Ray Charles

Ray Charles boán-liân (2003)

Ray Charles (pún-miâ: Ray Charles Robinson; 1930 nî 9-goe̍h 23 – 2004 nî 6-goe̍h 10) sī Bí-kok 1-ūi lêng-hûn im-ga̍k koa-chhiú kiam kǹg-khîm-ka. I éng-hióng Rhythm kap Blues (R&B) ê hoat-tián.

I chhut-seⁿ tī Bí-kok Georgia-chiu hit-tah ê Albany-chhī. 5-hòe chó-iū ba̍k-chiu tō khai-sí hoán chheⁿ-mê, kàu kah 7-hòe ê sî-chūn í-keng oân-choân khoàⁿ bô. Chìn-chêng i chhin-ba̍k khoàⁿ-kìⁿ i ê sió-tī put-hēng im sí tī e̍k-keng-á lāi. I chhut-gōa khì kàu Florida-chiu ê 1 keng bông-jîn ha̍k-hāu chiū-ha̍k, tī hia tû-liáu o̍h ē-hiáu tha̍k tiám-jī (Braille) í-gōa, mā o̍h tio̍h phó·-khek, chàu-ga̍k ê kang-hu. Tng hit ê sî-kî i ê lāu-bú put-hēng lâi kòe-sin.

Lī-khui ha̍k-hāu liáu-āu, i khai-sí tī hit chiu kòe gē-jîn ê seng-oa̍h, 1947 nî poaⁿ khì tī sai-pak-hōaⁿ ê Seattle-chhī. Tī hia i khai-sí lo̍k-im chhut khek-poâⁿ. I 1951 nî hit siú "Baby, Let Me Hold Your Hand" sī i thâu-1-siú sî-kiâⁿ--khí-lâi ê liû-hêng-koa. Ūi beh hām phah bo̍k-sèng (kûn-kek) ê 1-ūi Sugar Ray Robinson ū khu-pia̍t, i choâⁿ-á kā i ê miâ sok-té pìⁿ Ray Charles.

I chá-kî chhiùⁿ-koa, tôaⁿ khîm ê hong-keh siū-tio̍h Nat King Cole, Charles Brown 2 ūi im-ga̍k-ka éng-hióng. Hit ê sî-kî ê khek-pôaⁿ ē-sái kóng sī chioh in ê bô·-á ê chhòng-chok. Chóng--sī, bô jōa kú Ray Charles ê im-ga̍k khai-sí tián chhut i kò-jîn ê châi-tiāu. I hām hit tong-sî tng sî-kiâⁿ ê Lowell Fulson chiūⁿ-lō· sûn-hôe ián-chhiùⁿ koh hām Guitar Slim, Ruth Brown téng-jîn tàu-tīn ha̍p-chok. I āu--lâi hām Atlantic Records chit keng tōa kong-si chhiam-iok. Chit ê sî-kî i hèng chhì sin mi̍h, pí-lūn kóng chioh Hok-im koa-iâu ê khek lâi tàu hui-chong-kàu sèng-chit ê koa-sû, sūn-sòa ke-thiⁿ kóa jazz ê khì-bī. Chóng--sī iā jiám tio̍h cheng-gī.

Chok-phín

• 1957: Ray Charles (album) (or, Halleluja I Love Her So)
• 1957: The Great Ray Charles
• 1957: Yes Indeed!
• 1958: Ray Charles at Newport
• 1958: Soul Brothers (& Milt Jackson)
• 1958: Soul Meeting (& Milt Jackson)
• 1959: What'd I Say
• 1959: The Genius of Ray Charles
• 1960: In Person
• 1960: Genius Hits the Road
• 1960: Dedicated to You
• 1961: Ray Charles and Betty Carter
• 1961: Genius + Soul = Jazz
• 1962: Modern Sounds In Country and Western Music