無畏號航空母艦
![]() |
40°45′53″N 74°00′04″W / 40.76472°N 74.00111°W
無畏號(粵讀:mou4 wai3 hou6)(舷號CV-11)係一艘隸屬於美國海軍嘅航空母艦,係艾塞克斯級航空母艦嘅三號艦。佢係美軍第四艘以無畏為名嘅軍艦,艦名源自美國海軍於1803年俘獲嘅一艘火船。
無畏號1941年開始建造。建造僅開始幾日,日本偷襲珍珠港。美國正式參與第二次世界大戰,並加快建造無畏號等航空母艦。 1943年無畏號下水服役,開始參與太平洋戰爭。戰後無畏號退役封存,喺韓戰後開始進行SCB-27C改建,又喺期間重編為攻擊航母(CVA-11),於1954年喺大西洋艦隊重新服役。稍後無畏號又進行SCB-125現代化改建,增設斜角飛行甲板。
1962年無畏號重編為反潛航母,舷號改為CVS-11,繼續留喺大西洋及地中海執勤。稍後無畏號參與美國嘅太空計畫,分別擔任水星-宇宙神7號及雙子座3號嘅救援船。 1966年至1969年,無畏號曾三次前往西太平洋,參與越戰。雖然無畏號其時已改編為反潛航母,但美軍臨時將之改編為輔助攻擊航母,故無畏號亦有派飛機到陸上參與攻擊。
無畏號喺1974年退役,並一度預備出售拆解;但喺民間組織努力下,海軍喺1981年將無畏號捐贈到紐約作博物館艦。 1982年無畏號除籍;而同年無畏號海空暨太空博物館(Intrepid Sea-Air-Space Museum)於哈德遜河河畔正式開放,自此成為曼哈頓嘅重要地標及旅遊點。 1986年,無畏號獲評為美國國家歷史地標。
美國水兵起初為無畏號安上咗戰鬥者(The Fighting I)嘅綽號;但無畏號喺二戰期間曾多次因遇襲及意外而受損或擱淺,被迫到乾船塢修理,故亦有被嘲為不幸者(The Evil I)、離水者(The Dry I)、甚至老弱號(USS Decrepit)。 [1]
建造與早年服役
[編輯]1941年12月1號,無畏號開始喺紐波特紐斯造船廠建造;六日後日軍偷襲珍珠港,美軍即時加快興建各艘航空母艦。 1943年4月26號,無畏號下水,並於8月16號服役,首任艦長為湯瑪斯•史伯格(Thomas L. Sprague)上校。 10月7號,無畏號離開諾福克海軍基地,前往加勒比海試航,沿途訓練第八航空團嘅飛行員,11月1號返抵諾福克, 25號再到切薩皮克灣試航,30號返回諾福克作最後檢修。 [2][3][4]
12月3號,無畏號離開諾福克,8號開始橫越巴拿馬運河。喺通過科倫(Colon)期間曾一度觸地擱淺,艦艏輕微受損,脫困後喺巴爾博亞(Balboa)稍作維修,14號繼續行程,最終喺22號抵達亞拉米達。接著無畏號先維修艦艏,然後搭載飛機及軍資,1944年1月5號離開亞拉米達,10號抵達珍珠港,並換上第六航空團。 [5]
第二次世界大戰
[編輯]馬紹爾群島與首次遇襲
[編輯]![](http://upload.wikimedia.org/wikipedia/commons/thumb/a/a0/USS_Intrepid_temporary_foresail%2C_February_20%2C_1944.jpg/300px-USS_Intrepid_temporary_foresail%2C_February_20%2C_1944.jpg)
冇幾耐前美軍編組咗第58特遣艦隊(Task Force 58,第五艦隊下嘅快速航空母艦艦隊),由馬克•密茲契少將指揮;無畏號編入阿爾弗雷德•蒙哥馬利(Alfred E. Montgomery)少將指揮嘅第二分隊,同行艦有旗艦艾塞克斯號及卡伯特號。 [6]16號艦隊離開珍珠港,支援即將登陸瓜加林嘅美軍。 29號早上,無畏號等空襲瓜加林北部嘅萊島(Roi island),摧毀該處嘅機場,同時擊毀爪加林所有嘅日軍戰機;當晚分隊嘅戰艦南達科佢號、北卡羅嚟納號及阿拉巴馬號炮擊咗萊島;而無畏號則喺30號再作空襲。 [7]
1月31號,美軍開始登陸瓜加林,同時佔領無人防守嘅馬久羅,瓜加林戰役爆發;當日無畏號掩護陸戰隊登陸,並作空中支援,直到2月3號美軍完全佔領環礁為止。 4號無畏號前往馬久羅稍作休整,[8] 喺12號則往空襲特魯克島(Truk)。
太平洋戰爭爆發後,日軍喺特魯克島建立海軍基地,儼如美國之珍珠港。 武藏號、大同號及長門號均於此下錨;但環礁內嘅日艦,大多喺美軍空襲前撤返日本。 2月17號美軍艦隊開始攻擊;密茲契喺日出前先派F6F奪取制空權,再命後至嘅18架TBF攻擊跑道上嘅飛機;第一波攻擊後,日軍空中力量大受打擊,環礁上嘅365架飛機,只有約100架未有受損;[9]清晨美軍艦隊嘅輕型航空母艦又派轟炸機攻擊島上設施及礁湖軍艦。
傍晚7點,六架裝有雷達嘅九七式轟炸機發現美軍艦隊,並伺機攻擊;約克鎮號曾喺9點派夜戰F6F前往攔截,但失敗告終。 10點11分,一枚魚雷擊中無畏號右舷艦艉,並喺水線以下爆炸,造成11人死亡;艦體數個隔艙入水;右舷嘅舵機機房被炸毀;艦舵更即時卡死向左六度半,使艦體開始向左急轉。為恢復操縱,史伯格暫時將右舷引擎關閉,同時將左舷引擎逐步增速,以增加艦體右轉力度;到艦體朝向東方後,史伯格再下令調節引擎,並正面逆著強烈嘅東風,以20至22節速度向東撤退。分隊則命卡伯特號及數艘驅逐艦掩護無畏號返回港口。 [10][11]
2月18號,美軍命無畏號改為到馬久羅修理,史伯格要將無畏號轉向南方。無畏號甫一轉向,原本正面相迎嘅逆風即時變成由左舷吹向艦體,使無畏號又再失控打轉。史伯格先將右舷引擎其中一軸鎖死;再將甲板上所有飛機推到艦島前方,充當臨時嘅前桅帆,使艦體可減少向左偏轉。由於飛機受風面積始終唔足,史伯格命船員物盡其用,以木板、繩網及帆布等等再造出多幅前桅帆,置於艦艏防空砲嘅砲座,並以人手操控;又將艦艏嘅貸物搬到艦艉隔艙,並為部分艦艉隔艙注水,使艦艉重量增加,從以將艦艏抬高迎風。幾經辛苦之下,無畏號終於勉強恢復航向。稍後史伯格逆著20至30節嘅東風,將無畏號直接駛回珍珠港修理,於24號抵達。 [12][4][11]
無畏號喺珍珠港拆除咗損壞嘅艦舵,並填補艦體破窿。 29號無畏號離開珍珠港,打算喺冇艦舵嘅狀態下,直接返回三藩市。但當無畏號離開珍珠港冇幾耐,隨即失控,使史伯格要向珍珠港求救。當珍珠港派出八艘艦隻前嚟協助時,海面又颳起強烈西南風,使無畏號無法安全進入港口,只好喺近海下錨停泊,直到3月3號才成功進入珍珠港。 5號無畏號再次返回乾船塢,並臨時安裝咗人手操控嘅艦舵,喺16號再次離開珍珠港。 22號無畏號終於抵達三藩市,隨即進入三藩市海軍船廠維修。 [13][4][11]
菲律賓
[編輯]![](http://upload.wikimedia.org/wikipedia/commons/thumb/b/be/USS_Intrepid_%28CV-11%29_of_Hunters_Point_1944.jpeg/300px-USS_Intrepid_%28CV-11%29_of_Hunters_Point_1944.jpeg)
直到1944年5月30號,無畏號才完成維修。 6月9號,無畏號前往珍珠港,喺14號抵達,並喺近海訓練。 8月16號,無畏號與企業號及獨立號一同前往埃尼威托克,喺24號抵達,並與早前參與菲律賓海海戰嘅艦隊會合。 [11]8月26號,小威廉•海爾賽接替雷蒙德•斯普魯恩斯,指揮美軍艦隊。由於海爾賽為第三艦隊司令,故快速航空母艦編隊亦更名為第38特遣艦隊(Task Force 38)。此時無畏號編入傑拉德•波根(Gerald F. Bogan)少將嘅第二分隊,並擔任旗艦,同行艦有碉堡山號、卡伯特號及獨立號。 [14]29號無畏號等第二分隊艦隻離開埃尼威托克,與第一及第三分隊前往菲律賓;而第四分隊則往小笠原群島。 [15]9月6號至8號,無畏號等空襲咗帛琉;又於9號至10號空襲民都洛及薩蘭加尼灣。 [15]由於缺乏目標,海爾賽改命艦隊於12號攻擊米沙鄢群島等地。 [15]15號美國海軍陸戰隊登陸帛琉,無畏號等繼續喺外海巡弋,並喺稍後改為攻擊呂宋。 21至24號,艦隊空襲呂宋各地嘅港口,然後撤退。 28號無畏號喺塞班島稍作休整,再經帛琉,於10月2號返抵烏利西。 [16]
台灣空戰
[編輯]10月6號,無畏號等艦離港,前往空襲沖繩島;而漢考克號則喺此時加入第二分隊。 10號艦隊大舉攻擊沖繩,出擊架次高達1,396架,重創沖繩港口。此時豊田副武估計美軍將空襲台灣,命喺台嘅福留繁預備迎戰;此時日軍駐台戰機約有230架。 [17]
一如日軍所料,12號美軍艦隊往南空襲台灣。海爾賽派第一分隊空襲台灣南部;無畏號嘅第二分隊空襲台灣北部;第三分隊空襲台灣中部;第四分隊則集中攻擊高雄。清晨各艦派戰機作第一波攻擊;福留繁則派戰機攔截,同時派轟炸機攻擊美軍航母,台灣空戰爆發。美軍喺空戰明顯佔優,第一波攻擊後,日軍只剩下60架戰機可用;第二波攻擊後更全被摧毀,冇戰機可迎戰第三波攻擊;福留繁嘅指揮部亦喺空襲後夷為平地。傍晚日軍魚雷機發現美軍艦隊,陸續展開攻擊,但無一成功,更損失42架。美軍當日出擊數達1,378架次,只損失48架飛機。 [18]
10月13號艦隊再次空襲台灣,出擊數下降至974架。傍晚美艦隊被日軍攻擊;富蘭克林號艦島受損,無人傷亡;而坎培拉號則被魚雷重創,要由拖船協助離開戰場。 14號艦隊派146架戰機及100架轟炸機再次攻擊台灣,順道掩護坎培拉號撤退;陸軍航空隊則喺中國大陸派109架B-29轟炸高雄。當晚日軍魚雷機再次夜襲,侯斯頓號被魚雷重創,一度下令棄船;由於兩艘受創巡洋艦離台灣及先島群島僅90英里(140公里),海爾賽於15號命三艘巡洋艦及八艘驅逐艦組成拯救小隊,協助兩艦拖行;又派科本斯號及卡伯特號作空中支援。艦隊則緩緩向西南撤走。 [19]
10月15號第四分隊往空襲呂宋;日軍則於當日及16號再次空襲拯救小隊;侯斯頓號於16號再被一枚魚雷擊中,入水超過6,300噸,艦長一度決定棄船,但同行驅逐艦決定繼續拖行。此時東京電台稱美軍第三艦隊已受重創。海爾賽得悉後,認為日軍誤判拯救小隊為第三艦隊,索性順水推舟,以拯救小隊作餌,引誘日軍攻擊;無畏號嘅第二分隊與第三分隊共同掩護小隊,但由第三分隊伏擊從日本而嚟嘅飛機。 16號早上,日軍命嗰智號及足柄號等由瀨戶內海出發,往南追擊,卻喺沖繩外海被碉堡山號兩架飛機攻擊。此時福留繁得悉美軍航空母艦未有受損,命巡洋艦隊即時撤退。美軍埋伏雖然失敗,兩艘重創軍艦仍得而撤走,喺27號終於抵達烏利西。 [20]
10月17號無畏號往南行駛,以支援美軍重奪菲律賓;而小澤治三郎則命艦隊阻止美軍登陸,並以自身航空母艦為餌,引開美軍艦隊,由栗田健男嘅第二艦隊到雷伊泰攻擊美軍登陸部隊;稍後因此引發雷伊泰灣海戰。 18號無畏號空襲卡加延省。 [16]美軍喺20號開始登陸獨魯萬市,而麥克阿瑟則喺當日下午登上灘頭,宣告自己重返菲律賓。
雷伊泰灣海戰
[編輯]![](http://upload.wikimedia.org/wikipedia/commons/thumb/d/db/USS_Intrepid_%28CV-11%29_during_Battle_of_Leyte_Gulf_1944.jpeg/300px-USS_Intrepid_%28CV-11%29_during_Battle_of_Leyte_Gulf_1944.jpeg)
10月21號,無畏號再次空襲呂宋一帶。 23號,美軍潛艇發現日軍艦隊,並擊沉愛宕號及摩耶號,重創高雄號。此時海戰近喺眉睫,但美軍未有投入冚唪唥航空母艦;第一分隊喺22號前往烏利西補畀,要到24號才調返菲律賓。 [21]無畏號嘅第二分隊喺聖貝納迪諾海峽(San Benardino Strait)以東巡航;第三分隊喺波利略島(Polillo Islands)以東;第四分隊則喺雷伊泰灣東面海域。 [22]
24號早上,美軍三支航空母艦分隊繼續索敵。 8點12分,無畏號一架偵察機發現栗田健男嘅中央艦隊,包括大同號及武藏號等艦,正進入錫布延海;僅15分鐘後,海爾賽越過密茲契嘅航艦指揮權,命各分隊即時派飛機攻擊日艦(第二分隊最接近日本艦隊,第三及第四分隊分別喺其北面及南面),同時將第一分隊調返菲律賓。 [22]
此時大西瀧治郎派出近60架飛機,由菲律賓飛往空襲第三分隊,並喺9點38分重創咗普林斯頓號,最終由美軍於傍晚以魚雷自沉。 10點10分,小澤治三郎從航空母艦派飛機作第二波攻擊,於正午12點12分抵達,但第三分隊未再受損。 [23]
正當日軍派出第二波攻擊之際,無畏號及卡伯特號嘅第二分隊,分別於10點26分、12點45分及下午3點50分,到錫布延海猛烈攻擊日軍艦隊。第三分隊於下午1點30分轟炸日艦;而第四分隊則於2點15分作最後攻擊。當日美軍共出動259架次飛機攻擊中央艦隊,並擊沉武藏號,擊傷大同號、長門號及妙高號。 [24]
栗田嘅中央艦隊在下午撤退,先避開美軍攻擊,稍後再嘗試進入雷伊泰灣。呢使西村祥治嘅南方艦隊獨自進入雷伊泰灣,並喺25號於蘇里高海峽遭美軍戰艦伏擊慘敗;[25]而第三分隊因忙於救援普林斯頓號及攻擊中央艦隊,故此未有發現小澤嘅北方艦隊。最終小澤由第四分隊嘅偵察機,於24號下午3點40分及4點40分發現。 [26]
24號晚上10點,海爾賽召集北面三支航空母艦分隊,以及威利斯•李駐守於聖貝納迪諾海峽嘅戰艦北上,追擊北方艦隊嘅日軍航空母艦。各分隊於11點45分會合,海爾賽則將航空母艦隊交由密茲契指揮;而前往烏利西嘅第一分隊則喺加速趕回菲律賓。至此小澤嘅誘敵計畫成功,粟田嘅中央艦隊喺毫無抵抗下駛入雷伊泰灣。 [27]
25號凌晨,美軍偵察機發現小澤艦隊大約位置;清晨密茲契命列星頓號先派偵察機前往索敵,並喺發現日艦前命航空母艦派飛機升空,以爭取時間。 7點10分偵察機發現日艦,第三分隊已升空嘅轟炸機率先攻擊。小澤雖早喺7點便發現美機,但因艦載機折損過多,最終只能派出15架戰機防守。為使誘敵成功,小澤命瑞鳳號離隊吸引美軍攻擊。 8點美軍第一波空襲抵達;艾塞克斯號及列星頓號嘅魚雷轟炸機開始攻擊瑞鳳號,但無一命中;無畏號嘅轟炸機則先後命中瑞鳳號及千歲號,擊沉後者;聖哈辛托號(或無畏號)嘅魚雷轟炸機亦命中旗艦瑞鶴號,迫使小澤將指揮轉移至大淀號;秋月號亦喺稍後被擊沉。 [28]
8點22分,托馬斯•金凱德中將嘅第七艦隊被粟田嘅中央艦隊攻擊,以明碼向海爾賽求救;但海爾賽未有調動北上嘅艦隊,只命第一分隊加緊前往菲律賓;[29]10點尼米茲喺珍珠港發電報畀海爾賽,詢問第三艦隊何喺,卻因解密問題而激怒海爾賽;要到11點15分海爾賽才命無畏號嘅第二分隊及李嘅戰艦南下。此時兩分隊最快要到26號半夜才可抵達聖貝納迪諾海峽,且分隊必須喺中途補油方可繼續前進,唔可能追上粟田艦隊;[30]艦隊其它航空母艦則繼續攻擊小澤,最終擊沉瑞鶴號、瑞鳳號、千代田號及初月號 ,並擊傷其它艦隻。海戰於當日結束。 [28]
26號清晨5點,無畏號嘅第二分隊終於與第一分隊會合,而漢考克號亦返回第二分隊。 6點兩支分隊派出第一波飛機追擊粟田,又喺8點10分及12點45分派出第二波及第三波攻擊,最終僅擊沉能代號及早霜號,並重傷熊野號。 [31]
雷伊泰島、呂宋與再次遇襲
[編輯]![](http://upload.wikimedia.org/wikipedia/commons/thumb/2/24/USS_Intrepid_CV-11_kamikaze_strike.jpg/300px-USS_Intrepid_CV-11_kamikaze_strike.jpg)
10月27號第二分隊喺海上補油,喺28號前往空襲馬尼拉灣。 [16]29號早上,無畏號等派飛機空襲馬尼拉各地機場,並與日軍爆發空戰,擊毀多架飛機;但同日無畏號被神風特攻隊自殺飛機擊中,造成10死六傷,喺搶修後繼續作戰。 [32]30號老約翰•麥凱恩接替密茲契,指揮快速航空母艦。
11月5號,第一及第三分隊喺波利略外海與第二分隊會合,[33]然後分別攻擊仁牙因灣、北錫布延海及馬尼拉灣三地嘅日軍機場及補畀艦隻,並擊沉咗嗰智號,摧毀地面多架飛機。下午列星頓號遭自殺飛機擊傷,迫使麥凱恩將旗艦轉至胡蜂號。 6號艦隊再次空襲三地,喺傍晚到外海補油。 [34]8號無畏號嘅第二分隊,聯同受損嘅列星頓號返回烏利西休整,喺9號抵達。 [35]
11月14號,無畏號嘅第二分隊離開烏利西,接替第三分隊作戰。 15號麥凱恩將艦隊旗艦改設喺第二分隊嘅漢考克號。 [36]17號第一、第二及第四分隊再次空襲呂宋,於20號撤到後方補油。 21號第四分隊離隊空襲雅浦島,然後到烏利西休整;而第一分隊亦喺23號到烏利西,於24號抵達,留下無畏號嘅第二分隊及艾塞克斯號嘅第三分隊作戰。 [35]25號,兩支分隊再次轟炸呂宋等地嘅日軍艦隻,其中提康德羅加號擊沉咗熊野號。
日軍再次以自殺飛機仲擊。中午12點26分,正當第二分隊開始派出戰機之際,十多架自殺飛機高速向分隊迫近。 34分,漢考克號先被自殺飛機嘅碎片擊傷;到53分,一架自殺飛機撞入無畏號左舷,穿過一個20毫米機炮炮座及飛行甲板,然後與炸彈一同喺機庫上層甲板爆炸。爆炸將飛行甲板扭曲,並引發大火。與此同時,卡伯特號亦遭自殺飛機擊中;到55分,第三分隊嘅艾塞克斯號亦遭自殺飛機擊傷。 [37]
數分鐘後,第二架自殺飛機攻擊無畏號,其炸彈先貫穿飛行甲板,並喺機庫爆炸;而飛機則散成碎片,橫掃整片飛行甲板,使飛行甲板及機庫均告起火。由於無畏號已無法回收飛機,故此已派出嘅75架飛機只好喺艾塞克斯號、漢考克號及提康德羅加號降落補油,然後飛到雷伊泰嘅美軍陸上基地。下午1點無畏號嘅大火開始受控,並喺2點47分撲滅。兩次攻擊最終造成69人死亡,35人受傷。 [37]
由於艦隊損傷慘重;再加上麥克阿瑟推遲登陸民都洛到12月15號,艦隊下令撤退。第三分隊繼續喺海上巡航,而無畏號嘅第二分隊則返回烏利西,喺27號抵達。 [35]接著無畏號返回美國維修,喺12月20號再次返抵三藩市,並進入乾船塢。 [4]
沖繩島、硫磺島與日本
[編輯]![](http://upload.wikimedia.org/wikipedia/commons/thumb/2/2a/USS_Intrepid_%28CV-11%29_listing_1945.jpeg/300px-USS_Intrepid_%28CV-11%29_listing_1945.jpeg)
1945年2月11號,無畏號完成維修,並喺16號再次前往西太平洋,於3月2號抵達珍珠港。接著無畏號與富蘭克林號及巴丹號前往烏利西會合艦隊,喺13號抵達。 [11]次日第五艦隊離開烏利西,前往支援沖繩戰役,並先空襲九州,削弱該處嘅日軍空中力量。無畏號編入亞瑟•拉德福(Arthur W. Radford)少將嘅第四分隊,同行艦有旗艦約克鎮號、企業號、蘭利號及獨立號。 [38]
3月18號上午,艦隊開始派出機隊,空襲九州各地機場,但宇垣纏喺美軍攻擊前,已派出僅餘嘅飛機升空,正前往攻擊第四分隊,故美軍收獲唔大。企業號先於早上被日軍炸彈擊中,但未有引爆;無畏號成功攔截自殺攻擊,艦體輕微受損,但自殺飛機碎片仍殺死艦上兩人,並傷及43人,喺機庫引起小火。到下午1點,約克鎮號亦遭日本飛機擊傷,喺搶修後繼續作戰。 [39]
同日,美軍偵察咗神戶及吳市,發現日軍於港內嘅大批軍艦,故密茲契於19號命艦隊空襲瀨戶內海,最終擊傷大同號、日向號、榛名號、生駒號、葛城號、龍鳳號、天城號、鳳翔號、海鷹號、利根號及大淀號;但美軍亦遭日機反擊,胡蜂號被炸彈擊中爆炸,造成多人死傷,喺搶修後繼續作戰;而富蘭克林號則身中兩枚炸彈,起火爆炸,一度失速,更幾近沉沒。戴維森喺離艦後,將旗艦轉到第三分隊嘅漢考克號(後者臨時加入第二分隊),並建議艦長棄船,但為艦長拒絕。最終富蘭克林號喺多艘艦隻協助下,緩緩撤走。企業號及部分第四分隊軍艦調往第二分隊,以掩護其撤退。 [40]
3月20號艦隊往南撤退,但繼續派飛機轟炸九州南部機場;下午第二分隊再遭遇自殺飛機攻擊,一艘驅逐艦受損,而企業號嘅甲板則被友軍防空砲擊中。 21號第一分隊遭到MXY-7櫻花特別攻擊機襲擊,將之悉數擊落。傍晚胡蜂號轉到第二分隊,而聖哈辛托號則加入第一分隊。各艦於22號到外海補油,而企業號、胡蜂號及富蘭克林號等艦則分別撤返烏利西及美國修理;第二分隊要到4月才重返戰場。 [41]23號起,艦隊開始日復日空襲沖繩島,偶而亦空襲硫磺島,各分隊則輪流喺海上補油。 4月1號,美軍開始登陸沖繩島,艦隊繼續提供空中支援。 [42]5號企業號返回,並加入無畏號嘅第四分隊;6號日軍派出355架自殺飛機及341架轟炸機,攻擊美軍登陸區嘅艦隻,並擊傷多艘;而美軍艦隊則勉強守住攻擊。當日艦隊估計己方擊落249架。 [43]晚上美軍潛艇發現大同號及其它軍艦離開豐後水道,密茲契召集所有航空母艦北進迎擊。 [44]
坊之岬海戰
[編輯]4月7號上午8點23分,艾塞克斯號嘅偵察機發現大同號。 [45]斯普魯恩斯曾打算命戰艦迎擊,但為免登陸部隊遇襲,將任務交畀航空母艦。 9點15分密茲契先派16架戰機再作偵察,並命第一及第三分隊預備攻擊。此時無畏號嘅第四分隊仍忙於掩護沖繩,要到45分才進入作戰距離。 [45]10點起各艦開始派飛機前往攻擊,並持續至下午2點。 [46]大同號接連中彈,快速向左舷傾側,最終喺23分爆炸沈冇;日軍亦損失咗矢矧號、濱風號、磯風號、朝霜號及霞號,另外冬月號、涼月號、雪風號及初霜號亦受損。美軍整日亦受自殺飛機侵擾;漢考克號於中午被一枚炸彈及飛機擊中,引發大火,到下午才恢復飛行作業。 [47]
沖繩島與第四次受創
[編輯]![](http://upload.wikimedia.org/wikipedia/commons/thumb/0/05/USS_Intrepid_%28CVA-11%29_during_her_SCB-27C_modernization_at_Newport_News_Shipbuilding%2C_circa_1953.jpg/300px-USS_Intrepid_%28CVA-11%29_during_her_SCB-27C_modernization_at_Newport_News_Shipbuilding%2C_circa_1953.jpg)
4月8號艦隊返回南方,支援沖繩作戰。同日蘭道夫號與艦隊會合,戴維森重建第二分隊,並以企業號為旗艦,同行艦尚有獨立號;9號漢考克號及卡伯特號則撤返烏利西修理。 [48]由於日軍俘虜稱將喺11號發動大規模自殺飛機攻擊,密茲契加緊戰機警備。 11號日軍一如所料,在下午1點30分起大舉進攻;密蘇喥號先於2點43分被一架自殺飛機擊中,受損唔大;企業號於2點10分亦被自殺飛機擊中,爆炸起火,使甲板飛行作業停止48小時,再次撤返烏利西修理;艾塞克斯號在下午3點7分幾乎被擊中,炸彈喺艦外落水爆炸,艦體輕微受損。整日日軍共派出近185架自殺飛機。 [49]12號日軍集中空襲沖繩島嘅登陸艦隊,擊傷多艘美軍艦隻;同日富蘭克林•羅斯福去世。 [50]
美軍艦隊繼續支援沖繩美軍,並連日與日軍飛機空戰。 15及16號,艦隊空襲咗九州嘅機場,而日軍再派自殺飛機反擊。 16號下午1點36分,兩架自殺飛機攻擊無畏號,第一架飛機僅僅掠過飛行甲板,喺艦側落水墜毀;第二架飛機則垂直撞入接近後方升降台嘅飛行甲板,並引發大火。火勢雖喺一小時內撲滅,但無畏號因受損嚴重,而要再次返國修理。攻擊最終造成10死87人受傷。 [51]
4月17號無畏號啟程返國,先喺5月4號途經烏利西,再於11號經珍珠港,於19號再一次進入三藩市海軍船塢維修。 [4]
日本投降
[編輯]6月29號,無畏號離開三藩市,並先到珍珠港近海訓練。 8月6號,無畏號離開珍珠港,喺同日空襲咗威克島,於7號抵達埃尼威托克。 [11]15號中午,昭和天皇宣佈日本投降。 [4]
8月21號,無畏號、安提頓號及卡伯特號啟程前往日本,以協助盟軍佔領當地。途中安提頓號因機件故障而要到關島維修,無畏號與卡伯特號兩艦則喺25號與艦隊會合。接著無畏號兩艦分別到日本本土、仁川及大沽等地,協助盟軍佔領日佔土地。 [11]10月8號無畏號離開渤海,與列星頓號、漢考克號及班寧頓號等艦繼續喺日本及西太平洋執勤,喺14號進入橫須賀船廠休整。 12月2號無畏號離開橫須賀,於15號返抵聖佩德羅。 1946年2月4號,無畏號轉到三藩市,並開始封存待命。 [4][11]
戰後改建與大西洋艦隊
[編輯]![](http://upload.wikimedia.org/wikipedia/commons/thumb/b/bf/USS_Independence_%28CVA-62%29%2C_USS_Saratoga_%28CVA-60%29%2C_and_USS_Intrepid_%28CVA-11%29_underway_in_1961%2C_with_crewmen_paraded_on_deck_in_a_spellout_commemorating_the_50th_birthday_of_U.S._naval_aviation_%28NH_97716%29.jpg/300px-thumbnail.jpg)
1947年3月22號,無畏號退役,繼續喺三藩市封存。此時海軍正打算為艾塞克斯級作現代化改建,但要到韓戰爆發後,才有充足經費。1952年2月9號,無畏號短暫返回現役,由三藩市前往東岸嘅紐波特紐斯造船廠。4月9號無畏號喺該處退役,並開始進行SCB-27C改建。同年10月1號,無畏號改編為攻擊航母,舷號改為CVA-11。[53]
1954年6月18號,無畏號完成改建,喺同日重返現役。9月到11月,無畏號到加勒比海試航,接著加入大西洋艦隊。[4][53]
1955年1月9號,無畏號喺關塔那摩灣一帶考核飛行員,並曾到訪太子港。5月28號,無畏號前往地中海巡航,喺6月7號抵達西班牙加的斯灣。接著無畏號途經直布羅陀,並嗚放21響禮炮,慶祝英女皇伊莉莎白二世生日(其時為直布羅陀英女皇壽辰日,並非女皇實際出生日)。稍後無畏號依次到訪利佛諾、那不勒斯、塞薩洛尼基、雅典、華倫西亞、馬賽、戛纳、羅德島及伊斯坦堡,喺11月初啟程返國,於22號返抵美國。[4][53][54]
1956年3月12號,無畏號再次前往地中海,並喺21號於直布羅陀接替返國嘅尚普蘭湖號。接著無畏號再造訪多個地中海港口,於9月5號返抵美國。接著無畏號前往布碌崙造船廠,並喺29號開始進行SCB-125改建,增設斜角飛行甲板及封閉艦艏。[4][53][55]
1957年4月,無畏號完成改建,喺5月7號前往諾福克海軍基地,並喺20號開始喺關塔那摩灣外考核機師,於8月返回諾福克。9月3號,無畏號前往北大西洋,並參與北約大型軍事演習反擊行動(Operation Strikeback)。除無畏號外,美軍亦派出艾塞克斯號、胡蜂號、塔拉瓦號、福萊斯特號、薩拉托加號、艾奧瓦號及威斯康辛號;英國則派出皇家方舟號、鷹號及壁壘號(HMS Bulwark R08)。演習模擬防守GIUK缺口。演習期間,無畏號曾到訪布雷斯特及貝爾法斯特附近港口,於10月22號返抵美國。[4][53][56]
1958年1月22號,無畏號進入諾福克船廠稍作維修,然後留喺近岸執勤,並曾到訪紐約。6月9號,無畏號搭載美國海軍學院嘅學員,前往北大西洋考核,並途經里斯本、奧斯陸及鹿特丹,喺8月8號返抵諾福克。稍後無畏號前往梅港維修,然後到加勒比海訓練演習。[4][53][57]
1959年2月13號,無畏號與羅斯福號一同前往地中海,並喺3月1號於直布羅陀接替蘭道夫號及福萊斯特號。稍後無畏號先後到訪帕爾馬、那不勒斯、巴塞羅那、雅典、康城、巴勒莫及利佛諾,喺8月18號由艾塞克斯號接替,於30號返抵諾福克,並進入船廠維修。[4][53][58]
1960年1月,無畏號完成維修,前往加勒比海試航,然後留喺近岸訓練。要到8月4號,無畏號才再次離開諾福克,到地中海巡航。稍後無畏號造訪利佛諾、菲烏米奇諾、雅典、伊斯坦堡、貝魯特、那不勒斯及羅塔島,於1961年2月17號返抵諾福克。4月,無畏號喺近岸考核飛行員,並喺5月前往紐約,擔任武器試驗嘅觀測艦,並乘載美國多所軍校嘅觀察員。6月多明尼加共同國因總統拉斐爾•特魯希略遇刺身亡,政局唔穩,無畏號與福治谷號等被派往當地警備,隨時撤僑。[4][53][59]
1961年8月4號,無畏號再次前往地中海,先喺17號於直布羅陀接替羅斯福號。稍後無畏號與北約海軍演習,並先後到訪那不勒斯、克基拉島、羅德島、雅典、熱那亞、利佛諾、康城及巴塞羅那,最後喺1962年2月17號由香格里拉號接替,於3月1號返抵諾福克。[4][53][60]
反潛航母及太空任務
[編輯]![](http://upload.wikimedia.org/wikipedia/commons/thumb/f/f2/USS_Intrepid_%28CV-11%29_-_Mar_65_a.jpg/300px-USS_Intrepid_%28CV-11%29_-_Mar_65_a.jpg)
1962年3月10號,無畏號進入諾福克海軍船廠,開始改建為反潛航母,並喺31號正式改編,舷號改為CVS-11。4月2號無畏號完成改建,隨即到近岸及關塔嗰摩灣一帶訓練,然後前往巴哈馬海域,擔任水星-宇宙神7號嘅救援艦。 5月24號,太空艙因技術問題而偏離原定降落點,喺無畏號230哩外遠處濺落。無畏號先派直升機救走太空人,然後打撈太空艙,於31號返抵諾福克。 7月6號無畏號到海上考核海軍學院學員,並到訪魁北克,於期間開放予公眾參觀,最後喺8月5號返抵諾福克。 9月12號,無畏號進入諾福克船廠翻修,直到12月28號。 [4][53][61]
1963年1月23號,無畏號前往關塔那摩灣訓練,並造訪金斯敦,於3月23號返抵諾福克。 5月13號無畏號前往紐約,再次開放予公眾參觀,並喺23號返回諾福克。 6月及8月無畏號到北大西洋考核軍校學員,於10月1號返抵諾福克。 11月至12月,無畏號留喺近海執勤。 [4][53][62]
1964年上半葉,無畏號繼續喺北大西洋及加勒比海執勤。 6月11號,無畏號離開諾福克,再次到大西洋及地中海考核軍校學員,並且追蹤蘇聯潛艇,喺8月返回諾福克。 [4][53]
稍後無畏號繼續喺近岸訓練。 1965年3月,無畏號前往加勒比海,擔任雙子座3號嘅救援船。 23號雙子座3號升空,為美國首次雙人太空任務。太空艙喺返回時偏離預定濺落點,故無畏號先派直升機救走太空人,接著才打撈太空艙。 4月無畏號進入紐約布魯克林船廠作現代化改建(Fleet Rehabilitation and Modernization, FRAM),以延長服役壽命。改建喺9月完成後,無畏號留喺近海試航。 [4][53]
越戰
[編輯]![](http://upload.wikimedia.org/wikipedia/commons/thumb/1/16/A-4B_VA-95_on_cat_USS_Intrepid_%28CVS-11%29_1966.jpg/300px-A-4B_VA-95_on_cat_USS_Intrepid_%28CVS-11%29_1966.jpg)
1966年4月4號,無畏號離開諾福克,途經好望角,前往西太平洋參與越戰。此時正值美軍將滾雷行動升級,加大力度轟炸北越。為增加空中攻擊力,海軍將無畏號嘅反潛機隊替換,轉為搭載攻擊航母嘅機隊,以用作輔助攻擊航母。 5月15號,無畏號抵達越南外海嘅洋基站,接替返國嘅漢考克號,開始派攻擊機到陸上轟炸。 [63][64]6月29號,美軍獲準攻擊北越嘅儲油設施(即POL攻擊)及工業設施,並開始與受蘇聯訓練嘅北越米格機交戰;[65]10月9號,無畏號一架A-1攻擊機更擊落咗一架米格-17。噉亦係活塞動力飛機喺越戰中唯一擊落嘅噴射機。作戰期間,無畏號曾到橫須賀、佐世保、香港及蘇比克灣休整。 10月30號無畏號離開西太平洋,再經好望角,喺11月21號返抵諾福克。 [66][67][53]
1967年5月11號,無畏號第二次前往越南作戰。與上前巡航相若,無畏號再次用作輔助攻擊航母,但額外加上咗F-8戰鬥機小隊。無畏號預備橫越蘇伊士運河之際,六日戰爭爆發,無畏號喺運河關閉前成功橫越,繼續前往西太平洋。 6月9號無畏號開始喺洋基站執勤。 [4][66]此時美軍正加緊轟炸連接河內市、海防市、清化市及中國嘅鐵路;無畏號隨即加入,並與其它航空母艦多次派出混編機種嘅機隊到陸上攻擊,以應付北越密集嘅防空飛彈。呢啲混合機隊嘅攻擊任務亦稱為Alpha Strikes。 [68]8月21號,無畏號與奧里斯卡尼號及星座號發動聯合攻擊。無畏號先派出兩波飛機攻擊錦普鎮嘅港口,然後派另一波飛機攻擊河內外圍嘅軍事補畀點及鐵路設施;星座號空襲咗白馬市機場;而奧里斯卡尼號則空襲河內嘅火力發電廠。 [69]10月無畏號與奧里斯卡尼號空襲咗海防市嘅港口及船廠設施,又喺11月與珊瑚海號切斷寧平市附近河道嘅鐵路橋,並喺該區摧毀咗25列火車卡。 [70]不過,北越密集嘅防空火力使美軍損傷慘重。整次巡航,無畏號一共有12架飛機被防空砲及飛彈擊落。 [66]執勤期間,無畏號曾到蘇比克灣、橫須賀及香港休整。 12月9號無畏號離開越南,經南非好望角,最後於30號返抵諾福克。 [67][53]
1968年6月4號,無畏號離開諾福克,途經好望角,最後一次參與越戰。早前北越發動春節攻勢,但遭到南越及美軍擊潰。到7月24號無畏號開始喺越南外海執勤時,美國總統林登•詹森早已下令禁止攻擊北緯19度以北嘅北越設施及軍隊。無畏號僅恢復鋼虎行動,攻擊老撾嘅胡志明小道補畀線。雖然海空軍嘅出擊數日漸下降,但仍有與北越空軍交戰。 9月19號,無畏號一架F-8擊落咗一架米格-21;此後要到1970年3月,海軍才再有擊落米格機嘅紀錄。 [66][71]執勤期間,無畏號曾到蘇比克灣、香港及星架坡休假。 1969年1月8號無畏號離開越南,繞經好望角,喺2月8號返抵諾福克,結束越戰巡航。 [67][53]
後續巡航
[編輯]返國後無畏號留喺近岸執勤,並將母港轉到羅得島州嘅昆錫點海軍基地(Quonset Point)。 9月8號,無畏號喺詹姆斯鎮外海訓練時一度擱淺,喺兩小時後脫困。 10月到11月期間,無畏號到加勒比海訓練,然後回國修理。 1970年9月到11月,無畏號再次到加勒比海作反潛訓練。 [53][72]
1971年4月16號,無畏號再次作遠洋巡航,前往北大西洋及地中海,與北洋海軍演習,並曾到訪里斯本、普利茅斯、基爾、嗰唔勒斯、康城、巴塞羅嗰、漢堡、哥本哈根、格里諾克、蘇格蘭羅塞斯(Rosyth)、樸次茅斯及卑爾根。巡航期間,無畏號曾到波羅嘅海以及北極圈內嘅巴倫支海,追蹤蘇聯潛艇,喺10月15號返抵昆錫點。 [53][72]
1972年7月11號至10月15號,無畏號曾到北大西洋執勤,然後預備最後一次遠洋巡航。 11月24號,無畏號先後到地中海及北大西洋巡航,與北約海軍演習,並先後到訪鹿特丹、里斯本及若干意大利、希臘與法國港口,於5月4號返抵昆錫點,並預備退役。 [53][72]
退役、榮譽與博物館艦
[編輯]1974年3月15號,無畏號退役,並拖到費城封存;佢亦係美軍最後一艘退役嘅反潛航母。 [53]稍後海軍打算將無畏號出售拆解,但遭到民間反對;其中紐約房地產商兼慈善家扎卡里•費沙(Zachary Fisher)更喺1978年成立無畏號博物館組織(Intrepid Museum Foundation),並籌集資金,以購入無畏號作博物館艦。與海軍交涉多年後,海軍同意咗組織嘅請求,並喺1981年4月27號將無畏號轉交組織管理。 1982年2月23號,無畏號除籍,並開始改建為博物館艦;同年8月,無畏號海空暨太空博物館(Intrepid Sea-Air-Space Museum)喺紐約正式開放;而費沙喺稍後購入更多海軍退役艦隻到博物館。 1986年,無畏號獲評為美國國家歷史地標。 [2][73]
此後無畏號博物館逐漸成為紐約市地標,以及多項活動舉辦地點,平均每年有915,000人參觀。 2001年九一一襲擊後,聯邦調查局曾以無畏號作為臨時辦公地點。電影《驚天奪寶》(2004年上畫)及《我係傳奇》(2007年上畫),均曾喺無畏號取景。
2006年7月,無畏號開始籌備翻修,並喺10月1號關閉。 11月6號,拖船嘗試將無畏號拖到新澤西州貝永維修;但無畏號由於長年停泊,艦體早被淤泥卡死,無法移動。海軍稍後加入協助,喺清理走30,000立方米淤泥後,無畏號喺12月5號拖離停泊處,接著開始維修及翻新,總共耗費一億二千萬美金(120,000,000)。 2008年10月2號,無畏號由拖船拖回紐約,並喺11月8號再次對外開放。 [74][75]
無畏號兩次獲頒海軍集體嘉獎勳表,並分別喺二戰及越戰獲得五枚戰鬥之星。冚唪唥榮譽見下表:[76][2]
海軍集體嘉獎勳表: 兩次 | |||
海軍遠徵獎章 | 中國服役獎章: (延長) |
美國戰役獎章 | 太平洋戰爭獎章: 五枚戰鬥之星 |
第二次世界大戰勝利獎章 | 海軍佔領服役獎章: (「亞洲(Asia)」橫扣) (「歐洲(Europe)」橫扣) |
國防部服役獎章: 兩枚 |
越南服役獎章: 五枚戰鬥之星 |
菲律賓總統集體嘉獎勳表 | 棕櫚葉越南英勇十字集體嘉獎 | 菲律賓解放獎章 | 越南共同國戰役獎章 |
睇埋
[編輯]註釋
[編輯]- ↑ Boys' Life雜誌,1985年8月,第25頁
- ↑ 2.0 2.1 2.2 海軍網上資源(NavSource Online):無畏號
- ↑ Zollo 1993, p. 58
- ↑ 4.00 4.01 4.02 4.03 4.04 4.05 4.06 4.07 4.08 4.09 4.10 4.11 4.12 4.13 4.14 4.15 4.16 4.17 4.18 4.19 美國海軍軍艦字典(DANFS)簡介
- ↑ Zollo 1993, pp. 59-64
- ↑ Morison 1988, p. 208其時第一分隊指揮為約翰•小李維(Jown W. Reeves, Jr.)少將,下轄旗艦企業號、約克鎮號及貝勞森林號;第三分隊由費德烈•薛曼(Frederick C. Sherman)少將指揮,下轄旗艦碉堡山號、蒙特利號及科本斯號;第四分隊由山姆•堅達(Samuel P. Ginder)少將指揮,下轄旗艦薩拉託加號、普林斯頓號及蘭利號。
- ↑ Morison 1988, p. 219
- ↑ Morison 1988, p. 218
- ↑ Morison 1988, p. 320
- ↑ Morison 1988, pp. 321-325
- ↑ 11.0 11.1 11.2 11.3 11.4 11.5 11.6 11.7 無畏號老兵組織-二次戰歷史
- ↑ 見艦長史伯格報告及Zollo 1993, pp. 91-93。當時史伯格要將無畏號向東撤退,但失控嘅無畏號卻經常將艦體轉回西方,直指東京,使史伯格慨嘆「我當時根本就唔想到嗰喥啊!」(The ship kept turning west towards Tokyo, at the time I didn't want to go to Tokyo.)
- ↑ Zollo 1993, pp. 93-94
- ↑ 第38特遣艦隊行動-雷伊泰灣8月26號時,第一分隊由老約翰•麥凱恩中將指揮,下轄旗艦胡蜂號、大黃蜂號、科本斯號及蒙特利號;第三分隊由薛曼指揮,下轄旗艦艾塞克斯號、艦隊旗艦列星頓號、蘭利號及普林斯頓號;第四分隊由拉夫•戴維森(Ralph E. Davison)少將指揮,下轄旗艦富蘭克林號、企業號、聖哈辛托號及貝勞森林號。
- ↑ 15.0 15.1 15.2 Morison 1988, p. 13
- ↑ 16.0 16.1 16.2 第38特遣艦隊行動-雷伊泰灣
- ↑ Morison 1988, p. 91
- ↑ Morison 1988, p. 93福留繁喺指揮部睇到多架飛機被擊落,鼓掌稱快,但下一刻才發現墜地嘅均為日機,唔禁哀嘆日軍攔截只係「以卵擊石」。
- ↑ Morison 1988, pp. 95-100
- ↑ Morison 1988, pp. 101-104
- ↑ 第38特遣艦隊行動-雷伊泰灣24號海戰爆發前,美軍四支航空母艦分隊如下:第一分隊仍由麥凱恩中將指揮,下轄旗艦胡蜂號、大黃蜂號、漢考克號(於22號調自第二分隊)、科本斯號及蒙特利號,蒙哥馬利少將則於30號接替麥凱恩;第二分隊繼續由波根少將指揮,下轄旗艦無畏號、卡伯特號及獨立號,而碉堡山號則於23號撤返布雷默頓普吉灣海軍船塢維修;第三分隊嘅指揮仍為薛曼少將,航空母艦編制唔變(分隊旗艦艾塞克斯號、第38特遣艦隊旗艦列星頓號、普林斯頓號及蘭利號);第四分隊續由戴維森少將指揮,有旗艦富蘭克林號(於10月30號受損撤退)、企業號(30號後接替富蘭克林號為旗艦)、聖哈辛托號及貝勞森林號。
- ↑ 22.0 22.1 Morison 1988, p. 175
- ↑ Morison 1988, pp. 182-183
- ↑ Morison 1988, pp. 184-186。擊傷武藏號嘅飛機以第二分隊為主。武藏號最終身中19枚魚雷及17枚炸彈,於8點35分左右沉沒。
- ↑ Morison 1988, p. 189
- ↑ Morison 1988, p. 192
- ↑ Morison 1988, pp. 193-195, 320第二分隊嘅波根少將於當晚接獲獨立號嘅報告,指粟田中央艦隊再次東進,更未因錫布延海戰而失去戰力。波根因此抗議海爾賽嘅命令;李上將亦估計中央艦隊僅為暫時撤退,並向海爾賽報告;但海爾賽未有理會,而兩人亦未有進一步行動。整日被海爾賽凌駕指揮嘅密茲契於日間命參謀留意粟田動向。晚間其參謀收到獨立號報告後,即搖醒密茲契;但密茲契得悉海爾賽已收到該情報後,便未有進言,倒頭再瞓。
- ↑ 28.0 28.1 Morison 1988, pp. 322-328
- ↑ 見:Morison 1988, pp. 308-312及大黃蜂號服役日記10月25號 互聯網檔案館嘅歸檔,歸檔日期2009年6月18號,.大黃蜂號服役日記10月26號 互聯網檔案館嘅歸檔,歸檔日期2009年6月18號,.。第一分隊分別喺25號10點30分及12點48分派飛機攻擊粟田艦隊,其時粟田已開始向北撤退,兩波飛機雖找到粟田艦隊,但攻擊收效甚微;反而係第七艦隊嘅護航航空母艦攻擊成功,分別喺中午擊傷咗長門號及旗艦利根號;第一分隊再於26號早上6點、8點27分及12點35分派三波飛機追擊,幾乎冇擊傷任何日艦。
- ↑ Morison 1988, p. 329
- ↑ Morison 1988, pp. 310-311
- ↑ Morison 1988, p. 342
- ↑ Morison 1988, p. 348
- ↑ Morison 1988, p. 349
- ↑ 35.0 35.1 35.2 第38特遣艦隊行動-雷伊泰灣-11月
- ↑ Morison 1988, p. 356
- ↑ 37.0 37.1 Morison 1988, pp. 358-359
- ↑ 第58特遣艦隊行動-冰山行動-至1945年4月7號此時第一分隊由約瑟•克拉克(Joseph J. Clark)少將指揮,有旗艦大黃蜂號、胡蜂號、班寧頓號及貝勞森林號;第二分隊由戴維森指揮,有旗艦富蘭克林號、蘭道夫號及聖哈辛托號;第三分隊由薛曼指揮,有旗艦艾塞克斯號、碉堡山號(艦隊旗艦)、科本斯號及卡伯特號。蘭道夫號喺3月11號於港內被自殺飛機攻擊受創,要到4月7號才啟程往會合艦隊。由於第二及第四分隊屢屢受創,使艦隻喺作戰期間有多次轉移,編制並唔持續完整。
- ↑ Morison 1988, pp. 94-95
- ↑ Morison 1988, pp. 94-97
- ↑ Morison 1988, pp. 97-100
- ↑ Morison 1988, pp. 101-102
- ↑ Morison 1988, pp. 196-197日軍飛機數量出自日方數據,而美軍僅可估計擊落數量。
- ↑ Morison 1988, pp. 200, 203
- ↑ 45.0 45.1 Morison 1988, p. 203
- ↑ Morison 1988, p. 205
- ↑ Morison 1988, pp. 205-209由於攻擊機隊甚多,美軍飛機無法妥善協調攻擊,引起頗多混亂,故此難以確認何者成功命中大同號,亦無法確定大同號共命中多少炸彈及魚雷;美軍亦誤認矢矧號為同級艦阿賀野號;而矢矧號最終身中12枚炸彈及七枚魚雷方告沉沒。整日美軍嘅攻擊機隊共有386架,第一分隊佔113架;第三分隊167架;第四分隊106架。
- ↑ 第58特遣艦隊行動-冰山行動-1945年4月8號至5月28號
- ↑ Morison 1988, pp. 209-211
- ↑ Morison 1988, pp. 221-230
- ↑ Morison 1988, p. 248
- ↑ 〈見無畏號博物館展覽:海軍航空100周年紀念〉。原著喺2011年7月19號歸檔。喺2013年7月22號搵到。
- ↑ 53.00 53.01 53.02 53.03 53.04 53.05 53.06 53.07 53.08 53.09 53.10 53.11 53.12 53.13 53.14 53.15 53.16 53.17 53.18 53.19 無畏號航空母艦1953年後搭載嘅航空團列表
- ↑ 1963年無畏號年刊(Cruise book):119頁至123頁
- ↑ 1963年無畏號年刊(Cruise book):124頁及127頁
- ↑ 1963年無畏號年刊(Cruise book):136頁及138頁
- ↑ 1963年無畏號年刊(Cruise book):142頁及144頁
- ↑ 1963年無畏號年刊(Cruise book):148頁 互聯網檔案館嘅歸檔,歸檔日期2020年6月5號,.及151頁
- ↑ 1963年無畏號年刊(Cruise book):152頁、154頁及159頁
- ↑ 1963年無畏號年刊(Cruise book):160頁、162頁及164頁
- ↑ 1963年無畏號年刊(Cruise book):168頁、[ http://navysite.de/cruisebooks/cv11-63/165.htm 169頁]、170頁及de/cruisebooks/cv11-63/172.htm 176頁
- ↑ 1963年無畏號年刊(Cruise book):178頁、[ http://navysite.de/cruisebooks/cv11-63/176.htm 180頁]、182頁、de/cruisebooks/cv11-63/179.htm 183頁、184頁、63/181.htm 185頁[失咗效嘅鏈]及186頁
- ↑ Gurney 1985, p. 174
- ↑ Francillon 1988, p. 54
- ↑ Nichols 1987, pp. 154-155見越南空戰年表:1966年。
- ↑ 66.0 66.1 66.2 66.3 Francillon 1988, pp. 142-143見無畏號越戰巡航、喺線及戰損紀錄。
- ↑ 67.0 67.1 67.2 〈美國航空母艦越南巡航到訪港口紀錄〉。原著喺2004年9月7號歸檔。喺2013年7月22號搵到。
- ↑ Nichols 1987, pp. 155-156見越南空戰年表:1967年。
- ↑ Gurney 1985, pp. 186-187自1964年後,美軍一直喺河內市中心設下禁止攻擊區;未經美國總統批准,美軍均唔可進入攻擊。故此唔少軍事設施到一直未受損毀。
- ↑ Gurney 1985, p. 191
- ↑ Nichols 1987, pp. 156-157見越南空戰年表:1968年。
- ↑ 72.0 72.1 72.2 1945年後無畏號部署[失咗效嘅鏈]
- ↑ 〈無畏號海空暨太空博物館-歷史〉。原著喺2013年8月20號歸檔。喺2013年7月22號搵到。
- ↑ 無畏號海空暨太空博物館網頁
- ↑ 相關英文新聞嚟源見[http:/ /www.intrepidmuseum.org/intrepidmuseum/press/item.php?id=43 The Intrepid Will Be Temporarily Moved and Pier 86 Will be Reconstructed Under an Historic $55 Million-Plus Capital Expansion Plan]、.com/Story/ShowStory.aspx?StoryID=203707 Intrepid to Close for Repairs, Renovation[失咗效嘅鏈]、Briefly, Slowly, Intrepid Moves Again - New York Times及intrepid-returns/ Aircraft carrier survived wars, years of decay 互聯網檔案館嘅歸檔,歸檔日期2020年3月28號,.。
- ↑ 無畏號老兵組織-榮譽。部分榮譽參考美國海軍勛獎網頁 互聯網檔案館嘅歸檔,歸檔日期2004年10月14號,.。
參考書
[編輯]![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)
- Friedman, Norman (1983), US Aircraft Carriers: An Illustrated Design History (English), Annapolis, Maryland: Naval Institute Press, ISBN 0-87021-739-9
{{citation}}
: CS1 maint: unrecognized language (link)
- Zollo, Anthony F. (1993), USS Intrepid: CV-11, CVA-11, CVS-11: the "Fighting I" illustrated history (English), Nashville, Tennessee: Turner Publishing Company
{{citation}}
: CS1 maint: unrecognized language (link)
- Morison, Samuel Eliot (1988), History of United States naval operations in World War II (English),第7卷, Boston: Little, Brown and Company
{{citation}}
: CS1 maint: unrecognized language (link)
- Morison, Samuel Eliot (1988), History of United States naval operations in World War II (English),第8卷, Boston: Little, Brown and Company
{{citation}}
: CS1 maint: unrecognized language (link)
- Morison, Samuel Eliot (1988), History of United States naval operations in World War II (English),第12卷, Boston: Little, Brown and Company
{{citation}}
: CS1 maint: unrecognized language (link)
- Morison, Samuel Eliot (1988), History of United States naval operations in World War II (English),第13卷, Boston: Little, Brown and Company
{{citation}}
: CS1 maint: unrecognized language (link)
- Morison, Samuel Eliot (1988), History of United States naval operations in World War II (English),第14卷, Boston: Little, Brown and Company
{{citation}}
: CS1 maint: unrecognized language (link)
- Francillon, René (1988), Tonkin Gulf Yacht Club: US Carrier Operations off Vietnam (English), Annapolis, Maryland: Naval Institute Press, ISBN 0-87021-696-1
{{citation}}
: CS1 maint: unrecognized language (link)
- Nichols, John B. (1987), On Yankee Station: The Naval Air War over Vietnam (English), Annapolis, Maryland: Naval Institute Press, ISBN 978-1557504951
{{citation}}
: CS1 maint: unrecognized language (link)
- Gurney, Gene (1985), Vietnam, the war in the air (English), New York: Crown Publisher, ISBN 0-517-55350-3
{{citation}}
: CS1 maint: unrecognized language (link)