魔術
![](http://upload.wikimedia.org/wikipedia/commons/thumb/f/fb/Confusion_grey.svg/24px-Confusion_grey.svg.png)
![](http://upload.wikimedia.org/wikipedia/commons/thumb/6/63/Diana_Arvydas-DiArchy.jpg/200px-Diana_Arvydas-DiArchy.jpg)
![](http://upload.wikimedia.org/wikipedia/commons/thumb/8/83/Magicianatparty.jpg/200px-Magicianatparty.jpg)
魔術(英文:Magic Trick)係以不斷變化令人覺得不可思議並帶畀觀眾驚奇體驗為核心嘅一種表演藝術,通常會利用掩眼法、特殊手法、助手、道具等。
魔術師係指從事魔術活動,而唔係濫用魔術嚟做啲唔道德或犯法行為嘅人。
魔術唔係只有掩眼法,而係一項務求違反客觀現象嘅表演藝術,必須有純熟嘅手法同精製嘅道具,瞭解觀眾嘅心理同良好嘅表演心態。一個成功嘅魔術能夠令到觀眾睇得如癡如醉,要靠非常好嘅表演同創意。魔術唔係一定要有特殊道具、助手、台前幕後嘅協助,有時候只需要身邊有嘅物件都可以變出一個好魔術。
魔術嘅定義
[編輯]一般人認為,魔術係一種違反客觀規律嘅表演藝術。係依據科學嘅原理,運用特製嘅道具,巧妙綜合視覺傳達、心理學、化學、數學、物理學、表演學等唔同科學領域嘅高智慧表演藝術。捉緊人嘅好奇、求知心理嘅特點,製造出種種令人覺得不可思議、變幻莫測嘅假象,從而達到以假亂真嘅藝術效果。
魔術係一種綜合嘅舞台藝術,魔術嘅完美呈現係魔術師準確操縱現場同埋掌控人心嘅結果。魔術依靠靈活運用光、聲、電等物理同化學嘅多種科學原理,用奇特嘅藝術構思,造成種種離奇巧妙嘅表演形象。魔術師經常利用轉移注意力、燈光效果同埋人嘅錯覺等原理嚟製作舞台效果,從而為觀眾呈現一幕幕精妙絕倫嘅魔術表演。
魔術展示咗佢特殊同獨到嘅藝術趣味,能夠激發人嘅想像力,啟迪人嘅智慧,增長科學知識,豐富娛樂生活。
歷史
[編輯]起源
[編輯]正確嘅魔術起源時間無從稽考,推測喺有人類活動開始就有魔術。魔術嘅起源係宗教同信仰。喺古代,啲人相信自然界中所有嘅事情,都係因為有精靈或神靈操縱,因此巫師或祭師利用人類迷信嘅心理,利用其他人唔知道嘅原理製造神跡,令人相信呢啲係由精靈或神靈所行出嚟嘅,藉由魔術強化宗教嘅儀式,令到嗰班信徒更加確認佢哋嘅信仰。
歷史上最早嘅魔術紀錄係喺古埃及,大約係喺西元前2600年,亦即係距離而家四千幾年前,古希臘嘅神殿亦利用咗魔術嘅原理。1823年發現嘅《威斯卡手稿》,文獻上記載咗一位名叫德狄(Dedi of Dedsnefu)嘅魔術師,受召為法老王進行表演。佢將一隻鵝個頭斬咗,而斬咗頭隻鵝重識得郁,最後再將頭駁返去原本隻鵝度。嗰份紀錄描述咗呢位魔術師對塘鵝同公牛亦進行過相同嘅戲法。古希臘嘅神殿亦利用咗魔術嘅原理。例如祭司打開神殿大門嗰陣,風箱會吹向地面,祭臺上就出現咗火焰,重有利用風管製造識講嘢嘅神像。
而最早嘅戲法紀錄就係「杯同波戲法」(Cups And Balls),呢個係目前啲人所知道最古老嘅戲法。喺埃及嘅壁畫度(Tomb of Baqt III at Beni Hassan B.C 2500)亦有紀錄。而真正佢嘅歷史表演紀錄可以追溯到1世紀嘅時候。呢個戲法喺中世紀嗰陣大受歡迎,好多魔術師都廣泛喺市集度表演。當時嘅魔術師被稱為雜耍者(Juggers)。呢啲四處旅行嘅表演者同樂師、詩人、特技表演者到村莊嘅空地度以簡單嘅戲法娛樂村民。
中世紀
[編輯]到咗中世紀末期,歐洲魔術師開始面臨嚟自教堂嘅強烈反對。因為嗰陣時啲人非常相信巫術同超自然現象,而教會相信超自然事件唔係出於聖靈就係出於邪靈嘅信念,令到任何未被教堂認可嘅魔法,就會被認為係黑魔法。只要有一個人指證,魔術師就會面臨審判。好多魔術師都遭受到指控,指証佢哋同惡魔結盟。
即使受到迫害,魔術師依然係個既危險,又受到歡迎嘅職業。一些魔術師受到大地主同貴族嘅青睞同保護。呢個時期四處遊走表演嘅魔術師,只有有限嘅戲法可以進行表演。當時啤牌重未普遍,需要大型道具嘅戲法又昂貴。所以魔術師要依賴靈巧嘅手法同講故事嘅技巧。用鳥類同動物表演嘅戲法相當受歡迎。
近三百年前,宗教對於魔術嘅迫害逐漸加深,喺英王亨利八世統治期間,表演魔術嘅懲罰係死刑。到咗16世紀末,對女巫嘅迫害去到大屠殺嘅地步。由於呢啲瘋狂嘅行徑,好多魔術師嘅生命都受到威脅,若果唔透露魔術嘅秘密,可能會被處死。因此促使咗第一本英文魔術書籍嘅誕生,1584年嘅「巫術探索」(The Discovery Of Witchcraft)。呢本書嘅作者雷吉諾·史考特(Reginald Scot)嘅目的,係為咗要拯救魔術師嘅性命,為咗將魔術師嘅技巧同女巫嘅邪惡力量作為區分,喺書度揭露咗唔少魔術嘅秘密,以證明呢啲睇落似奇蹟嘅神蹟,事實上係由一啲自然嘅技巧嚟達成,而唔係藉住邪惡嘅力量。而佢嘅作品,的確令到好多魔術師脫離被燒死嘅命運。書中介紹好多魔術嘅祕密,部分到今日都重有用緊。
喺歷史上,只要有群眾聚集嘅地方,魔術師嘅表演就會高朋滿座。喺18世紀,啲人最經常聚集嘅地方係每年嘅市集。呢度會有各種馬戲、特技等表演。但係喺呢啲競爭之中,唯一嘅明星就係魔術師。18世紀最偉大嘅魔術師,係埃賽克·福克斯。佢喺1720年代聲名大噪,喺每個城鎮嘅主要市集度,都能夠見到佢嘅蹤影。埃賽克嘅經典魔術係蛋袋(Egg Bag),喺空無一物嘅袋裏面,不斷拎雞蛋同小物品出嚟。要睇福克斯嘅表演需要畀一先令。佢喺呢項技法嘅先師,因此成為咗高收入者,甚至重有一班忠實嘅支持者。佢喺1731年死嗰陣,報紙報導咗佢留低一萬英鎊嘅遺產,相當於今日嘅100萬美金,由此可知佢幾受歡迎。
到咗19世紀,隨住劇院嘅興起,魔術師搵到新嘅舞台。最早將魔術帶到戲院,並喺劇院打出名堂嘅魔術師,被稱為「北方嘅大巫師」(The Great Wizard of North)嘅蘇格蘭魔術師,約翰亨利安德森(John Henry Anderson 1814-1874)。佢嘅創新表演風格,影響咗後世眾多嘅魔術師。魔術師將巧手結合燈光同舞台效果,展開咗魔術嘅新紀元。有史以嚟魔術師登上咗歷史嘅巔峰,好多魔術為咗因應戲院而誕生。十九世紀尾係魔術表演嘅黃金時期,各地嘅魔術表演都係高朋滿座。魔術師當時穿着正式嘅燕尾服,就好似當時去戲院嗰班觀眾一樣,呢個亦係魔術師着燕尾服表演嘅起源。有啲魔術師甚至成為咗家傳戶曉嘅名人。
二十世紀初期最著名嘅魔術大師係逃脫大師哈利·胡迪尼(Harry Houdini 1874-1926),傳奇魔術大師胡迪尼,喺美國係家傳戶曉嘅人物,胡迪尼擅長於逃脫術表演,手扣、緊身衫、牛奶罐、中國水牢同最出名嘅水底逃脫。胡迪尼同時亦係揭發以魔術手法欺騙大眾嘅所謂特異功能人士嘅先驅者。直到今日啲人依然記得佢嘅事跡。
但係喺1930年代電影工業起飛,令到魔術表演市場快速衰退。因為只要喺電影度加入特殊效果,任何魔法都可能發生。唯有真正嘅魔術大師,先至能夠令觀眾着迷。
現代
[編輯]現代人對魔術嘅需求又再度上升。隨住賭城拉斯維加斯等娛樂城同電視嘅發展,造就咗魔術巨星。魔術大師一般收費高昂,而且喺世界各地都有支持者。現時,魔術依然能夠滿足觀眾對於驚奇同娛樂嘅需求。
主要類別
[編輯]- 近景魔術
近距離喺一個或幾個觀眾面前表演,需要有熟練嘅手法技巧,所用嘅道具多數係日常生活用品,例如錢幣、啤牌等。因為同觀眾面對面接觸,觀眾通常又可以觸摸表演物品,往往帶嚟極大震撼。
- 舞台魔術
需要配合大型魔術道具、舞蹈、舞台燈光、音響演出,如果有需要,舞台亦要經過特別改裝,呢類表演只適合喺劇場或禮堂度進行。
- 互動魔術
介於近景同舞台之間,主要強調互動性,又稱為中距離魔術。
- 大型幻術
喺專業嘅領域裏面「幻術」(Illusion)呢個字眼本身有佢特定嘅意含,幾乎總係指涉及喺其中或包含人物或大型動物嘅魔術「效果」(Effect)。
基本效果
[編輯]- 製造(Production):包括出現、製造同繁殖(分裂)。
- 消失(Vanish):將固體消失。
- 移位(Transposition):將固體由一邊移動到另一邊。
- 改變(Transformation):質同形嘅改變。
- 穿透(Penetration):一個固體物件冇任何損傷穿過另一個固體物件。
- 復原(Restoration):將完全破壞嘅物件恢復原狀。
- 賦予生命(Antimation):令到冇生命嘅物件自己會郁。
- 漂浮(Antigravity):改變佢嘅重力。
- 吸引力(Attraction):神奇嘅吸附力,亦係改變重力,但係需要有另一個有形嘅物體去吸附。
- 刀槍不入(Invulnerability):反人體自然現象。
- 反自然物現象(Physical Anomaly):反常或畸形嘅人或動物。
- 同觀眾比賽(Spectaor Failure):畀觀眾上台照住做,結果卻係唔一樣。
- 共同反應(Sympathetic Reaction):操縱某一物體,而另一相同物體就有同樣反應。
- 控制力(Control):用意志力控制無生命物。
- 辨識力(Identification):用視覺以外嘅感官辨識文字或物體。
- 讀心術(Thought Reading):讀取對方心中所諗嘢。
- 思想傳送(Thought Transmission):將心中所諗嘅嘢唔係用口傳達畀其他人。
- 預言(Prediction):預測將要發生嘅事。
- 超感應力(Extra Sensory Perception):就是俗稱嘅ESP。
魔術師戒條
[編輯]- 要尊重同道;
- 要認真練習;
- 未練習熟練之前唔可以表演;
- 唔可以無代價教授魔術;
- 唔公開魔術嘅秘密;
- 唔可以喺表演之前講出魔術效果;
- 唔好係同一觀眾面前表演同一套魔術;
- 要以正途發展魔術。