救世軍
救世軍（英文：The Salvation Army）係一間國際基督教教會同慈善組織，以軍隊形式作為架構同行政方針，致力於塑造生命、關懷社群同造就信徒。致力扶助社會上有需要嘅人；並因着神嘅愛，積極回應社會需要，向身處喺危難同天災之中受影響嘅人提供援助。
歷史
[編輯]救世軍嘅起源追溯至1865年，當時身為倫敦循道會牧師嘅卜維廉，為咗向倫敦貧民區嘅貧困、無家可歸、飢餓同被遺棄嘅人傳揚基督嘅福音，就放棄咗循道會舒適嘅講壇，進入人群之中傳道。
卜維廉原本打算安排呢啲初信嘅教徒喺各教會參與聚會，但係佢漸漸意識到當時恆常出席教會聚會嘅人並唔適應同呢班衣衫襤褸嘅窮人一齊崇拜，而呢班新信徒亦對進入教會覺得唔方便。有見及此，卜維廉就喺英國倫敦東部嘅貧民區創立東倫敦基督徒佈道團，並喺帳蓬、劇院、禮堂甚至戶外地方舉行聚會，又向嗰啲飢餓嘅、無家可歸、貧困嘅人提供幫助。1867年，卜維廉只有10名全職同工，但到咗1874年，基督徒佈道團已經有多達1,000名義工同埋42名傳道人。卜維廉被追隨者稱為「大將」，福音事工迅速由倫敦東陲擴展至鄰近城市。
「救世軍」呢個名嘅由來源於卜維廉喺1878年嘅基督徒會年報當中，讀到一句「基督徒佈道團係一支志願軍隊」。佢就將「志願軍」刪去，再寫上「救世軍」呢個詞，「救世軍」呢個名自此被採用，之後更成為整個組織嘅事工基石。信徒成為救世軍軍兵，而家亦為救世軍人。整支「軍隊」配備制服、旗幟、銅管樂隊、軍歌。
卜維廉同佢老婆以及其他軍官以福音事工同社會服務事工嘅雙重路線，竭力擴展神嘅國度。發展至今，救世軍已經遍及全球131個國家同地區，並奉耶穌嘅名喺冇分彼此嘅原之下幫助有需要嘅人。
特色
[編輯]「救世軍」喺世界各地成立，並且將工作區域稱為「軍區」，一般會堂為「部隊」，駐堂牧師為「軍官」，加入軍中嘅基督徒為「軍兵」，佈道為「戰役」，加入教會為「募兵」，信主公開嘅誓約告白為「軍兵戰條」，以軍事術語同組織來處理行政事務而成為救世軍嘅特色，享有「以愛心代替槍砲嘅軍隊」嘅美譽[1]。
工作範圍
[編輯]- 傳揚福音
- 支援困難中嘅家庭
- 關懷弱勢長者
- 啟迪兒童同青少年
- 扶持殘障人士
- 扶助邊緣社群
- 救援災民
國際使命宣言
[編輯]救世軍係一個國際性組織，係基督教普世教會之一。信仰係基於聖經，服務係源於神嘅愛，使命係傳揚耶穌基督嘅福音，並奉佢嘅名喺冇分彼此嘅原則之下去滿足有需要嘅人。
港澳軍區使命
[編輯]- 傳揚耶穌基督嘅福音，為基督贏取靈魂
- 促進同鼓勵靈命發展，讓每個人都能夠經歷整全生命
- 無分彼此噉服侍受苦嘅人，愛嗰啲唔被愛嘅，親近孤單嘅人，擁抱受排擠嘅人