Tommie Meyer

Thomas William Seymour Meyer (beter bekend as Tommie Meyer) was 'n Suid-Afrikaanse rolprentvervaardiger, wat menigmaal met Jamie Uys en op sy eie onder die naam Tommie Meyer Films Suid-Afrikaanse rolprente vervaardig het.

Tommie Meyer
Geboortenaam	Thomas William Seymour Meyer
Geboorte	28 Februarie 1928
Sterfte	6 November 2017
Nasionaliteit	Suid-Afrika
Beroep(e)	Rolprentregisseur en -vervaardiger
Internet-rolprentdatabasis-profiel

Loopbaan as rolprentvervaardiger

Meyer is in die 1961-rolprent Doodkry is Min as akteur te sien. Hy maak sy debuut as rolprentvervaardiger in 1969 met die Afrikaanse rolprent "Die Geheim van Nantes". Hy was die vervaardiger van 30 Suid-Afrikaanse rolprente, insluitend:

• "Hoor My Lied" (1967)
• "Lied in my Hart" (1969)
• "Die Geheim van Nantes" (1975)
• "Pikkie" (1972)
• "Babbelkous en Bruidegom" (1974)
• "Somer" (1975)
• "Springbok" (1975) - ook regisseur
• "'n Seder Val in Waterkloof" (1978)
• "Die Springbok" (1979)
• "Birds of Paradise" (1981) - ook regisseur

Meyer se grootste en bekendste rolprent was Hoor My Lied in 1967 met akteur en sanger Gé Korsten asook aktrise en sangeres Min Shaw. In dié drama vertolk Korsten die rol van Dr David Retief, 'n singende snydokter. Sy dogter is verlam nadat die twee in 'n ernstige motorongeluk betrokke was. David se kopbeserings bring mee dat hy binne twee jaar blind sal wees. Lydia de Graaff is 'n verpleegster by die hospitaal waar Retief konsulteer. Sy was deels vir die ongeluk verantwoordelik en skuldgevoelens dryf haar om hulle te help. Sy vergesel hulle na Amerika om geld in te samel vir Marietjie se behandeling. Retief se sig versleg so dat hy later nie meer kan sien nie en dit skok Marietjie só dat sy tydens 'n opvoering opstaan en weer begin loop. Hierdie film het baie goed by die plaaslike loket gevaar en was in Engels vertaal na "Hear My Song" om internasionaal te distributeer.

Meyer se ander welbekende rolprent was "Lied in my Hart" wat uitgereik is in 1969, 'n drama in dieselfde trant maar minder suksesvol as Hoor my Lied, met Korsten en Shaw wat weer die hoofkarakters speel, asook Meyer se seun Pietie Meyer. Laasgenoemde het ook die hoofrol gespeel as Pikkie in Tommie Meyer se film met dieselfde titel, en saam met Lindie Roux in sy film Lindie.

Die fliek Die Springbok, asook die Engelse weergawe daarvan, “The Springbok”, was nog 'n welbekende asook kontroversiële fliek van Meyer. Die rolprent handel oor 'n kleurling persoon, Attie Louw (gespeel deur Eckard Rabe), wat hom as 'n blanke voordoen en aan die Universiteit van Pretoria studeer. Hy word uitgebeeld as die universiteit se rugbyheld wat vir die span van Noord-Transvaal gekies word. Sy groot aspirasie is om Springbok te word. Hierdie film het gelei tot die hofsaak Universiteit van Pretoria vs. Tommie Meyer Films, omdat die universiteit nie hul "goeie naam en waardigheid" wou laat skend nie en wat die film vir 'n ruk buite vertoning geplaas het. Tommie Meyer Films het die hofsaak gewen en die film is verder uitgereik.

Persoonlike lewe

Meyer het in 1955 getrou en in hierdie tyd 6 kinders gehad - Dina, Rina, Pietie, Tommie, Fransie, en Emsie. Meyer het uit die rolprentbedryf getree in 1994 en is op 6 November 2017 oorlede.

Eksterne skakels

• Tommie Meyer in die Internet-rolprentdatabasis