Epigraaf (letterkunde)

Faksimilee van die oorspronklike titelblad vir William Congreve se The Way of the World wat gepubliseer is in 1700, en waarop die epigraaf uit Horatius se Satires gesien kan word.

In letterkunde is 'n epigraaf 'n frase, aanhaling of gedig wat aan die begin van 'n boek, monograaf of afdeling of hoofstuk daarvan voorkom. Die epigraaf kan dien as voorwoord tot 'n werk, of as opsomming, teenvoorbeeld of skakel in die werk na 'n wyer letterkundige kanon, met die doelwit om óf 'n vergelyking uit te lok óf 'n konvensionele konteks aan te roep.

'n Boek kan 'n algemeen geldende epigraaf hê wat deel uitmaak van die voorblad, of een voor elke hoofstuk. 'n Voorbeeld van eersgenoemde is die epigraaf "Solche Stimmen nun, haufenweise. Als hätte jemand eine Schleuse hochgezogen, hinter der die Stimmen eingesperrt waren." ("Daar is baie sulke stemme. Asof iemand 'n slot opgelig het waaragter die stemme weggesluit is") uit Karel Schoeman se Verliesfontein of Stemme 1. Die aangehaalde frase kom uit Christa Wolf se Kindheitsmuster, en berei die weg voor nie net vir dié boek nie, maar inderdaad vir Karel Schoeman se gehele Stemme-trilogie.

Sien ook

• Epigram, 'n bondige, interessante, onvergeetlike en somtyds satiriese verklaring.

Bronne

• Ahern, Rosemary, red. (2012). The Art of the Epigraph: How Great Books Begin. New York: Simon and Schuster. ISBN 9781451693270.
• Barth, John (1984). The Friday Book: Essays and Other Nonfiction. New York: Perigree Books. pp. xvii–xviii. ISBN 9780399512094.
• Stokes, Claudia (Summer 2018). "Novel Commonplaces: Quotation, Epigraphs, and Literary Authority". American Literary History. 30 (2): 201–221. doi:10.1093/alh/ajy005.

Eksterne skakels

• Epigraphic: an ever-growing, searchable collection of literary epigraphs
• Epigraph at Literary Devices