Perindöllizien haukkujien mečästyskoirien suvaittavuon vähenendy jatkuu.
Ezimerkikse karjalankondiikoiran registriiruičendat ollah romahtettuhes vuvves. Karjalankondiikoirua registriiruittih mulloi vaigu läs 350, mi on piäl 40 prosentua vähembi ennemullostu.
Suomen Kennelliittoh mulloi registriiruittih nenga 800 suomenajokoirua, mi on läs 15 prosentua vähembi, migu iellizenny vuon. Vie nelli vuottu tagaperin ajokoirua registriiruittih piäl 1 200.
Jämtlandanpystykorvan, suomenpystykorvan da harmuan norvegienhirvikoiran suvaittavus sežo on vähennyh selgiehgi.
Labrador-retriverua suvaijah äijäl iellehgi
Labrador-retriveru on olluh jo 15 vuottu Suomen suvaittavin koirurodu.
Labrador-retriverua registriiruittih mennyt vuon läs 2 300. Toizel sijal registriiruičendois on kulduretriveru da kolmandel suomenlapinkoiru.
Kahtenkymmenen enämbäl registriiruitun rovun joukos suvaittavuttu on kazvatannuh enne kaikkie lyhytkarvaine mägrykoiru.
Kennelliiton registrah ilmoitettih läs 40 300 koirua vuvvennu 2024, konzu iellizenny vuon registriiruičendua oli 43 800.
– Registriiruičendoin miäry nygöi on vähennyh vuozituhanden vaihton luguloissah. Trendu on olluh yhtenjyttyine sežo toizisgi Pohjazis mualois, sanou Kennelliiton toimindanjohtai Pirjo Onza.
Kennelliittoh registriiruittuloin koirien miäry Suomes yhtelläh on iellehgi kanzoinvälizesti kačotunnu ylen korgei.