古茲尼佐夫號航空母艦
古茲尼佐夫號航空母艦，全稱「蘇聯海軍元帥古茲尼佐夫號航空母艦」（俄文：Адмирал флота Советского Союза Кузнецов；普譯：「庫兹涅佐夫號」），係俄羅斯海軍唯一一首重服緊役嘅航空母艦，喺蘇聯時期開始建造，一開始嘅計劃暗號係「『1143.5號計劃』重型航空巡洋艦」，1983年開工建造，1991年服役，舷號063。
同之前嘅其他俄製航空母艦一樣，古茲尼佐夫號航空母艦由於注重單艦作戰能力，而兼具巡洋艦嘅武裝，就算無晒艦載機都重有相當強大嘅戰鬥力量。
簡介
[編輯]
古茲尼佐夫號嘅正式分類唔係「航空母艦」，而係「重型航空巡洋艦」（俄文：тяжёлый авианесущий крейсер），唔淨止要做載機平臺，重要有能力獨立喺達達尼爾海峽同博斯普魯斯海峽巡邏，更加要有能力支援其他船艦[1]。從蘇聯第一架航空母艦莫斯科號開始，一直到夭折嘅烏里仁諾夫斯克號計劃，蘇聯嘅航空母艦都好強調艦載火力，對地對海攻擊都主要由艦載武器（包括12支「花崗岩」長程反艦導彈）負責，而艦載機嘅配置都係以空優為首要任務。
由於技術上嘅限制，古茲尼佐夫號無裝到彈射器，而係用斜角滑跳式甲板來幫助戰機起飛。飛機利用自身嘅推力衝上滑跳式甲板，抬高起飛角度來升空。優點係起飛角度更高，爬升率更高，需要甲板人員更少，但係缺點係戰機離艦速度最高祇有120或者140公里，因此對艦載機有特別嘅設計要求：滯空速度唔可以低過時速120公里[2]。
有媒體指出：同美國嘅航空母艦相比：美國海軍注重編隊作戰，因而導致美國航空母艦嘅戰鬥力量過分依賴艦載機，防守力量就過分依賴護航艦隊，而且製造同維護成本都好高；而蘇聯海軍好強調單艦作戰能力，因此古茲尼佐夫號航空母艦本身就具有好強嘅對海、對空、反潛武裝，就算無其他軍艦護航，都重有強大嘅攻防能力，咁樣可以縮細航母編隊嘅規模，減低維護成本，亦都更適合中近海空中火力支援[3]。
2008年，俄羅斯海軍總司令维索茨基上將宣佈：俄羅斯海軍將會訂造5到6架新航空母艦[4]。
相關
[編輯]
參考
[編輯]- ↑ "A Brief Look at Russian Aircraft Carrier Development 互聯網檔案館嘅歸檔，歸檔日期2000年2月29號，.", Robin J. Lee.
- ↑ Gordon, Yefim & Davidson, Peter. 2006. "Sukhoi Su-27 Flanker", p. 54. Warbird Tech Series, vol. 42. ISBN 978-1-58007-091-1.
- ↑ 俄國“庫兹涅佐夫號”--實用的航母 互聯網檔案館嘅歸檔，歸檔日期2004年9月2號，. - 東方軍事
- ↑ 美媒体称俄库兹涅佐夫号航母已失去实用价值
