和散那

耶穌騎住驢進入耶路撒冷，群眾高呼：「和散那」

和散那（希伯來文：הושענא‎，羅馬拼音：Hoshana；古希臘文：ὡσαννά，羅馬拼音：Hosanna），天主教譯賀三納，係猶太教同基督教用語，原意係 ｢求你拯救｣、｢求你救助｣ 嘅意思，但係喺基督宗教好多時當係一種讚美用語。

意思

和散那喺希伯來文係一個合音，原句本來係 הושעה נא（Hoshiʿa na），喺詩篇118篇25節出現過，中文譯 ｢求你拯救｣、｢求你救助｣，但係因為係簡寫，喺希伯來聖經並唔會搵到和散那嘅寫法，不過爾個字喺猶太教其實一直都有用。

引伸

喺猶太教，和散那係指住棚節嘅禮儀入面一段禱文嘅回應部分，當中嘅回應正正就係 ｢求你拯救｣，而成個禮儀就叫 הושענות（Hoshanot），即係 ｢和散那｣ 嘅眾數。

喺猶太教亦都有所謂 ｢大和散那｣（הושעה רבה，Hoshana Rabba），係一個猶太節日，指住棚節嘅第七日。

早喺三世紀，基督宗教已經錯誤咁將和散那解做一種讚美用語，好多時會用喺一啲讚美詩之中，爾種理解可能源於有關棕枝主日嘅記載。根據馬太福音記載，當耶穌騎住驢進入耶路撒冷嘅時候群眾大聲呼喊：｢和散那歸於大衛嘅子孫！奉主名嚟嘅，係應當稱頌嘅！高高在上和散那！｣（爾段經文喺天主教直接擺咗喺彌撒嘅歡呼頌入面，但係喺粵文禮儀並冇賀三納嘅字眼，而係譯咗做 ｢歡呼之聲｣）。