Joanneskerke (Krunehe)
De Joanneskerke is de ouwe durpskerke van Krunehe. De kerke is gebouwd as kruuskerke, mae in de tied van de reformaotie is het koor gesloopt. Opvallend bin de gebrandschilde reamen, die 'erinneren an de Waetersnoôdramp van 1953. In de raemen stit de daotum 1 feberwari 1953 en teksten uut het Marcus evanhelie: Marcus 4 vers 38 "Meester bekommert het U niet dat wij vergaan" en Marcus 4 vers 40 "Wat zijt gij vreesachtig. Hoe hebt gij geen geloof?". In die daegen stong het waeter 1,85 meter 'oôge in het gebouw. Vooran bin te ziejene een preekstoel en een doôpvont. Het achtkantige doôpvont eit de gebeitelde tekst: "Laat de kinderkens tot mij komen". De preekstoel mee boogpanelen draegt het jaertal 159 en rust op een zogenaemde kariatide, een draegend element in de vurm van een vrouwe. Op het zwaere eiken klankbord boven de preekstoel stit een tekst uut Ezechiël 3 vers 17: "MENSCHENKINT IC HEBBE U TEN WACHTER GHESETTET OVER HET HUYS ISRAELS GHIJ SULT UYT MIJN MONT HET WOORT HOOREN ENDE HAER VAN MIJNENTWEGEN WAERSCHUWEN".
_-_Kruiningen_-_20128093_-_RCE.jpg)
In de kerke is een arduinstenen graftombe van ridder Aernoud van Cruninghe te vinden, de leste afstammeling van de 'eren van Cruninghe van de tak Voorhoute, die in 1561 doôd ging. Op de dekplaete is een liggende ridder gebeeldouwd mee leeuw, handschoenen, helm en aan ielke kant vier waepens; lienks de femiliewaepens van um z'n vaoder: Cruninghe, Voorhoute, Reimerwaal en Sickele en rechts die van um z'n moewder: Cruninghe, Gruythuyse, Ongnies en Rubempré. Ongeran de tombe stit een twee-regelig gedicht: "Die met Paulo wetteliken heeft gestreden, Wert van Christo gecront als hi is overleden", wat ontleed is aan de tweede brief van Paulus aan Timotheüs.(2 Tim 4:7 en 8).
De kerke eit vuufonderd zitplekken. In Krunehe bin meer kerken te vinden zoas een Hersteld Hervormde Kerke en een Grifformeêrde Gemeênte in Nederland.
Toren
bewerkD'n toren komt uut de 14e eêuw. In de toren hangt een groôte en een kleinere klokke. Oorspronkelijk hing er de groôte klokke, gemaekt in 1490 deu Simon Wagheven, wivan het randschrift as volgt ging: "Maria heet ik en ben ghegoten van Simon Wagheven te Mechelen binnen `t jaar 1490. Lof heb God uit rechter minne". Vadder stond er op de klok het Mechelse waepen, een ofbeelding van St. Joris en de draek en van Maria mee het kind. Omdat er een schoor inzat wier de klokke in 1914 'ergoten deu de Gebroeders van Bergen uut Midwolde, en toe stong er op de klokke: "Hergoten door de Gebr. van Bergen te Midwolde 1914". De kleine klokke 'ao het opschrift: "Zeelandorum 1777, Joh. la Port fecit Medioburgh".
In de oôrlog van 1940-1945 wieren de tweê klokken weggehaeld, allêen de kleine klokke wier nae de bevrijding teruggevonden en hangt weer op z'n plekke. De firma Van Bergen uut Heiligerlee leverde in 1948 de nieuwe groôte klokke van 800 kg, weerop het volgende randschrift stit: "Zij die mij voorging werd geveld - door ruw geweld en, zoals zij, ik in haar plaats - Gods goedheid meld. 19 Heiligerlee - 48 - van Bergen".
Tot nae de oorlog is d'n toren gebruukt om brandweêrslangen op te 'angen. In 1956 en 1992 is d'n toren gerestaureerd.
Urgel
bewerkDe kerke ei ok 'n urgel.
De dispositie van het Van Vulpen-Urgel (1958):
- Quintadeen. 16 voet
- Prestant. 8 voet
- Roerfluit. 8 voet
- Octaaf. 4 voet
- Gedekte Fluit. 4 voet
- Octaaf. 2 voet
- Mixtuur. IV-V sterk
- Trompet 8 voet