陳水扁

  提示：呢篇文講嘅唔係陳亞扁。

陳水扁（1950年10月12號—），以前叫阿扁，綽號勇哥，（閩南話：阿扁仔，臺羅：A-pínn-á），台灣台南縣官田鄉人。2000年當選中華民國第十任總統，係中華民國第二個民選嘅總統，又係第一個唔係中國國民黨黨籍嘅總統；2004年連任。之前做過台北市議員、立法委員、台北市市長同民主進步黨主席。

陳水扁做總統期間一直好多爭議，例如佢喺兩岸關係上嘅主張、319槍擊案、國務機要費官司，同埋佢家庭成員涉及好多案件，到而家重未解決。

卸任總統後，佢俾台灣台北地方法院以涉嫌貪污、洗錢等重罪為由收押，成為中華民國史上首位被收押嘅前總統。2009年9月11號，一審宣判無期徒刑（成世坐監），罰款兩億新台幣，同時褫奪公權終身。佢隨即上訴，但佢喺「四大弊案」之中龍潭購地案嘅控罪打唔甩，要坐11年監，並喺2010年12月2號收監，成為首位坐監嘅前總統。

簡歷

• 1950年喺台南縣官田鄉出世。原名「陳水遍」，喺申報戶口嗰陣用閩南話發音俾人以為係國語嘅「陳水扁」。
• 1969年喺台南一中畢咗業之後，考入國立台灣大學商學系，之後休學，後來考入台灣大學法律系。
• 1973年讀緊台灣大學嗰陣，攞到農漁會獎學金，以第一名考到中華民國律師資格，係嗰時全國最後生嘅律師。
• 1974年開始做執業律師，重喺台灣大學法律系第一名畢業。
• 1975年同吳淑珍結婚。
• 1976年因為專攻海商法俾華夏海商請咗做法事務所律師。重幫長榮海運做法律顧問。

從政

2000年總統大選時國民黨分裂，國民黨提名時任副總統嘅連戰參選，前台灣省長宋楚瑜退黨參選。選舉過程中，宋楚瑜嘅選情原本睇好，但係國民黨議員揭發興票案醜聞之後急轉直下，選舉結果最終陳水扁以 39.3% 嘅得票率當選總統，多過第二嘅宋楚瑜三十萬票。陳水扁喺5月20號就任第十任總統，中華民國實現首次政黨輪替及政權和平轉移。佢喺就職演說中提出「四不一沒有」。包括任內唔會宣布台灣獨立，唔會將兩國論寫入憲法同埋唔會廢除國統綱領。但係陳水扁喺2006年宣布中止國統會運作，令北京強烈不滿。

2004年總統大選前一日，陳水扁同副總統呂秀蓮喺拉票期間俾人槍擊受傷，是為三一九槍擊案。佢以些微票數贏出大選，喺爭議聲中成功連任。連任之後，陳水扁支持度都係繼續跌，2006年佢更俾前民進黨主席施明德發動「倒扁」運動要佢落台，但陳水扁都係做晒成個總統任期。

前任： 黃大洲	台北市長 1994年12月25日—1998年12月25日	繼任： 馬英九
前任： 李登輝	中華民國總統 2000年5月20日—2008年5月20日	繼任： 馬英九
前任： 謝長廷	民主進步黨主席 黨章規定 2000年5月20日—2008年5月20日	繼任： 蔡英文
前任： 謝長廷	民主進步黨主席 2002年5月20日—2004年12月11日	繼任： 柯建銘（代理）
前任： 蔡同榮（代理）	民主進步黨主席 2007年10月15日—2008年1月12日	繼任： 代理：謝長廷 正任：蔡英文

出面網頁

• YouTube上面嘅 Human Rights Action Center - Free Chen Shui-Bian