REPLEKTIBONG SANAYSAY

ANG KAHULUGAN NG REPLEKTIBONG SANAYSAY

Ang pagsulat ng Replektibong sanaysay ay makatutulong upang higit pang maunawaan ng isang tao ang
kanyang sariling damdamin. Bago mo pag-aralan ang pagsulat ng replektibong sanaysay, iyo munang pag-aralan
at unawain ang kahulugan ng Replektibong Sanaysay. Ano nga ba ang isang Replektibong Sanaysay?

● Ang Replektibong Sanaysay ay isang uri ng sulating pampanitikan nasa uring tuluyan o prosa. Ito ay
nangangailangan ng sariling opinyon o perspektibo tungkol sa isang paksa. Dahil hindi ito pormal na sulatin,
maaaring maging masining ang tagasulat sa kanyang mga pananaw at damdamin.
● Maaaring makasulat nito hinggil sa isang itinakdang babasahin, lektyur o di kaya mga karanasan ng isang tao.
Ang pagsulat ng isang repleksyong papel ay nakabatay sa reaksyon, damdamin o pagsusuri ng isang tao batay
sa kanyang karanasan.
● Bagamat ito ay maaaring maging isang impormal na sanaysay, nangangailangan parin ito ng Introduksyon,
Katawang malinaw at lohikal, at Kongklusyon.
● Tandaan mo na sa isang replektibong sanaysay, madalas na ginagamit ang mga unang panauhan sapagkat
nabanggit nga kanina na ito ay nakabatay sa sariling kaisipan, damdamin at karanasan ng isang tao.
Nakatutulong ang pagsusulat ng isang Replektibong Sanaysay sa kakayahan ng isang indibidwal na
makapagmuni-muni.

ANG PAGSULAT NG REPLEKTIBONG SANAYSAY

Ang sumusunod ay inilahad ni Maggie Mertens.

● Mga Iniisip at Reaksyon

- Sa pagsulat ng isang Replektibong Sanaysay, ilahad mo kung ano ang iyong saloobin o reaksyon sa iyong
nabasa o karanasan. Ipaliwanag mo lamang nang malinaw ang iyong damdamin hinggil dito. Huwag maglalahad
ng mga ideya na wala namang kaugnayan sa iyong nabasa o karanasan.

● Buod
- Hindi ito isang simpleng buod lang. Ang Replektibong Sanaysay ay isang malayang daloy ng mga ideya at
iniisip mo. Bagamat ito ay isang impormal na sulatin, hindi pa rin angkop dito ang paggamit ng mga impormal na
wika.

● Organisasyon
- Gaya nga ng nabanggit kanina sa unang bahagi ng pagtalakay ng paksang ito, nangangailangan parin itong
maisaayos nang wasto tulad ng ibang mga pormal na sanaysay. Ang isang replektibong sanaysay ay higit pa ring
mapabubuti kung ito ay mayroong Introduksyon, Katawan at maging Kongklusyon.

MGA GABAY SA PAGSULAT NG REPLEKTIBONG SANAYSAY

1. Isa hanggang dalawang pahina lamang.

- Hindi naman masama kung aabot ito ng tatlong pahina. Ngunit kung ang iyong isinusulat na
Replektibong Sanaysay ay lalampas sa tatlong pahina, ito ay labis na.
2. Huwag magpaligoy-ligoy.
- Dahil sa hindi mahaba ang isang Replektibong Sanaysay, inaasahang hindi na magpapaligoy-ligoy pa ang
isang manunulat. Mainam na ilahad na lamang nang direkta kung ano ang nais na ipahiwatig.
3. Maaaring gumamit ng wikang pormal o kumbersasyunal.
- Tandaan lamang na sa pagsusulat ng isang Replektibong Sanaysay, kailangang ang wikang iyong
gagamitin ay wikang madaling maunawaan sa kabila ng pagiging pormal at kompleks ng anyo nito
4. Magbigay ng halimbawa.
- Malaking tulong ang pagbibigay ng halimbawa o aplikasyon ng mga konseptong natutunan mula sa mga
karanasan. Basta’t tatandaan mo lamang na ang halimbawang iyong gagamitin ay mayroon pa ring
kaugnayan sa paksa ng iyong isinusulat.
5. Maaaring simple lang ang wika o tono.
- Sa pagsusulat ng isang replektibong sanaysay, maaaring simple lamang ang wika at nagpapatawa o
magaan ang tono, ngunit hindi ito nangangahulugang hindi ito magiging seryoso.
6. Isaalang-alang ang mga tuntunin sa gramatika, baybay at pagbabantas.
- Sa anumang uri ng akademikong sulatin, kailangan maging maingat pa rin sa paggamit ng wika.
Kailangang siguraduhing iwasan ang pagkakaroon ng mga pagkakamali sa gramatika at maging sa
pagbabaybay ng mga salita. Nakababawas kasi ito sa pagiging epektibo ng isang sulatin.

7. Banggitin ang mga sanggunian.

- Kung gagamit ng mga impormasyong galing sa website, libro at iba pa, siguraduhing mababanggit sa
papel ang mga pinaghanguan ng mga ito. Maaaring sa huling bahagi ng sulatin o sa mismong katawan
nito.

LAKBAY SANAYSAY
ANO ANG LAKBAY SANAYSAY?

 Ang lakbay sanaysay ay isang uri ng akademikong sulatin na tumatalakay sa mga natuklasan ng isang
manunulat sa kanyang kinalulugaran o paglalakbay.
 Ang isang lakbay sanaysay ay maaaring nasa anyong Replektibo o Impormatibo. Replektibo ito kung
inilalahad ng manunulat ang kanyang damdamin o mga karanasan tungkol sa kanyang paglalakbay.
Impormatibo naman ito kung naglalahad siya ng mga impormasyon tungkol sa kanyang paglalakbay
gaya na lamang ng kanyang ginastos sa paglalakbay, pamasahe, magagandang tanawin na maaaring
puntahan ng mga mambabasa at iba pa.
 Maaaring nasa anyong Travelogue o di kaya ay Travel Blogging ang isang lakbay sanaysay na kung
saan ay ipinakikita o dinodokumento ang iba’t ibang lugar na binisita o mga karanasan ng isang
manunulat sa kanyang paglalakbay.
 Kasabay ng paglaganap ng social media, lumaganap na rin ang travel blogging. Sa pamamagitan ng
travel blog, nabibigyan rin ng ideya sa posibleng iteneraryo o iskedyul ng pamamasyal sa bawat araw
ng byahe at mga posibleng magiging gasto sa bawat aktibidad. Malaki ang maitutulong ng mga travel
blog para sa mga taong nagpaplano pa lamang ng kanilang bakasyon.
 Ang layunin ng pagsulat tungkol sa isang paglalakbay ay makapagbigay ng malalim na insight at
kakaibang anggulo tungkol sa isang destinasyon. Sa ganitong uri ng pagsulat, kailangang mahikayat
ang mga mambabasa na danasin at bisitahin din ang lugar na iyong isinulat.

MGA PAYO SA EPEKTIBONG PAGSUSULAT NG LAKBAY SANAYSAY

1. Magsaliksik.

Magsaliksik at magbasa nang malalim tungkol sa iyong destinasyon bago dumating sa lugar.
Huwag lamang magpakupot sa mga guidebook, bagkus ay unawain ang kasaysayan, ekonomiya,
kultura, agrikultura, pagkain, relihiyon at mga paniniwala ng isang lugar. Sa pamamagitan nito, mas
mauunawaan mo ang mga kakaibang bahagi ng kultura na praktis at mga konteksto nito habang
naglalakbay.

2. Mag-isip nang labas pa sa ordinaryo.

 Kadalasang makikita sa mga guidebook ang listahan ng mga hotel, kainan na pwede mong
puntahan o mga aktibidad na pwede mong gawin. Ngunit bilang isang mananaysay, kailangan mong
magpakita ng mas malalim na anggulong hindi basta namamalas ng mata. Kailangan mong
magkwento ng karanasan, humanap ng malalim na kahulugan at mailarawan ang lahat ng ito sa
maikling paraan.

3. Maging isang manunulat.

Magkaiba ang manunulat ng paglalakbay sa isang turista. Nasa bakasyon ang isang turista
habang may mas malalim na tungkulin at layunin sa paglalakbay ang isang manunulat para sa
epektibong pagsulat, makabubuti ang pagkuha ng mga larawan at mga tala sa mga bagay na
naoobserbahan at naririnig mo.

MGA GABAY SA PAGSULAT NG LAKBAY SANAYSAY

1. Hindi kailangang pumunta sa ibang bansa o malayong lugar upang makahanap ng paksang
isusulat. Kung nasa probinsya ka, maaaring humanap ng isang sakahan o linangan na
nagmamanupaktyur ng gatas o keso. Kung urban, maaari mong maging karanasan ang ingay ng
Maynila sa gabi o kung may mga espesyal na pagdiriwang.

2. Huwag piliting pasyalan ang napakaraming lugar sa iilang araw lamang. Kailangang malalim at
malawak ang pagdanas sa karanasan sa isang lugar upang maging malalim din ang insight na
maaaring ibigay sa sanaysay.

3. Ipakita ang kwentong-buhay ng tao sa iyong sanaysay. Malaki ang adbentahe mo kung
nauunawaan mo at nagagamit ang wika ng lokalidad, ngunit kung hindi, maaari kang makipagkaibigan
sa isang lokal na nakakaunawa ng Filipino o Ingles upang lubos mong maunawaan ang paraan ng
pamumuhay sa isang lugar.

4. Huwag magpakupot sa mga normal na atraksyon at pasyalan. Ang simpleng paglalarawan ay

nagbibigay ng mabigat na insight basta’t nasasapol ng isang manunulat ang tamang anggulo. Huwag
piliting isulat ang mga madalas nang makikita sa postcard ng mga turista.

5. Hindi lahat ng paglalakbay ay positibo at puno ng kaligayahan. Kung habang naglalakbay ay

nabiktima ka ng pagnanakaw o panloloko, isulat mo kung ano ang naramdaman mo tungkol dito.

6. Alamin mo ang mga natatanging pagkain na sa lugar lamang na binisita matitikman at pag-
aralang lutuin ito. Maaaring magpaturo sa mga lokal na makikilala sa lugar para sa layuning ito.

7. Sa halip na mga popular at malalaking katedral, bisitahin ang maliliit na pook-sambahan ng

mga taong hindi gaanong napupuntahan at isulat ang kapayakan ng pananampalataya rito. Ito
ang hindi madalas nababasa sa mga aklat at iba pang babasahin, kung kaya ito ang magandang
maging paksa ng isang Lakbay Sanaysay.

8. Isulat ang karanasan at personal na repleksyon sa paglalakbay. Mahalagang tandaan na ang

isang lakbay-sanaysay ay nakabatay sa iyong sariling karanasan kung gayon, kailangang maging tapat
sa pagsusulat at isulat lamang kung ano ba talaga ang iyong naramdaman o mga naranasan nang
isagawa mo ang iyong paglalakbay.

LARAWANG SANAYSAY
ANO ANG PICTORIAL ESSAY?

● Ang Pictorial Essay ay isang sining na nagpapahayag ng kahulugan sa pamamagitan ng mga larawan at kapsyon.
 ● Sa isang Pictorial Essay, ang bawat larawan ay sinasamahan ng mga kapsyon na may iisang tema lamang na
tinutukoy

KALIKASAN NG PICTORIAL ESSAY

May tatlong bagay lamang na dapat tandaan bilang kalikasan ng Pictorial Essay. Upang mas mabillis mo itong
maalala, tatawagin natin itong 3 Ps.

1. Pamagat

Mahalaga na ang isang Pictorial Essay ay magkaroon ng pamagat. Babasahin hanggang sa dulo ang isang Pictorial
Essay kung mayroon itong maganda at kaakit-akit na pamagat. Isang paraan ito upang makuha mo ang atensyon ng iyong
mga mambabasa.

2. Pokus sa Tema

Dapat tandaan mo rin na ang mga larawan ay dapat magkakaugnay-ugnay sa bawat isa kung maglalahad ka ng
maraming larawan. Kailangang hindi nalalayo sa tema o paksa ang mga larawang nakapaloob sa isang Pictorial Essay.

3. Personal
Isa rin sa mga dapat mong tandaan at itatak sa iyong isip na ang Pictorial Essay ay isang personal na gawain.
Nangangahulugan lamang ito na ang mga larawang iyong ilalagay ay sarili mong kuha. Hindi lamang ang mga larawan
kundi maging ang kapsyon nito. Nagiging epektibo ang pagpapahatid ng mensahe kung sarili mong gawa ang iyong
Pictorial Essay.

Ngayon, sino nga ba ang mga mga taong nagsasagawa ng isang Pictorial essay? Ang isang pictorial essay ay maaaring
gawin ng kahit na sino, ngunit madalas ito ay ginagawa ng mga:
✔ Manunulat
✔ Mamamahayag
✔ Photo-journalists
✔ Potograpo
✔ Artista
✔ Mag-aaral

Mapapansin mong kasama ka, na isang mag-aaral sa mga gumagawa ng Pictorial Essay. Kung kaya’t asahan mong sa
pagtatapos ng talakayan ay gagawa ka ng iyong sariling Pictorial Essay. Ngunit bago iyan, alamin mo muna ang dalawang
mahahalagang bagay sa paggawa ng isang Pictorial Essay.

DALAWANG PANGKALAHATANG SANGKAP

Mayroong dalawang mahalagang bagay sa paggawa ng isang Pictorial Essay. Hindi lamang sa pagluluto ng isang
pagkain nagkakaroon ng mga sangkap, maging din sa paggawa ng Pictorial Essay. Narito ang dalawang pangkalahatang
sangkap sa paggawa nito.
1. LARAWAN
Ang larawan o litrato ay ang pinaka-iniukutan ng Pictoral Essay. Ito ang nagsisislbing puso nito dahil nakadepende sa
larawan kung anong kapsyon ang iyong ilalagay. Mahalagang isaalang-alang mo na kailangang kaakit-akit ang mga
larawang ilalagay sa iyong Pictorial Essay. Makatutulong ito upang pagtuunan ng pansin ang iyong ginawa.
2. TEKSTO
Ang teksto naman ay ang kapsyon na may kaugnayan sa larawan. Ito ang magsisilbing pang-uri sa gagawin mong
Pictorial Essay na siyang magbibigay turing sa mga larawang iyong ilalagay.
 MGA KATANGIAN NG ISANG MAHUSAY NA PICTORIAL ESSAY
Paano mo masasabi na mahusay ang iyong isinagawang Pictorial Essay? Ngayon ay aalamin mo ang mga
katangian ng isang mahusay na Pictorial essay. Magiging gabay mo ito upang makagawa ka ng isang mahusay at
epektibong awtput.
1. Malinaw na paksa
Nangangailangan na ang isang Pictorial Essay ay magkaroon ng malinaw na paksa. Nakatutulong itong makita o
mapansin ng iyong mga mambabasa ang pinupunto o pinapahayag ng bawat larawan.
2. Pokus
Ang Pictorial Essay na may pokus ay nag-uudyok sa mga mambabasa na unawain at intindihin ang nilalaman nito.
Naiiwasan ang pagkalito sa isipan ng iyong mambabasa kung ano nga ba ang iyong nais ipahiwatig sa kanila.
3. Orihinalidad
Isa sa mga dapat isaalang-alang sa paggawa ng Pictorial Essay ang pagiging orihinal nito. Nagiging maganda ang
kabuuan ng iyong isasagawa kung ito ay sarili mong akda. Masarap din sa pakiramdam na makagawa ka ng isang bagay
na alam mong pinaghirapan mo.
4. Lohikal na Estruktura
Sa paggawa mo ng iyong Pictorial Essay, mahalaga na ang mga nilalaman nito; ang mga larawan at kapsyon, ay may
maayos na daloy. Nakatutulong ito upang mas madaling maintindihan at makuha ng iyong mga mambabasa kung ano’ng
nais mong ipabatid sa kanila.
5. Kawilihan
Magiging maganda ang pakiramdam ng iyong mambabasa kung kaaya-aya at kaakit-akit ang iyong ginawang
Pictorial Essay. Nagkakaroon ito ng kakaibang epekto ng kawilihan sa parte ng mambabasa at naiiwasan din ang
pagkabagot habang binabasa nila ito.
6. Komposisyon
Sa paggawa ng Pictorial Essay, lagi mong tatandaan na ang kapsyon ay nakabatay sa larawan. Kailangang magkaroon
ng ugnayan ang kapsyon at larawan.
7. Mahusay na paggamit ng wika
Ang kahusayan sa paggamit ng wika ay isa sa mga dapat taglayin ng gumagawa ng isang Pictorial Essay.
Kinapapalooban nito ang wastong paggamit ng bantas, salita, wastong baybay at maging ang wastong gramatika.

MGA HAKBANG SA PAGSASAGAWA NG PICTORIAL ESSAY

Ang pag-alam sa mga katangian ng isang mahusay na Pictorial Essay ay unang hakbang pa lamang sa paggawa ng
isang epektibong Pictorial essay. Ngayon alamin mo na ang mga hakbang sa aktuwal na pagsulat o paggawa nito.

1. Pumili sa mga paksang tumutugon sa pamantayang itinakda ng iyong guro.

Tiyaking ang paksang napili mo ay nakabatay pa rin sa itinakda ng iyong guro. Ang hindi pagsunod sa
hakbang na ito ay nangangahulugang hindi mo pinagkakatiwalaan ang iyong guro.

2. Isaalang-alang ang iyong awdiyens.

Lagi mong iisipin kung sino ang magiging audience mo sa iyong gagawing Pictorial Essay. Makatutulong
sayo ang hakbang na ito upang maging komportable ang iyong inaasahang audience na basahin ang iyong
isinagawang Pictorial Essay.
 3. Tiyakin ang iyong layunin at gamitin ang iyong mga larawan sa pagkamit ng iyong layunin
Sa pagsasagawa ng Pictorial Essay, alamin mo kung ano nga ba ang iyong layunin. Bakit mo ginagawa ito?
Ito ba ay para makapagbigay ka ng impormasyon, makapanghikayat at iba pa? Hayaan mong ang mga larawan ang
makapagsasabi sa iyong mga mambabasa kung ano ang layunin mo. Hayaan mong ang mga larawan ang siyang
kumausap sa kanila.

4. Kumuha ng maraming larawan

Kailangang sa paggawa ng isang Pictorial Essay ay marami kang nakuhang larawan na ayos sa tema o paksa.
Sabi nga ng karamihan, mas marami, mas masaya. Maaari kang makapamili ng magagandang larawan kung marami
kang kinuha. Higit na kaakit-akit ang isang Pictorial Essay kung mayroon itong magagandang larawan.

5. Piliin at ayusin ang mga larawan ayon sa lohikal na pagkakasunod-sunod

Higit na naiintidihan ng iyong mambabasa ang iyong isinagawang Pictorial Essay kung ito ay naisaayos mo
ayon sa pagkakasunod-sunod ng mga ideya. Nakatutulong ito upang maging maayos ang daloy ng pagpapahayag o
pagpaparating mo ng mga kaisipan.

6. Isulat ang iyong teksto sa ilalim o sa tabi ng bawat larawan

Ang kapsyon o teksto ay kailangang naisulat o nailagay sa tabi o sa ilalim ng bawat larawan. Nakatutulong
ang hakbang na ito upang hindi magkaroon ng kalituhan sa pag-iisip ng iyong mambabasa habang tinitingnan o
binabasa nila ang iyong gawa.

POSISYONG PAPEL
KAHULUGAN NG POSISYONG PAPEL

Ang posisyong papel ay isang sanaysay na naglalahad ng opinyon na naninindigan hinggil sa isang
mahalagang isyu patungkol sa batas, akademiya, politika, at iba pang mga larangan.
 Karaniwang isinusulat ang isang posisyong papel sa paraang mapanghimok sa mambabasa upang maunawaan
at sang-ayunan nito ang paninindigan ng nagsulat hinggil sa isyung pinaksa.
 Isa rin itong sulatin na nagpapahayag ng tiyak na paninindigan ng isang indibidwal o grupo tungkol sa isang
makabuluhan at napapanahong isyu.
 Kung kaya naman ay napakahalagang iyong tandaan na naglalaman ito ng mga katwiran o ebidensya para
suportahan ang paninindigan ng isang tao.
 Dahil maglalahad ka ng iyong tindig sa posisyong papel, mahalagang bahagi rin ang posisyon at mga
katwiran ng kataliwas o katunggaling panig.
 Kagaya ito ng isang debate, na naglalayong maipakita ang katotohanan at katibayan ng isang tiyak na isyung
kadalasan ay napapanahon at nagdudulot ng mga kakaibang pananaw sa marami depende sa persepsiyon ng
mga tao.

Ang layunin ng posisyong papel ay mahikayat ang madla na ang pinaniniwalaan ay katanggap-tanggap at
may katotohanan. Mahalagang maipakita at mapagtibay ang argumentong pinaglalaban gamit ang mga
ebidensyang magpapatotoo sa posisyong pinaniniwalaan o pinaninindigan.

MGA BATAYANG KATANGIAN NG POSISYONG PAPEL

Ayon kina Axelrod at Cooper, (2013), ang iba’t ibang anyo ng posisyong papel ay may mga batayang katangiang tulad ng
depinadong isyu, klarong posisyon, mapangumbinsing argumento at angkop na tono.
1.Depinadong Isyu
Ang mga posisyong papel ay hinggil sa mga kontrobersyal na isyu o mga bagay na pinagtatalunan ng tao.
Ang isyu ay maaaring mula sa isang partikular na okasyon o sa isang nagaganap na debate. Ano’t ano man ang
pinagmulan ng isyu, kailangang maipaliwanag nang malinaw ng manunulat ang isyu.

Tandaan mo na bilang manunulat ng isang posisyong papel, responsibilidad mong ipaliwanag nang
mabuti sa iyong mga mambabasa kung ano ba at tungkol saan ang iyong paksa para sa iyong posisyong papel
upang higit na madali nila itong maunawaan.

2. Klarong Posisyon
Maliban sa pagbibigay-kahulugan sa isyu, kailangang mailahad mo rin nang malinaw ang iyong posisyon
bilang manunulat hinggil sa iyong paksa. Minsan, ang posisyon ay kwalipayd upang maakomodeyt ang mga
nagsasalungatang argumento, ngunit hindi maaari ang posisyong malabo o ang indensyon. Madalas, dinedeklara
na agad ng awtor ang kanyang posisyon sa tesis na pahayag sa simula pa lamang ng sanaysay.

Mahalaga kasi na bilang isang manunulat ng posisyong papel, alam mo kung ano ba talaga ang iyong
tindig tungkol sa isyu o paksa ng iyong posisyong papel. Hindi pwede na ikaw mismo bilang manunulat ay
nalilito kung ano ba talaga ang iyong papanigan o paniniwalaan.

3.Mapangumbinsing Argumento
Bilang manunulat ng posisyong papel, layunin mo na hikayatin ang mga mambabasa na magkaroon ng
parehong paniniwala gaya ng iyo. Ngunit, Hindi maaaring ipagpilitan mo lamang ang iyong mga paniniwala.
Upang makumbinsi mo ang mga mambabasa, narito ang ilan sa mga bagay na kailangang taglayin ng iyong
posisyong papel:

a. Matalinong Katwiran - Upang matiyak na masusundan ng mambabasa ang isang argumento, kailangang
malinaw na maipaliwanag ang mga pangunahing puntong sumusuporta sa posisyon. Kailangang iwasan ang
pangmamaliit sa oposisyon at iba pang maling pangangatwiran, sa halip dapat isaisip mo ang layuning
matumbok ang katotohanan.
b. Solidong Ebidensya - Upang makumbinsi mo ang iyong mga mambabasa na suman-ayon sa iyong mga
itinuturan, mahalagang magbanggit ka rin ng iba’t ibang uri ng ebidesyang susuporta sa iyong tindig o
posisyon.
c. Kontra-argumento - Bilang isang manunulat ng posisyong papel, kailangan ding isaalang-alang ng awtor
ang mga nagsasalungatang pananaw na maaaring kanyang iakomodeyt o pabulaanan. Sa pag-aakomodeyt ng
argumento, tinatanggap ng awtor ang baliditi niyon at kinakwalipay niya ang kanyang sariling pananaw
bilang pagsasaalang-alang. Sa pagpapabulaan, sinisikap ng awtor na ipakita kung paano naging mali ang
isang argumento.

4.Angkop na Tono
Sa pagsulat ng isang Posisyong Papel, mahalagang alamin din ng manunulat ang wasto at angkop na
tonong kanyang gagamitin sa kanyang posisyong papel. Ang pag-alam ng angkop na tono ay makatutulong upang
higit na maging mas epektibo ang isang posisyong papel. May ilang manunulat na gumagamit ng impormal at
kolokyal na tono sa pagtatangka nilang makipagdapuan sa kanilang mambabasa. Isang halimbawa, maingat na
ginamit ni Martin King ang palakaibigan at risonableng tono bago ilahad ang kanyang arugmento. May mga
pagkakataon na kailangang gumamit ng seryosong tono upang hindi ipalagay ng mambabasa na hindi sineseryoso
ng manunulat ang isyu.