider-Afrikaanse standaarde Geargiveer 7 Mei 2013 op Wayback Machine
- Britse LaPerm-katklub
- Amerikaanse klub
- Rex-katklub
- LaPerm-telersinligting
Wikimedia Commons het meer media in die kategorie LaPerm.
Hierdie artikel is vertaal uit die Engelse Wikipedia
