PASIAN ZAHTAKNA

- Rev. En Za Sing, Tedim

Thu Masa

Laaitui EBC Pawlpi’ kum (40) cinna (Ruby Magazine) sungah Thului khat ka gelh theih manin
ka angtang aa, ka pianna Laaitui vangkhua-ah piangthak pawlpi khat kum (40) cin’na a kibawl theih
manin zong Pasian’ hehpihna ka phat hi. EBC Pawlpi pen piangthak khan’lawhna pana hong
piangkhia Pawlpi khat hi a, Laaitui khua ah kum (40) bang cingta ahih manin a picing pawlpi khat
leh khua le tui ading, gambup adingin thupha lianpi khat zong hi dingin ka um hi. Makaite in hih
Magazine ading Thului khat hong nget uh ciangin thungen in, ka lungngai pah a, khat peuhmah
bekin phattuampih ding lam-en in lai tawm hong gelh ka hi hi.
Lai Siangtho leh leitung tangthute i et ciangin na khempeuh Pasian tawh na kisai mahmah
hi. Pasian zahtakna leh Pasian zahtaklohnate in thu tampi piangsak hi. Pasian pen zahtak dinga
kilawm mahmah ahi hi. Bang hang hiam cih leh i Pasian nungta tawntung, vangliatna khempeuh
nei, mun khempeuh ah om, na khempeuh thei, a thuman Pasian ahi hi. Topa in that in hingsak kik
hi; amah in leinuai ah paipih sukin thoto sak hi. Topa in zawngsak in hausak hi; amah in niamkhiat
sukin, zong sangto sak hi. Leitung khuampite TOPA aa hi a, tuate tungah amah in leitung pumpi
koih hi (1Sam. 2)

1. Pasian zahtak in piangthak ding

Pasian zahtakna a bulpi penin ‘Pianthakna’ ahi hi. Kha lam nuntakna leh leitung nuntakna
ah Pasian zahtak ding a kisam mahmah hi. Piangthak-a kikhelna in Pasian zahtakna hi a, siatna
khempeuh pelhna ahi hi. Lai Siangtho in “Na lungsim sung uh ah Khris in Topa ahi ci-in zahtakna
nei un. Note’ lametna thu hong dong mi khempeuh kiangah lungnemna tawh, thusimna lungsim
tawh nagen kik theihna dingun, a kigingsa in om tawntung un, ci hi (1Pet 3:15).
Billy Graham in London cialpi a bawlna ah zato Siavuan Doctor khat le a gei-a tu mikhat in
ciamnuih san lel uh hi. Billy in Lai Siangtho bekbek pulak in gen ziahziah aa Siavuanpa le a gei-a tu
a lawmpa om thei nawnlo uh hi. Billy in ki-apna a sap ciangin Siavuanpa in a lawmpa kiangah nang
bangna ci diam thei keng! kei bel Zeisu Honpa leh Topa in a sang dinga paisawm hita ing ei, a cih leh
a gei-apa zong ngaihsun dedu in, kei zong pai ning ee hihlai ah na sumbawm om ei, ci-in a
sumbawm guksa piakik in Zeisu sang hiau uh hi.
Thomas Paine a kicipa Pasian a zahtaklo mi minthang mahmah khat hi. A sihkuan ciangin
“Topa aw hong huh in! Hihzahtak gimna a thuak dingmah kahi hiam? Kei tungah bangteng hong
piang lai ding ahi hiam? ci-in si hi.
Lai Siangtho in mihing hong kipiansakna thubulpi hong gen hi. Mihing hong kipian’sakna a
thu bulpipen in: Pasian zahtakna leh a thupiaknate man’na ahi hi. (Thsia 12:13). Pasian zahtakna
in nuntak tawntungna thupha leh leitung nuntakna ah Pasian’ thupha sanna ahi hi.

2. Biakpiakna ah Pasian zahtak ding

Leitung ah Pasian tung biakpiakna a pia masa pen Kain leh Abel ahi hi. Kain in lei pan-a
piang gah tawh biakna paipih a, Abel in tuuhon tacilte leh sa limcite paipih hi. Topa in Abel leh a ma
piakna thusim a, Kain leh a ma piakna sanglo hi. Tua ciangin Kain heh in a maisia hi. Pasian in
Kain kiangah, “Limtak in hih lecin nang hong kisanglo ding ahi hiam?” ci hi, (Pian 4).
Pasian ading i piaknate ah a limci theithei piak ding ahi hi. Sumpi laidal te nangawn zong a
thak theithei, a siangtho theithei piak ding ahi hi. Sumpi khawng a a luitata peuh kipia thei mawk
hi. Tua pen Pasian zahtakna hilo hi. Gannote le anpalte i piak ciangin zong a cidam tata i piak ding
ahi hi. Lai Siangtho in na neihsa leh na anpal te tawh Topa zahtak in, ci hi(Pau 3:9). Tate zong
Pasian nasem ding i ap ciangin a pil tata, a cidam tata, a upapen tata cih bangte i piak ding ahi
hi(Pai 13:2). A hai tata peuh, a cidamlo tata peuh ap thei zaw mawk hi hang. Tua banga i piak te
nangawn Pasian in zang thei veve ahih leh a masapente ap leng Pasian a lungdam zawlai ding hi.
Biakinn kikhop ahi zong, mun khat peuhpeuh ah Pasian tawh kizopna, biakpiakna bawlna,
thungetnate ah limtak-a hih ding thupi mahmah hi. Pasian pen ahi zelzul hilo hi. I biak Pasian pen
siangtho in hehpihna leh thuman tawh a dim Pasian ahi hi. Topa Zeisu in “Pasian in Kha ahi hi.
Amah a biate in Kha thuman thutak tawh a bia ding uh hi” (Jn 4:24), ci hi.
Biakinn sunga thupiang khat ka za ngei hi. Inndia gam biakinn khatah biakpiak laitak
numeino khatin tuikhal moh (ice-cream) a neek leh a gawl ah awk in paikhia theilo hi. Siapa in
numeinonu kiangah biakinn sungah kha haihai lo ding, limtak-a bia ding a cih leh tuanu zong kisik
in Topa kiangah thungen pah hi. Thu a ngetkhit phetin a gawl-a awk tuikhal moh them hong paikhia
ziau hi.
Tua ahih manin Pasian tawh kizopna leh biakpiakna te ah Pasian zahtakna tawh limtak-a hih
ding thupi mahmah hi.
3. Pilna sinna ah Pasian zahtak ding
Lai Siangtho in Topa zahtakna in pilna kipatna hi, ci hi (Pau 1:7). Pasian zahtakna panin
pilna man hong pai ahi hi. Pasian thugen minthang Robert G.Lee a kicipa a College kahlai sum zong
dingin South America pai hi. Meileng tung a tuan ding ciangin a nu in, Robert aw, inn pan gamlapi
pai ding hiteh! Ahi zong nong tun’kik ciangin na mittang kong en dinga, nanu napa le Pasian na
zahtakna kong thei ding hi, ci-in vaikhak hi. A khualzinna ah mawhna’ zolna tamveipi om himah
taleh a nu vaikhakna phawk den ahih manin Pasian deihloh peuhmah semlo hi. Inn a tunkik ciangin
a nu kiangah nu aw, ka mittang hong en in’ ci hi. A nu in a mittang en in, a tapa in Pasian a zahtak
lam thei hi.
Pilna, theihna, ciimna, kikep siamna, min le vangte Pasian zahtakna panin hong pai ahi hi.
Pasian zahtakna a om kei leh leitung pilnate nangawn Pasian langpan’na suak thei hi. Tua ahih
manin Pasian tawh kipawl pilna le theihnate i ngah theih nadingin
Pasian zahtak-a, Pasian kiangah thu zong i nget ding ahi hi. (Jeim 1:7)

4. Lokhawh Singpuakna ah Pasian zahtak ding

I lokhawh singpuaknate ah zong Pasian i zahtak ding a kisam mahmah hi. Mi khawhsa, mi
ciinsa khaici-khaiguite peuh, sing le suangte peuh deihgawh in guk sak ding hi zenzen lo hi. Mi’
neihsa duhgawh a, hazatna, guknate ah thupha om ngeilo hi. Lai Siangtho sungah mihing in a sep
thaman uh ne in nuamsa-a a om ding uh a hoihpen hi. Tua nangawn Pasian kihel lo-in kua in anne
tui dawnin nuam sa thei ding ahi hiam, ci hi (Thsia 2:25;3:22).
Khutma, khe ma, innma, loma te ah Pasian zahtakna a omnak leh cidamna, daupaina om
ding hi. "Pasian zahtak ding ama tungah a hilh Zekhariah' hun sung teng amah (Uzziah) in Pasian
zong hi; Amah in TOPA a zon' lai teng Pasian in amah daupai sak hi, (2Khang 26:5 ). Hezekiah in
zong Pasian inn sung nasepna leh thukham leh thupiaknate tawh kizui-in ahihna ah ma Pasian
zongin, a lungsim khempeuh tawh sem a, ama vang hi" ci hi (2Khang 31:21).
Khatvei pata khat lo kuan uh hi. A vengte lo laiah pai uh hi. Apa in a tapa kiangah ken tupek
tawh Aalu hong to ningin nang ih kiim ih paam teng na en in ci hi. A tapa in lo khung en in kuamah
mulo hi. Lo tawlam zong en in kuamah mulo hi. A pa in lo pangtuak zong na en inci-a a et leh
kuamah mu tuanlo hi. A pa’n lo kiim ah bang na mu hiam a cih ciangin a tapa in bangmah mu keng
ci hi. Tua ciangin a pa Aalu to ding a kithawi laitak a tapa in pa na khawlpak dih in i et nailoh khat
om ci hi. A pa’n bang kisam lai hiam? Ih kiim i paam teng en khinzo hilo na hiam? a cih leh a tapa in
vantung lam en nailo, ci hi.
Vantung lam en leh kua om ding hiam?
Pasian in vantung panin mipha leh misia hong encik kim hi. I sep i bawlna khempeuh Pasian
in hong mu den hi. Pasian in i kalsuannate hong en gige hi. Tua ahih manin David in mikhat
kalsuannate Topa’ kiang pan hi a, ama lungkim banga a gamtapa amah in kipsak hi (La 37:23) ci hi.

5. Sum leh Paai Zonna ah Pasian zahtak ding

Sum leh paai zonna ah zong Pasian zahtak ding thupi mahmah hi. Sum siangtho leh sum
siangtho lo Pasian in khen sitset hi. Golhguk lakna sum leh letsongte zong Pasian in deihlo hi. Topa’
mualsiangtho tungah a teeng pen a meet in ama sum khalo a, thutangte’ langah golhguk a lalo mi
ahi hi. Hih mi pen liing ngeilo ding, ci hi (Late 15:5).
Daupaina leh hauhna man pen Pasian kiang pan ahi hi. Sum leh paai, neih leh lam te Pasian
zahtakna tawh a kipawl kei leh pukna lianpi hi ding hi. Leitungbup ah Microsoft tawh Billionaire
mihau minthang a suak Bill Gates pen 1995 kum pan leitungbup mihau pen suak a, kum (20) kizom
leitunga mihaupen in kiciamteh hi. Reporter khatin Bill Gates kiangah bangtan vei hau ding na
hiam? a cih leh Bill Gates in, Topa ka zahtak laiteng hau ning, ci-in na dawngkik ziau hi
Pasian zahtak in, Topa sungah nopsakna in hauhna bulpi leh hauhna kipna ahi hi. Tua ahih
manin Lai Siangtho in "Topa kihtakna pen ama sumgum hi ding hi" a cih bangmah in sum le paai
zonna ah Pasian zahtak in, Pasian mai enkawmsa in sum le paaite zong zat’ siam ding a thupi hi.

6. Nisim nuntakna le sepna khempeuh ah Pasian zahtak ding

Nisim i nuntakna ah Pasian zahtakna tawntung ding thupi mahmah hi. Efesa 5:17 ah, “Mihai
suaklo in Topa deihna in bang ahi hiam ci-in na thei un” ci hi. Adoniram Jadson in a innsung kawm
tungah,“Tuni ka nuntakna ah Pasian a lungdam ding hiam ” cih laikhat suang kici hi. Nisim a
nuntakna ah khialhak mahmah ding hi.
I nasepna khempeuh ah zong Pasian mai mah enkawmsa in amah zahtakna tawh sep ding
thupi hi. I nasepna khat peuhpeuh ah ei’ angsung ding bek ngaihsun loin, mite nasem bang bek
zong hilo in, Pasian sila banga Pasian kihtakna tawh sep ding thupi mahmah hi. Mipil khatin ka
neulai-in ka nu in vantunga om kote pa aw.., cih Topa thungetna hong hilhlo hileh ka gol khit
ciangin Pasian omlo hi, ci-in ka langpang kha ding hi, ci ngei hi.
 Thuhilhsia 7:18 ah, Topa na zahtak nak leh khat peuhpeuh na zuihna ah na maa vang ding
hi” ci hi. Topa a zahtak mi peuhmah a khan sung ahi zong, ama khit a tu a tate khangah ahi zong
thupha sang hamtang uh hi. David in a muhkhak thu gen a, “Ama mi siangthote aw, Topa zahtak
un, bang hang hiam cih leh amah a zahtakte in kisapna neilo hi. Humpi nelkai khanglaite in kisapna
leh gilkialna thuak uh hi; ahih hangin Topa a zongte in na hoih a kisap uh omlo hi. Thuman mi a
kinusiacip hita leh a tate anngen tawm-a kivak hita leh ka neulai-a kipan ka teek dong ka mu ngei
nai kei hi, ci hi (La 34:9-10; 37:25).

7. Gam leh Minam makaihna ah Pasian zahtak ding

Hih pen ka gennop mahmah thupi khat ahi hi. Gamkhat, minam khat peuhpeuh in Pasian a
bulphuh nak leh khangto in thupha ngah hi. USA gam pen Pasian min tawh biakna hanga galtai mi
pawlkhat May Flower kici gunkuangpi tung tuangin, Atlantic tuipi tungah ni (66) sawtin haksatna
tampi a phut khit uh teh November 11, 1670 ni-in USA leitang a khe uh tawh sik uh hi. US leitang a
tun’ phet un May Flower Compact kici kiciamna lai khat gelh uh a, a ki patna ah “Pasian min tawh
Amen” (In the name of God) ci-in gelh uh hi.
America pen leitung ah Pasian min tawh a kisat masa pen gam ahi hi.Tua ahih manin tu
ciangciang America te’ constitution pen mihing khuak tawh kigeel lai khempeuh lak ah a hoihpen
kici hi. Tuni dongmah kumpi thak a kah ciangin Lai Siangtho tawh kiciamna nei hi. Khapi tung a
kah masa pente hi uh hi. Vantung gamno (earthly paradise) cih zah phial in Pasian’ thupha a ngah
gam ahi hi. Leitungah Super Power kici aa sumbawlna, gamvai, pilna siamna leh galvan lam ah a
hatpeen in kiciamteh hi. Tu ciangciang leitung bup sumbawlna pen USA-te’ sumbawlna tungah 80%
kinga, ci hi.
Khatvei US ulian khat Brazil gam ah va zin ngei hi. Brazil kumpipa in US ulianpa kiangah
bang hangin no gam ah suang manpha lah piang selo napi hihzahtak in khangto a, ko gam ah
leitang hoih in suang manpha tampi piang napi-in no bangin khangto theilo ka hi uh hiam cin dong
hi. US ulianpa in no Brazil gam pen sumbawlte sat hi a, ko USA pen Pasian min tawh a kisat ahi hi,
ci-in dawngkik ziau hi.
America te tawh a kidem toto Russia gam pen 1917 kumin Communist ukna kipan hi. A
limgen mahmah uh thu (3) om aa (1) An om ding, (2) Cidam ding, (3) Pilna kipia zo peuh leng, pha zo
cilel uh hi. Kum (70) sung bang Pasian omlo a ci Russia gam pen 1989 kum a kipan kitam kham in
phel tampi kisuah hi. Nipi zingsang khat Communist galkap mang lianpen pa Mosco khuapi sunga
Tuiphum biakinn sungah a uniform tawh lut hi. Amah Tapidaw hilo hi. Biakinn limlim tawh khatvei
bek kisai kha ngeilo hi. Ahi zong Communist gam naksiatak a kitapkhap mawk takteh hih galkap
mangpa in pua zo nawnlo ahih manin paina ding dang theilo in biakinn sungah a pai ahi hi.
Tua laitak BWA GS ahi Dr. Dentonlotz in a genna ah tua ni-in kei zong Mosco biakinn sungah
ka kikhawm kha a, tua galkap mangpipa tawh ka tukhawm kha hi. La a kisak laitak galkapmangpa
thakhat in dingto in thungen a, a thunget tom mahmah hi. “Ka kingakna uh galvan ten hong gum zo
nawnlo hi. Ka kingakna uh Philosophy, Ideology, ka kingakna uh thugil ka sakte un hong gum zo
nawnlo hi. Tu’n bang suak ding kahi uh hiam? Tua sangin a thupizaw tampen in ka khate uh bang
suak mawk ding ahi uh hiam kum (70) k alangpan’pa uh aw..! ci-in kap ngeungeu hi.
Lai Siangtho in Pasian’ lamlahna a kizuih lohna gamah gam sung mite kisia uh a, Pasian
thukham a zui mite a lungdam hi, (Pau 29:18), ci hi.
Pasian in a teelsa Israel minamte tungah a khang a khangin amah zahtak ding limgen
mahmah hi. “Tu in luah dinga na paina gam uh ah nazuih dingun, note leh na tapate uh leh na suan
le khakte un Topa note Pasian’ thukhamte leh a thupiakte na zuihna uh tawh amah na zahtak
theihna dingun, Topa na Pasian un na nuntak tawntung uh na zuih dingun kei a hong hilhsawn
sakte in hih thupiakna, thukhamte leh ngeina kipte ahi hi; tua in nakhan uh a sau theihna ding ahi
hi” (Thkna 6:1-2).
Israel mite in Pasian zahtak loin a nungngat uh ciangin Pasian in minam dangte khut sungah
pia hi. Ama’ mai a zon’ uh ciangin Pasian in honkhia in suahtakna pia hi. David Ben Gurion
makaihna tawh May 14,1948 ni-in Israel te gam khatin hong ding uh a, UNO in zong gam khatin
ciamteh hi. A keugaw theikung hingkik ta hi (Mat 24:32-35).

Israel mite a gam uh ah hong ciahkik uh ciangin, a gam uh puahkik uh a, sehnel gam pen
lonona gam suak ta hi. Israel mite in a gam uh ah buh leh singgah nam tuamtuam ciing uh a,
ankungte leh a gahte limci mahmah hi. Lokho khatin dawnpawl, mehthuk, manta, zasan, nisuh-a
kipan singgah te kum khat in 3 vei a gah lo hi. Lokho mi khatin eka khatah an ton 60 bang la-a,
kum khatin a zah li pan’ a zah guk dong ngah uh hi. A khua hun lopi in metman, makhaw le cherry
te ciing uh a, tampitak gah hi. Hih singgahte a khua hun zui-a gahte sangin Europe gamah a zah
sawm dongin khawng zaw uh hi.
Israelte in sehnel gamah mehteh-mehgah, buh leh singgah tuamtuamte ciingin a hoih sak
theih uh pen lamdang kisa mahmah hi. Gamsung mun tampi ah singkung suanin gah leh tehte
tampi a pianna tungtawnin khuahun kikhelna zong piang hi. Guahtui zong tam mahmah, ci
hi.Pasian in Israel te leitung laizang ah pungsak in thupha pia hi.
Israel mite gam khatin hong din’ uh ciangin a kiim-a Arab gamte lungkim lo uh hi. Egypt,
Syria, Jordan, Algeria,Iraq,Kuwait,Saudi Arabia gamte kipawl in June 5-10,1967 sung kido uh a,
lamdangtak in Israel te-in zo in galvan zong tampitak man uh hi. Hih ni 6 gal kidona (Six Day War)
pen leitungah minthang mahmah hi. Tulaitak zong IT pilna leh gal siamna lam ah leitungbup in
lamdang a sak zah phial dingin khangto mahmah uh hi.
Hihte pen a nungta Pasian in a panpihna hang ahi hi.

Thukhupna
Tua hi aa mimal ahi zong, gamkhat peuhpeuh, minam khat peuhpeuh in Pasian bulphuh in a
zahtakna zahzah un thupha ngah in khangto hi. Leitung tangthu kansiam mipil Thomas Cahill in,
“Ni tumna lam mite khan’tohna bulpi in Nazareth mi Jesu hi” ci-in nagen hi. Lai Siangtho in, “Topa
pen Pasian-a a nei minam, ama luah dingin teelna a ngah minam in thupha ngah ahi hi” (Late
33:12), “Note in Topa na Pasian uh thu mangin, tu ni-a note kong piak ahi ama thupiakna
khempeuh limtak in na zuih uh leh, Topa na Pasian un leitung minam dang khempeuhte sangin a
lianzaw in note hong bawl ding hi”(Thuhilhkikna 28:1), ci hi. Pasian zahtak in, Lai Siangtho i zuih
nak leh ih khua ih tui, ih Zogam hong paallun ding hi. Topa’n thupha hong pia ta hen 