Aroab
Aroab | |
---|---|
![]() | |
Koördinate: 26°48′S 19°39′O / 26.800°S 19.650°O | |
Land | ![]() |
Streek | ǀǀKaras |
Kiesafdeling | Keetmanshoop Landelik |
Regering | |
• HUB | Elsa Laubscher |
Bevolking | |
• Totaal | ongeveer 5 000 |
Tydsone | UTC+2 (SAST) |
Aroab is 'n dorp met 'n bevolking van ongeveer 5 000 in die ǁKaras-streek in die suide van Namibië. Dit lê sowat 170 kilometer (110 myl) suidoos van Keetmanshoop aan die rand van die Kalahariwoestyn. Die gemiddelde jaarlikse reënval is sowat 150-200 mm. Aroab is die distriksentrum vir die Keetmanshoop Landelike-verkiesingsafdeling.[1]
Oorsprong
[wysig | wysig bron]In 1900 het menere Blaauw en Oppermann, vermoedelik van Duitse afkoms, Aroab en die omliggende gebied verhandel van 'n inheemse Nama-stam vir skape en gewere. 'n Rusie oor 'n gronddam het gelei tot 'n verdeling van die grond tussen die twee here - Aroab en Streitdamm, die plaas wat Aroab in die weste begrens.
Ekonomie en infrastruktuur
[wysig | wysig bron]Verreweg die meeste van die inkomste word gegenereer op plase in die omliggende gebied deur skape, bokke en beeste vir vleisproduksie te teel. Die mees algemene skaaprasse is dorper, persies, damaras, Van Rooy, karakoel en ander tot 'n mindere mate. Gewilde beesrasse vir hierdie gebied is Nguni, Bonsmara, Brahman en ander tot 'n mindere mate. Verskeie skape, beeste en bokke se stoettelers is in die gebied geregistreer.
Gedurende die maande van Mei - Augustus (winter) vind wildjag wyd plaas. Jagbare spesies is oryx (gemsbok), springbok en koedoe. Tot 'n mindere mate is trofeejag ook beskikbaar.
Aroab is slegs bereikbaar via 'n grondpad – die C16 – 170 km vanaf Keetmanshoop en 35 km van die Klein Menasse / Rietfontein-grens, die C11 182 km vanaf Karasburg en 142 km van Koës. 'n Onbemande gruislandingstrook vir ligte vliegtuie is noordwes van die dorp.
Aroab het verbasend baie skole vir so 'n klein plekkie. Daar is die staats- primêre skole (graad 1-7), 'n Rooms-Katolieke skool, 'n staats- senior sekondêre skool (graad 8-12) en 'n privaatskool. Daar is ook 'n Rooms-Katolieke kliniek wat basiese mediese dienste bied, 'n poskantoor, polisiekantoor, dorpsraad, 'n biblioteek en verskeie kerke (onder meer Nederduits Gereformeerd en Rooms-Katoliek). Ander besighede sluit in 'n boerekoöperatief, algemene handelaar, windpompherstelwerk en ingenieursdienste, 'n klein abattoir en slaghuis.
Hoewel erg gekniehalter deur 'n hoë werkloosheidsyfer, is Aroab goed ontwikkel in vergelyking met ander nedersettings in Namibië se suide. Die dorp is ten volle geëlektrifiseer, het geen plakkershutte nie, en al 500 huishoudings is verbind met die water- en rioolstelsel. Die dorp bedryf 'n openbare swembad.
Politiek
[wysig | wysig bron]Aroab word beheer deur 'n dorpsraad wat tans vyf setels het.[2] In 2010 se plaaslikeowerheidsverkiesing het die Demokratiese Turnhalle Alliansie (DTA) die meeste stemme gekry, naamlik 260. SWAPO het in die 2de plek geëindig met 211 stemme, gevolg deur die Rally for Democracy and Progress (RDP, 112 stemme) en die Kongres van Demokrate (CoD, 40 stemme).[3] Die plaaslikeowerheidsverkiesing van 2015 is naelskraap gewen deur SWAPO, wat twee setels gewen het (267 stemme). Die DTA het tweede geëindig met twee setels (216 stemme), en die res van die setels het na die RDP gegaan met 86 stemme.[4]
Willem Appollus, oorspronklik vanaf Aroab, verteenwoordig Keetmanshoop Landelike in die Plaaslike Raad van die Karas-streek en die Nasionale Raad van Namibië van 2004-2010. Hy het ook in die Aroab Plaaslike Owerheid van 1998-2004 gedien.[5]
Verwysings
[wysig | wysig bron]- ↑ Namibiese wet
- ↑ Informanté 2015[dooie skakel]
- ↑ Local Authority results Geargiveer 17 Julie 2011 op Wayback Machine Electoral Commission of Namibia
- ↑ Local elections results. Electoral Commission of Namibia (28 November 2015).
- ↑ Willem Appollus Geargiveer 11 Junie 2011 op Wayback Machine Namibian Institute for Democracy