多角投資

呢個熒光幕顯示一隻資產嘅價嘅走勢；如果位投資者淨係攞住呢隻資產而隻資產冧，佢就咩投資就冇嗮。

多角投資（粵拼：do1 gok3 tau4 zi1；英文：diversification），又叫分散投資，係投資上成日講到嘅一個概念。多角投資最基本嗰個諗頭係做投資嗰陣，應該喺同一個 portfolio（粵拼：pou6 fou1 li4 ou4）入面有多種唔同資產，例如同時揸住啲股票又揸住啲債券而唔好淨係揸住單一一隻資產。即係要「由多個角度」嚟做投資。

多角投資最重要嘅用途，係控制投資所涉及嘅風險：簡單噉講，如果一位投資者手上淨係揸住單一一隻資產，嗰隻資產個價冧嗰時，位投資者就會損失慘重，但如果位投資者手上揸多種唔同嘅資產，就會比較難出現「啲投資一嘢就化為烏有」噉嘅情況；因為噉，多角投資被指可以大幅噉減低投資帶嚟嘅風險。仲有唔少實證研究表示，多角投資的確能夠幫投資者長遠賺到更多嘅錢。

分散方法

睇埋：投資、投資策略同投資組合

多角投資可以用好多唔同做法嚟達致「多種唔同投資」。

• 揸邊種資產：投資可以透過好多種唔同嘅資產嚟做，包括股票、債券、不動產、貴金屬同外匯... 呀噉。例子可以想像一位鍾意低風險投資嘅投資者，手上揸住債券、貴金屬同埋一定量嘅外匯... 等好幾種風險偏低嘅資產。
• 揸邊個 sector（粵拼：sek1 taa4）嘅資產：投資風險好多時都係會集中於打擊某個 sector 嘅；例如家陣政府話要立法，要限住啲人每個禮拜可以用幾多個鐘頭嚟上社交媒體，噉搞社交媒體嘅公司啲股價好有可能會受到打擊，如果一位投資者揸嘅股票冚唪唥都係社交媒體公司嘅，噉佢就會有相當嘅損失，而相比之下，如果佢揸吓社交媒體公司嘅股票同時又揸吓快餐店公司嘅股票，就冇咁易受制於呢啲專打擊某個 sector 嘅風險。
• 間公司有幾創新；好多投資者都鍾意投資落啲大、有長期噉運行嘅公司度，但另一方面事實又表明，呢啲公司好多時出唔到咩大嘅創新，重大創新成日都源於啲肯搏嘅人創業，而創新梗要重大先至會引致大幅度嘅價值提升；因為噉，有唔少投資者都會起碼留意吓個市場有冇咩有潛力嘅新創公司，並且投資錢嚟買呢啲新創公司嘅股票或者債券。一位行多角投資嘅投資者，好可能會同時揸吓啲大同穩定嘅公司嘅股票，又揸吓啲新創公司嘅股票。亦都可以睇埋價值投資呢個諗頭。
• 啲資產屬乜嘢地區：例如想像而家美國經濟衰退，噉美國相關嘅資產（例如係好多美國公司嘅股票，或者買嚟做外匯投資嘅美金）好有可能價值會跟住跌；如果有位投資者一味淨係揸呢啲基於美國嘅資產，佢就會有損失；一位比較多角化投資者，往往會（例如）手上揸啲基於美國嘅資產、又會揸啲基於日本嘅資產、又會揸啲基於歐洲嘅資產... 呀噉。
• 市場流通度：有啲資產流通度高啲，即係比較易轉做現錢，例如外匯噉；同時又有啲資產係流通度低嘅，可能要搞成幾個月先轉到做現錢，例如房地產噉；一個多角化嘅投資者，正路會揸啲流通度高嘅資產，同時又會揸住啲流通度低嘅資產。

有唔少金融同理財領域嘅研究者，都想能夠做到盡可能咁精確，即係能夠畀到啲具體嘅數值出嚟解答「要攞幾多隻唔同嘅資產、要買幾多個唔同 sector 嘅股票、或者要買幾多個唔同地區嘅外匯，先最穩陣」噉嘅問題，不過到咗 2020 年代初，呢啲問題仲係好難解答。

統計概念

• 統計相關：可以用嚟量度一個 portfolio「有幾咁多角化」，如果個 portfolio 夠嗮多角化，噉佢涉及嗰啲資本嘅價應應該唔好有太強嘅正相關。
• 標準差同變異數：都係成日畀人用嚟量度一個 portfolio「夠唔夠多角化」，夠穩陣低風險嘅投資，理應係回報數值嘅標準差同變異數都細嘅。
• 中央極限定理

睇埋

• 系統風險：專家指，多角投資難以應付系統風險，因為系統風險定義上就係會同時衝擊嗮成個系統嘅，例如係瘟疫會搞到成個經濟都受負面影響。
• 壓力測試：指分析一件金融工具（或者第啲用嚟做投資嘅資產）嗰陣，特登去睇吓件嘢喺金融危機嗰時價值會點變，即係睇吓隻投資「有幾頂得順金融危機嘅衝擊」。
• 風險管理
• 現代投資組合理論

拎

• （英文） 乜嘢係 diversification？，投資百科講多角投資嘅基礎。
• （英文） E. J. Elton and M. J. Gruber, "Risk Reduction and Portfolio Size: An Analytic Solution," Journal of Business 50 (October 1977), pp. 415-437，有實證研究指出，揸住多隻股票傾向會令投資回報率嘅標準差（SD）下跌，簡單噉講即係令到「投資賺到幾多錢」呢個數值穩定啲。