歸納
歸納(粵讀:gwai1 naap6;英文 Induction),舊亦叫內籀(籀讀就),理論學名。由特殊事例,推見普遍原理嘅方法。例如,由某幾隻金屬導熱,推論到所有金屬都係導熱,咁就叫歸納。因爲係方法,亦叫歸納法。
歸納有好多種,如數學歸納。
定義
[編輯]歸納係指緊由啲個別嘅事例嗰度去推斷出一啲普遍嘅原理[1],係科學嘅基礎。
歸納問題
[編輯]歸納相對於數學家成日用、可以得出肯定結論嘅思考方式唔同-歸納唔會保證到個結論係一定真確,但會靠住有大量嘅事例嚟去提升自己個論證嘅強度。好似係以下嘅論證噉樣:
- 前提 1:所有人類嘅壽命都係有限嘅;
- 前提 2:蘇格拉底係個人;
- 結論:蘇格拉底嘅壽命係有限嘅。
呢個係一個典型嘅演繹推理論證:雖然話係有得詏佢嗰兩句前提到底係咪真,但事實係如果佢嗰兩句前提係成立嘅,噉佢個結論邏輯上都一定會成立-喺一個有效(valid)嘅演繹推理論證入面,前提嘅真確性會保證到個結論嘅真確性。呢種思考方式喺數學上成日都會用嚟證明(prove)一啲定理。同呢種諗嘢方式唔同,响一個歸納性質嘅論證入面,前提嘅真確性冇辦法保證到結論嘅真確性,淨係可以靠大量嘅事例嚟提升個論證嘅強度,好似係以下呢個論證噉[2]:
- 前提:我之前見過嘅天鵝都係白色嘅:
- 結論:呢個世界上所有天鵝都係白色嘅。
呢個係個典型嘅歸納論證:就算個前提係真,都保證唔到個結論係真-前提入面嗰個「我」並冇見過嗮世界上所有嘅天鵝,而事實係世界上有黑天鵝,個觀察者會噉諗只不過係因為佢咁啱未見過黑天鵝;如果個觀察者想佢個論證強啲嘅話,佢就一啲要去見多啲天鵝:如果佢睇勻嗮全歐洲嘅天鵝,呢個論證嘅說服力會比較強;相反,如果佢淨係見過英國嘅天鵝,噉呢個論證嘅說服力會渣好多[2]。
科學應用
[編輯]「科學方法用嘅係歸納」呢點對科學家嘅思考方式有重大影響:喺驗證「萬有引力係真嘅」呢句說話嗰陣,牛頓觀察到一個蘋果由樹上面跌落嚟(一個個別事例),佢亦都觀察到好多嘢都係跟呢條規則(好多個個別事例),但佢始終都冇辦法去真係「證明」呢個宇宙入面真係所有嘢都有萬有引力(普遍原理)-因為可能喺宇宙嘅某啲黑暗角落度會有啲冇引力嘅嘢,只係人類仲未搵到。科學家靠嘅係實驗同觀察,佢哋冇辦法好似數學家噉真係吓吓都證明佢哋講嘅嘢,只可以靠住重複做實驗同觀察嚟加強自己嘅論證,但始終係冇方法排除一個可能性:呢個宇宙入面可能真係有啲嘢係唔跟佢哋諗出嚟嗰啲定律嘅,只係佢哋未搵到呢啲嘢[3][4]。
因為噉,喺正式嘅科學文獻入面,科學家正路嚟講係唔會話自己「用手上嘅實驗或者觀察嚟證明咗乜嘢乜嘢理論」,頂櫳淨係會話「觀察同實驗結果撐嗰個理論」,而且佢哋仲會好積極噉去搵新數據,睇吓呢啲佢哋之前未見過嘅數據會唔會推翻舊嘅理論。如果會嘅話,佢哋就會開始諗新理論,或者睇吓點樣將舊嗰個理論改吓等佢可以同新數據夾得埋,令個理論成為一個更加貼近現實嘅模型[2]。
![](http://upload.wikimedia.org/wikipedia/commons/thumb/b/b0/Univerza1.jpg/500px-Univerza1.jpg)
睇埋
[編輯]引述
[編輯]- ↑ Deductive and Inductive Arguments.
- ↑ 2.0 2.1 2.2 Heit, E. (2000). Properties of inductive reasoning. Psychonomic Bulletin & Review, 7(4), 569-592.
- ↑ Sextus Empiricus, Outlines of Pyrrhonism. Trans. R.G. Bury, Harvard University Press, Cambridge, Massachusetts, 1933, p. 283.
- ↑ Arthur, W. B. (1994). Inductive reasoning and bounded rationality. The American economic review, 84(2), 406-411.