Albert Coates
Albert Coates | |
|---|---|
_circa_1920_on_a_boat.jpg) | |
| Agtergrondinligting | |
| Geboortenaam | Albert Henry Coates |
| Gebore | 23 April 1882 Sint Petersburg |
| Sterf | 11 Desember 1953 Milnerton, Kaapstad |
| Genres | Klassieke musiek |
| Beroep(e) | Komponis, dirigent |
Albert Coates (1882–1953) was ’n Russiesgebore Britse en later Suid-Afrikaanse dirigent en komponis. Tussen 1910 en 1917 was hy dirigent van die Mariinskiteater in Sint Petersburg. In 1919 sluit hy hom by die Londense Simfonieorkes aan, waar hy onder meer die Wêreldpremiére van Gustav Holst se volledige Planets Suite en die hersiene weergawe van Vaughan Williams se A London Sympony dirigeer. Nadat hy met die Suid-Afrikaanse sangeres Vera de Villiers getrou het, emigreer hulle in 1945 na Suid-Afrika. Hy het nege operas gekomponeer. Die laaste, Van Hanks and the Devil, is die eerste keer in 1952, ten tyde van die Van Riebeeckfees, opgevoer.[1]
Lewensloop
[wysig | wysig bron]Albert Henry Coates is op 23 April 1882 in Sint Petersburg in Rusland gebore. Hy was die jongste van sewe kinders van 'n Engelse pa en Russiese ma.[2]
Hy studeer aan die konservatorium in Leipzig, waar sy grootste onderwyser Arthur Nikisch was. Hy het by die operahuis in Dresden gewerk en 'n dirigent in Sint Petersburg se Mariinskiteater geword. Ná die Russiese Rewolusie en die Eerste Wêreldoorlog kon hy in April 1919 uit Rusland ontsnap.[3]
In 1914 tree hy vir die eerste keer by die Royal Opera House (Covent Garden) op, waar hy Richard Wagner se Tristan und Isolde dirigeer.[4] Hy was 'n energieke man wat die gehoor aan musiek voorgestel het wat hulle nie vantevore gehoor het nie, veral deur Russiese komponiste soos Alexander Scriabin, maar ook Engelse musiek deur Ralph Vaughan Williams, Arnold Bax en Gustav Holst.
In die 1920's en vroeë 1930's het hy dikwels saam met die Londense Simfonieorkes gewerk. Hy het kort na die bekendstelling van die grammofoon opnames gemaak. Dit sluit in Scriabin's Poème de l'Extase en stukke van Wagner se Der Ring des Nibelungen en in 1925 Beethoven se volledige Simfonie Nr. 9. Hy was ook die dirigent vir die eerste opname van Rachmaninoff se Klavierkonsert Nr. 3, met Vladimir Horowitz as solis.
In 1925 het hy die eerste verhoogoptrede van Rimsky-Korsakov se opera, The Legend of the Invisible City of Kitezh and the Maiden Fevroniya, buite Rusland aangebied.
Hy het verskeie werke gekomponeer, waaronder operas en 'n simfoniese toondig, The Eagle, ter nagedagtenis aan sy voormalige onderwyser, Artur Nikisch. Die toondig is in 1925 in Leeds opgevoer. In 1946 het hy hom in Milnerton, Kaapstad gevestig, waar hy op 11 Desember 1953 oorlede is.[5]
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Holden, Raymond, "Coates, Albert Henry (1882–1953)", Oxford Dictionary of National Biography, Oxford University Press, 2004, besoek op 27 Februarie 2011}
- ↑ "Albert Coates", Naxos Records, besoek op 27 Februarie 2011
- ↑ "Tristan und Isolde", The Times 20 Februarie 1914, p. 8
- ↑ Kennedy, Michael, "Coates, Albert," Grove Music Online, Oxford Music Online, besoek op 27 Februarie 2011
Eksterne skakels
[wysig | wysig bron]
Wikimedia Commons het meer media in die kategorie Albert Coates.
