Ezemvelo KZN-Natuurlewe
Ezemvelo KZN-Natuurlewe is 'n regeringsorganisasie wat verantwoordelik is vir die bewaring van die natuur en biodiversiteit in die KwaZulu-Natal-provinsie van Suid-Afrika. Hul hoofkwartier is in Queen Elizabeth Park geleë op die noordelike hange van Pietermaritzburg, KwaZulu-Natal se provinsiale hoofstad.
In 1947 is die Natalse Parke, Wild- en Visbewaringsraad gestig deur wetgewing wat betrekking het op die natuurlewe in Natal en Zoeloeland, destyds 'n enkele provinsie van Suid-Afrika bekend as Natal. Die naam van die organisasie is later vereenvoudig tot die Natalse Parkeraad, tot in 1994.
In 1982 het dr. Mangosuthu Buthelezi die KwaZulu Buro van natuurlike hulpbronne en later die KwaZulu Departement van Natuurbewaring op die been gebring, wat bewaringsgebiede bestuur het in die voormalige KwaZulu-tuisland.
Aan die einde van apartheid het die Natalse Parkeraad en KwaZulu Departement van Natuurbewaring tot 'n enkele organisasie saamgesmelt, wat uiteindelik geheet het die KwaZulu-Natal Natuurbewaringsdiens. Later is die naam verander na Ezemvelo KZN-Natuurlewe.
Bewaring
[wysig | wysig bron]Die Natalse Parkeraad was instrumenteel om die witrenoster (Ceratotherium simum simum) van uitwissing te red. Alle witrenosters in Suid-Afrika (meer as 17 000 individue) is vandag afstammelinge van die oorblywende bevolking van Umfolozi. Tans is Ezemvelo KZN-Natuurlewe betrokke by die bewaring van 'n subspesie van die swartrenoster (Diceros bicornis minor), waarvan feitlik al die diere in Suid-Afrika ook afstammelinge van die oorblywende bevolking in Umfolozi is.
Die gebiede wat deur Ezemvelo KZN-Natuurlewe bestuur word sluit in nesplekke van die karetseeskilpad en leerskilpad, Coelacanth habitat en drie sentrums van endemisme. Twee van die gebiede wat bestuur word, is wêrelderfenisgebiede (iSimangaliso-vleilandpark en die uKhahlamba-Drakensbergpark).
Enkele parke wat deur Ezemvelo KZN bestuur word
[wysig | wysig bron]- Hluhluwe-iMfolozipark
- iSimangaliso-vleilandpark
- Ithala Wildreservaat
- Krantzkloof-natuurreservaat
- Mkhuze-wildreservaat
- uKhahlamba-Drakensbergpark, deel van die "Maloti-Drakensberg-oorgrensbewaararea"
- Oribi Gorge-natuurreservaat
- Royal Natal Nasionale Park
- Tembe Olifantpark, deel van die "Lubombo-oorgrensbewaararea"
- Umtamvuna Natuurreservaat
Die organisasie bestuur meer as 57 parke.
| Hierdie artikel is in sy geheel of gedeeltelik vanuit die Engelse Wikipedia vertaal. |
