Hurtigruten
![](http://upload.wikimedia.org/wikipedia/commons/thumb/0/0d/MS_Polarlys_winter.jpg/300px-MS_Polarlys_winter.jpg)
![](http://upload.wikimedia.org/wikipedia/commons/thumb/1/1c/MS_Nordstjernen_i_Molde_havnebasseng.jpg/300px-MS_Nordstjernen_i_Molde_havnebasseng.jpg)
Hurtigruten ([hʉrtirʉtən], Nynorsk: Hurtigruta, letterlik "Die snel veerdiens") is 'n gekombineerde veer- en vragbootdiens wat in 1893 op inisiatief van die Noorse regering ingestel is om die stede en dorpe langs Wes- en Noord-Noorweë se meer as 2 700 kilometer lange kuslyn met mekaar te verbind. Dit neem die huidige plesierboote sowat ses en 'n half dae om die roete te voltooi wat vanweë sy natuurskoon naas sy oorspronklike funksie as pos- en vragdiens lankal 'n gewilde toeriste-trekpleister geword het. Die plesierboote doen in die somer ook kusgebiede soos die Trollfjord en Geirangerfjord aan, en die hoogtepunte van die reis sluit naas die fjordlandskap ook die historiese Hanse-handelspos Bergen en die Lofoten-eilande in.
19de eeuse rederye het die roete langs die ruwe en dramatiese kuslyn veral tydens die lang en donker Noorse winter as minder aantreklik beskou, en aanvanklik was net een maatskappy, Vesterålens Dampskibsselskab A/S bereid om 'n gereelde veerdiens aan te bied. Die diens was veral daarop gemik om die stadige posvervoer tussen Sentraal-Noorweë en noordelike stede soos Hammerfest deur 'n posskipdiens te vervang - die posvervoer het nou slegs sewe dae in plaas van drie weke in die somer en tot by vyf maande in die winter geneem.
Nadat Vesterålens veerdiens 'n sukses geword het, het ook verskeie ander rederye aansoek om konsessies gedoen, en die diens is uitgebrei tot die huidige roete tussen Bergen in die suidweste en Kirkenes in die uiterste noordooste van die land. 'n Vloot van elf skepe verseker dat elkeen van die 34 hawens twee keer per dag aangedoen word - een keer deur skepe op die noordwaartse roete (Nordgående) en een keer deur skepe op die suidwaartse roete (Sørgående).
In die 1980's het die rol van Hurtigruten geleidelik begin verander nadat subsidies besnoei is en rederye die klemtoon op toerisme begin lê het. Nuwe en groter luukse skepe met jacuzzi-borrelbaddens, kroeë, restourante en ander geriewe vir toeriste is in bedryf gestel. Hurtigruten fungeer egter nog steeds as 'n belangrike veer- en vragbootdiens vir Noorse klante.
Die laaste twee onafhanklike rederye, Ofotens og Vesterålens Dampskibsselskab (OVDS) en Troms Fylkes Dampskibselskap (TFDS), het op 1 Maart 2006 saamgesmelt en hul naam gewysig tot Hurtigruten Group. Sedert April 2007 staan die redery bekend as Hurtigruten ASA. Naas die tradisionele veerdiens langs die Noorse kuslyn het die nuwe redery ook veerbote en hoëspoed-veerbootdienste in ander dele van die land in bedryf gestel en bied tans ook plesiervaarte na Groenland, Suid-Amerika en Antarktika aan.