低地台巴士
閱讀設定
低地台巴士(Low floor bus),有啲公司稱之為超低地台巴士或者特低地台巴士(Super low floor bus),係指一啲門位同埋車廂通道冇梯級嘅巴士。呢啲巴士比門位有梯級嘅巴士更方便乘客上落,尤其係老人家、推手推車同埋坐輪椅嘅乘客。
低地台巴士自1990年代開始喺一啲地方,包括歐美流行起嚟,多間巴士製造商都整出自己嘅低地台巴士。以香港為例,香港嘅專利巴士公司自1996年開始就引入低地台巴士[1][2]。
設計
[編輯]低地台巴士可以係成架車嘅車廂都係低地台,即係喺車廂由頭行到尾都冇梯級,亦有啲只係得車廂前部分係低地台(即係「低入口」設計),差唔多到車尾位置有梯級,而梯級後面嘅地台就升高咗。引擎擺位方面,唔少低地台巴士嘅引擎都擺喺巴士後面,但有啲巴士製造商(包括Van Hool同埋富豪)研製出引擎擺喺車軸之間而偏向左邊嘅低地台巴士。
低地台巴士門位嘅地台高度可以低至350毫米以下。而低地台巴士通常亦設有可以控制升降嘅懸掛系統,當有需要嗰時,司機可以將架巴士降低,令巴士地台更加接近行人路面。
為方便坐輪椅嘅人上落,低地台巴士嘅門位可以整埋斜板,車廂內亦可以留埋位去擺輪椅。
現時市場上已經有低地台設計嘅小巴、單層巴士、掛接巴士同埋雙層巴士等等。
參考
[編輯]![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)