Hilversum
|
Hilversum  | |
|---|---|
| Kaart | Wapen |
.png) | |
 | |
| Vlag | |
 | |
| Land |  Nederland
|
| Administratiewe gewes | Noord-Holland |
| Koördinate | 52°14′N 5°10′E / 52.233°N 5.167°O |
| Stigting | Voor 1305 |
| Oppervlakte: | |
| - Totaal | 46.35 vk km |
| Hoogte bo seevlak | 15 m |
| Bevolking: | |
| - Totaal (1 Januarie 2019) | 90 238 |
| - Bevolkingsdigtheid | 1 947/vk km |
| Tydsone | CET (UTC+1) |
| - Somertyd | CEST (UTC+2) |
| Burgemeester (party) | Gerhard van den Top |
| Amptelike webwerf | Hilversum.nl |
Hilversum (Nederlandse uitspraak: [ˈɦɪlvərsʏm]) is 'n stedelike nedersetting in die Nederlandse provinsie Noord-Holland met 'n bevolking van sowat 90 000, geleë in die hart van die groen Gooi-streek, 'n landskap met heide, bosse, mere en kleiner nedersettings. Nogtans maak Hilversum deel uit van die Randstad, 'n samehangende beboude gebied en megalopolis waarin Nederland se vier grootste stede geleë is. Hier neem Hilversum, wat voor die bou van 'n spoorverbinding tussen Amsterdam en Amersfoort in 1874 nog 'n arm Gooidorp was, as satellietstad met statige villa's residensiële funksies vir die nabygeleë Nederlandse hoofstad waar. Bekende persoonlikhede uit die Nederlandse mediabedryf soos die televisie-vervaardiger John de Mol, bekend vir sy Big Brother-televisieformaat, het vir hulself luukse wonings in die groen omgewing laat bou. Die stadsbeeld word oorheers deur moderne 20ste en 21ste eeuse boukuns. Die leefstyl van welvarende bewoners is uitgebeeld in die Nederlandse komedie-dramareeks Gooische Vrouwen wat in 2005 deur Linda de Mol vir Tien, haar broer se televisienetwerk, vervaardig is. Die reeks is later (tot 2009) deur RTL 4 uitgesaai.
Hilversum, oorspronklik 'n rustige tuin- en wewersdorp, word in Nederland en die buiteland veral met sy mediabedryf en die Nederlandse uitsaaiwese verbind. Per ongeluk - hoofsaaklik omdat 'n geskikte bouterrein hier teen 'n betreklik lae prys gekoop kon word - het hier in 1918 met die Nederlandsche Seintoestellen Fabriek (NSF) een van die sleutelaanlegte vir die Nederlandse radiobedryf ontstaan. Hierdie fabriek sou hom nie beperk tot die vervaardiging van radiotoerusting en onderdele nie. Die eerste radioprogram is reeds op 21 Julie 1923 deur die omroeppionier Willem Vogt vanuit die fabrieksterrein uitgesaai. Toe Hanso Schotanus, 'n ingenieur wat sedert 6 November 1919 Nederland se eerste radiostasie in Den Haag bedryf het, sy uitsaailisensie in 1924 verloor het, het NSF sy radioprogramme oorgeneem en vanuit Hilversum begin uitsaai.[4]
Naas sy mediabedryf word Hilversum verbind met Willem Marinus Dudok (1884–1974), een van die bekendste argitekte van Nederlandse modernisme, wat in die vroeë 1920's internasionale bekendheid verwerf het met sy ontwerpe vir behuisingsprojekte in Hilversum. Hulle is as uitstekende voorbeelde van tuinstad-buurte beskou. Tussen 1915 en 1949 het Dudok met sy ontwerpe, wat van woonblokke tot skoolgeboue gestrek het, die stadsbeeld van Hilversum ingrypend verander. Sy bekendste projek van altesaam byna 100 geboue sou nogtans die ontwerp vir Hilversum se nuwe raadhuis wees, 'n gebou wat deur argitekte uit Nederland en die buiteland noukeurig bestudeer is.
Verwysings
[wysig | wysig bron]- ↑ Baunetz Wissen: Hilversum-Format. Besoek op 31 Augustus 2020
- ↑ Zonnestraal - Monument van Licht en Lucht, Hilversum. Besoek op 31 Augustus 2020
- ↑ Matiestemme. Riaan Cruywagen. Besoek op 31 Augustus 2020[dooie skakel]
- ↑ Trouw, 13 Februarie 2018: Hoe Hilversum per toeval uitgroeide tot mediahart van Nederland. Besoek op 31 Augustus 2020
Eksterne skakels
[wysig | wysig bron]- Geskiedenis
- Nieuws uit Hilversum: De mediastad, toen en nu Geargiveer 27 November 2020 op Wayback Machine
- Toerisme
- Argitektuur
- Arch Daily: Hilversum
- Live Hilversum: Unique Architecture - From the city hall to Zonnestraal
- Dudok Architectuur Centrum: Dudok in Hilversum
- Internetradio
