回歸法 (以色列)

  呢篇文講以色列嘅《回歸法》。想搵澳門嘅《回歸法》嘅話，請睇回歸法 (澳門)。

《回歸法》（希伯來文：חֹוק הַשְׁבוּת‎）係以色列喺1950年7月5號通過嘅一部重要法律，主要目的係方便流散海外嘅猶太人移居以色列，並獲得以色列國籍。《回歸法》嘅第一條就開門見山恁講明：「凡猶太人者，皆有以上升者（希伯來文：עלייה‎‎，指自願移居以色列嘅猶太人）之身份，移居本國之權利。」

1954年同1970年，以色列國會兩次修訂過《回歸法》，其中1970年嘅修訂案規定：猶太人嘅混血子孫（唔包括曾孫同玄孫等）、猶太人嘅配偶、猶太人嘅混血子孫嘅配偶，都可以通過《回歸法》移居以色列，並獲得以色列國籍，但係自願改信其他宗教嘅前猶太教徒就唔得。

爭議

對性小眾（LGBTQ）嘅適用

2010年6月10號，一名猶太男人同佢嘅天主教徒同性配偶抵達以色列，希望獲得以色列國籍。由於以色列未有過跨宗教同性配偶通過《回歸法》獲得以色列國籍嘅先例（但係就有過跨宗教異性配偶成功嘅先例），因此猶太男人獲得以色列國籍之後，佢嘅天主教徒配偶一直攞唔到以色列國籍。由於《回歸法》無明文規定回歸猶太人嘅配偶要係異性先攞到以色列國籍，2011年8月10號，以色列內務部決定畀個天主教徒獲得以色列國籍。