安倍晉太郎
| 安倍晉太郎 | |
|---|---|
 安倍晉太郎同大仔安倍寬信（1956年） | |
 日本第112、113任外務大臣 | |
| 任期 1982年11月27號－1986年7月22號 | |
| 前任 | 櫻内義雄 |
| 繼任 | 倉成正 |
| 日本第42任通商產業大臣 | |
| 任期 1981年11月30號－1982年11月27號 | |
| 前任 | 田中六助 |
| 繼任 | 山中貞則 |
| 日本第41任内閣官房長官 | |
| 任期 1977年11月28號－1978年12月7號 | |
| 前任 | 園田直 |
| 繼任 | 田中六助 |
| 日本第46任農林大臣 | |
| 任期 1974年12月9日－1976年9月15號 | |
| 前任 | 倉石忠雄 |
| 繼任 | 大石武一 |
| 日本眾議院議員 | |
| 任期 1967年1月29號－1991年5月15號 | |
| 選區 | 山口縣第1區 |
| 任期 1958年5月23號－1963年10月23號 | |
| 選區 | 山口縣第1區 |
| 個人資料 | |
| 出世 | 1924年4月29號.svg){kind=small} 大日本帝國東京市四谷區（即依家東京都新宿區） |
| 死 | 1991年5月15號（67歲） 日本東京都文京區 |
| 政黨 | 自由民主黨 |
| 配偶 | 安倍洋子 |
| 仔女 | 安倍寬信（大仔） 安倍晉三（二仔） 岸信夫（細仔） |
| 父母 | 安倍寬（老豆） 本堂靜子（阿媽） |
| 親屬 | 岸信介（外父） 岸良子（外母） 西村正雄（同母異父細佬） 安倍昭惠（二新抱） |
| 母校 | 東京大學法學部 |
安倍晉太郎（安倍晋太郎／あべ しんたろう，1924年4月29號—1991年5月15號），日本政治人，前農林大臣、內閣官房長官、通產大臣、外務大臣、自民黨國會對策委員長、自民黨政務調査會長、自民黨總務會長、自民黨幹事長。二仔係日本首相安倍晉三。
生平
[編輯]早年
[編輯]1924年4月29號，安倍晉太郎響日本東京市四谷區（即依家東京都新宿區）出世，籍貫山口縣大津郡油谷町（即依家長門市）。安倍家族響當地都算係名門望族，係個經營釀造業（主要係釀酒同鼓油）嘅地主。
老豆安倍寬係戰前日本國會議員，唔支持東條英機，係出嗮名嘅反戰議員。阿媽靜子係陸軍大將大島義昌個孫。大伯父安倍慎太郎係個生意人，有少少錢，又做過山口縣議會議員。
不過，安倍寬同靜子響晉太郎出世85日之後就離婚，晉太郎跟住老豆返山口縣住，響嗰度渡過佢嘅童年。
佢先後入讀舊制山口中學校（即依家山口縣立山口高等學校）、第六高等學校（岡山市），1944年入讀東京帝國大學法學部（即依家東京大學法學部）。響二戰末期，佢曾經成為海軍滋賀航空預備學生、加入過神風特攻隊。
大學畢業之後，響每日新聞社做嘢。1946年，老豆安倍寬死於心肌梗塞，第二年大伯母亦都過身。1951年5月，安倍晉太郎同岸信介個女岸洋子結婚。
政治生涯
[編輯]
1956年，外父岸信介出任石橋內閣嘅外務大臣，安倍因而唔撈新聞社、改為出任外務大臣秘書官。1957年，岸信介成為首相，安倍就擔任內閣総理大臣秘書官。響1958年嘅第28屆日本眾議院議員總選舉，佢出選山口縣第一區，成功當選。雖然響1963年落選，但四年後再度當選，而且一直連任到佢死為止。
安倍響黨內原先屬於十日會（又叫岸派，以岸信介為首），響岸信介退出政壇後，十日會變成清和政策研究會，安倍亦因此加入清和研。出於背景，安倍響角福戰爭入面全力支持清和研阿頭福田赳夫。
響出任過自民黨農林、外交、國防各部會副部會長同埋農林政務次官之後，響1974年出任三木武夫內閣嘅農林大臣，係佢第一次入閣。跟住佢做自民黨國會對策委員長，1977年出任福田改造內閣嘅內閣官房長官，任內協助達成中日和平友好條約。1978年福田想要出選自民黨總裁，安倍為咗幫福田就提出希望解散眾議院，之不過響金丸信反對下就未成事。
1982年，鈴木善幸唔撈首相，因而舉行黨總裁大選，福田為咗對抗親田中嘅中曾根康弘，所以支持安倍出選。但由於黨內唔係太多人支持佢，佢最後都係輸咗。同年中曾根內閣成立，搵嚟安倍出任外務大臣。佢響外交上面都有啲成績：靠住外父岸信介響美國嘅人脈，佢聯同中曾根修復之前轉差嘅日美關係；之後又改善咗日蘇同日中關係。1986年7月，佢接替福田赳夫，出任清和研會長；同年又出任自民黨總務會長。
響當時，佢同竹下登、宮澤喜一合稱做「安竹宮」，係嗰陣日本政壇嘅三大領袖。1987年，中曾根宣佈唔做首相，諗住響呢三大領袖入面揀一個人接班。最終中曾根揀咗竹下，而唔係當時最多人支持嘅安倍：有講法係佢同竹下傾掂數，等竹下做完再畀安倍上位；亦有指係佢自己讓位畀竹下。同年11月，竹下內閣成立，而佢就出任自民黨幹事長，任內大力支持引入消費税。
1988年，佢嘅秘書捲入里庫路特醜聞，佢因而受到牽連。
病發同過身
[編輯]1989年，因為身體出問題而去到順天堂大學醫學部附屬順天堂醫院留院，之後證實係胰臟癌，5月做手術切咗胰臟、十二指腸同埋一部分嘅胃。7月出院。
1990年，安倍先後出訪蘇聯同埋美國，遊說雙方停止冷戰。同年眾議院選舉，佢派出大量清和研成員參加。同年8月病情惡化，跟住兩次入院。當二仔兼秘書安倍晉三同佢講「係癌症」嗰陣，佢嘅反應係「啊，果然係咁」。佢最後因為身體問題而取消響9月20號訪問蘇聯。
1991年4月，時任蘇聯總統戈巴卓夫訪問日本，佢出席歡迎午宴，呢次係佢最後一次公開現身。5月15號，佢響順天堂大學醫學部附屬順天堂醫院過身，終年67歲。
由於安倍當時係派系阿頭，外父又做過首相，佢又唔係冇料，臨死前佢本身係繼任首相嘅有力人選，點知就響呢個時候病死，因而畀人叫做「苦命嘅首相候補」，而佢二仔安倍晉三都覺得好遺憾[1]。
屋企
[編輯]
阿爺安倍彪助，舊姓椋木，後嚟娶咗阿嫲安倍タメ（タメ直譯係「為」），加上安倍タメ個大佬安倍慎太郎早死、冇仔女，所以彪助就成為安倍家嘅婿養子。佢哋得一個仔，就係安倍寬，安倍晉太郎個老豆。
至於安倍晉太郎個阿媽本堂靜子，佢係陸軍軍醫監本堂恒次郎大女、陸軍大將大島義昌孫女。後嚟佢改嫁，生咗另一個仔西村正雄（即安倍同母異父嘅細佬）。
攷
[編輯]- ↑ 〈野島剛／安倍晉三閃辭首相，政壇魔咒與祖孫友台情誼的傳承 - 報導者 The Reporter〉。www.twreporter.org (臺灣中文)。喺2021-11-25搵到。
 |