YOUNG MIZO ASSOCIATION

DAN BU
BUNG I

Y.M.A. TOBUL
1. Pâwl Hming :
Young Mizo Association (Y.M.A.) : June 15, 1935 khân Young Lushai
Association (YLA) tia din a ni a, October 7, 1947 atang khân Young Mizo
Association (YMA) tia thlak a lo ni ta.
2. A thil tum leh a dinchhan :
1. Hun âwl hman that
2. Zofate hmasâwnna ngaihtuah
3. Kristian nun dân tha ngaihsân.
3. A nihna:
YMA chu politics rawngkai lo, tlâwmngai pâwl a ni.
4. YMA thuvawn :
YMA chu tanpui ngaite tanpuitu a ni.
5. Pâwl chhinchhiahna :
Rin bial, a laia Meichher alh ‘YMA’, kuta chelh lai lem chu Pâwl chhinchhiahna a
ni. Meichher kuang pathumte hian YMA thil tum leh dinchhan pathumte a entîr a.
Meialh êng anga a thla sâwmte hian YMA Thuthlung sâwm a entîr. Ribbon-a
YMA tih inziak veilamah Estd. a awm ang a, a dinglamah 1935 a awm ang.
6. Registration:
YMA chu Societies Registration Act 1860 (Act XXI of 1860 ) and as
modified by the Society Registration (Extension to Mizoram) Act 1976
tlawhchhanin May 14,1977 ah inziahluh a ni a, Regisration No. chu SR.
4 of 1977 a ni. Mizoram chhûngah Sub-Headquarters YMA, Group YMA
leh Branch YMA tân inziahluh leh hran a ngai tawh lo.
7. YMA rawng leh Flag :
1) Hêng rawng chi thum, a sen, a vâr leh a dum te hi Mizo rawng neih hmasak
ber anih avângin YMA rawngah thlan a ni.
2) A RAWNGIN A ENTIR :
A sen hian : YMA chu pâwl lâr tak a ni tih a entîr.
A vâr hian : Pawl thianghlim, mitin huapzo a ni tih a entîr.
A dum hian : YMA chu mi chanhai, riangvai leh lusunte thian a ni tih a entîr.
3) YMA Flag chu hêng rawng chi thum, a chung berah a sen, a laiah a vâr, a hnuai
berah a dum, intiat thap tûr a ni.
4) FLAG LENZAWNG :
A lian : 6’x 4’
A laihawl : 3’8”x 2’6”
A tê : 3’x 2’
Car Flag : 9”x 6”
5) YMA FLAG SIAM DAN :
A vâr lai takah YMA chhinchhiahna (Emblem) a awm ang a, a dumah hian
Central YMA te, Sub-Headquarters YMA te, Group YMA te leh Branch YMA-ten
an hming an chuantîr ang.
6) Central YMA te, Sub-Headquarters YMA te, Group YMA te leh Branch YMA-ten
YMA Flag tê te, a laihawl te leh a lian te hi an siam thei ang a, YMA hminga
thiltihnaah an hmang thei ang.
7) Car Flag erawh chu Central YMA, Sub-Headquarters YMA, Group YMA leh
Branch YMA hminga chhuahnaah hman theih a ni ang.
8. YMA Seal:
YMA Seal rêng rêng chu Central YMA-in a siam tûr a ni.
9. YMA Thuthlung:
1) Mizote hi thlahtu atanga hnam huaisen, tlâwmngai leh hawihhâwm kan ni thîn a,
chûng ze mawite chu ka nunphungah a pâr ve tûr a ni.
2) Hlemhlêtna chi hrang hrang te, ruihtheih thil chi hrang hrang te hi, YMA
nihphung nên a inkalh tlat tih hriain, hêng lakah hian ka fihlîm tûr a ni.
3) Kan hnam rohlu ber Tlâwmngaihna hi, ka hnam puite leh hnamdangte
mithmuhah, chhuanawm takin ka lantîr ang a, Mizo hnam zahawmna
puanchhuahna atân ka hmang thîn tûr a ni.
4) Aia upa zah hi Mizo hnam ze mawi tak a ni a, chuvângin dinhmun lama
hnuaihnung zâwk pawh nise, kei aia upa zâwk tawh phawt chu zah takin ka en
tûr a ni.
5) Hnamdangte ka hmusit mai tûr a ni lo va, an ngaihnep theih zâwngin ka awm tûr
a ni hek lo.
6) Mahni intodelh hi zahawmna leh huaisenna a ni tih hriain, mite bantu ni lo va,
mite tanpuitu ni thei tûrin, mahni kein ka ding thei tûr a ni.
7) Nungcha, thing leh maute hi, mihringten kawng tin renga kan mamawh a ni tih
hriain, theihtawp chhuahin ka humhalh tûr a ni.
8) Ram rorêltute thawhpui thiam mi, sawisêl mai lova thurâwn petu nih ka tum tûr a
ni a, Sawrkâr tân khua leh tui tha ka ni tûr a ni.
9) Mahni tanghma chauh thlir lo vin, midang hmakhua ka thlir fo a tûl a, midangte
ngaihdân zah a, zawm thiam mi ka ni tûr a ni.
10) YMA member ka nih avângin, Mizo hnam mawina leh, YMA thianghlimna
puangchhuaktu ni tûrin, ka nunphungah ka fimkhur reng tûr a ni.
10. Kaihhruaina :

YMA member chuan hetiang hi nih a tum tûr a ni :

1) Mahni inthunun leh invawng fel mi;
2) Chhûngkaw vawng fel mi;
3) Thudik ngaina leh tan tlat mi;
4) Teirei peih mi;
5) Mi hawihhâwm;
6) Mi tlâwmngai leh tangkai;
7) Khawtlâng thatna ngaihtuah mi;
8) Sakhaw zah thiam mi;
9) Pi leh pute dân tha venhim tum mi leh;
10) Zû leh ruihtheih thila insûm mi.

BUNG II
PAWL INDIN DAN

11. YMA Bulpui ( Central YMA ) :

YMA bulpui chu Central YMA a ni a, a hmunpui chu Mizoram khawpui Aizâwl a
ni.
12. Sub-Headquarters YMA :
Central YMA-in Group YMA eng emaw zât huamin, an thawhhona leh tanlâkna
tichak zâwk tûr leh an sâwt tlânna tûrin a tûl a tihna hmunah Sub-Headquarters
YMA a din thei ang.
13. Group YMA :
1) Central Executive Committee-in Branch YMA eng emaw zât huamin Group YMA
a siam thei ang.
2) Group YMA chu hmun hlawm khat, inkalpawhna awlsam leh a mi chêngte
khawsak dân inmil deuh thlîrin a din ang.
3) Group YMA din thar tûr emaw, siam that ngai emaw a awm chuan, Central
Executive Committee chu thutâwp siamtu a ni ang.
4) Sub-Headquarters YMA huam chhûnga Group YMA din thar tûr leh siam that
ngai a awm chuan, Sub-Headquarters Executive Committee-in Central
Executive Committee-ah a thlen ang.
5) Group YMA din thar a nih dâwnin Central Executive Committee-in Convener a
ruat ang a, Convener chuan Group YMA Conference kovin hruaitu a thlanpui
ang.
14. Branch YMA :
1) Mizote chênna khawtinah YMA din theih a ni a, Branch YMA din thar duh chuan
anmahni huamtu Group YMA-ah an dil ang a, Group Executive Committee-in
emaw, Group YMA Conference-in emaw âwm a tihpui chuan Branch YMA chu
din a ni ang.
2) Group YMA awm lohna hmun emaw, Mizoram pâwna Mizote emaw chuan
Branch YMA an din duh chuan, YMA Dân hnuaiah, Central YMA remtihna an la
hmasa ang.
3) Branch YMA awmsa atanga indang/inthen/hmingthlak duh chuan an awmna
Branch Executive Committee-ah an dil/ngaihtuah tûr a ni ang a, Group YMA
awmnaah chuan Group Executive Committee-in emaw, Group YMA
Conference-in emaw rem a tih chuan Central YMA remtihnain indantîr thîn tûr a
ni. Sub-Headquarters YMA huam chhûngah chuan Sub-Headquarters Executive
Committee kaltlangin, Central YMA remtihnain indantîr thîn tûr a ni.
4) Branch YMA din thar dil leh indan/inthen dilten harsatna an tawh chuan Central
Executive Committee-in thutâwp a nei ang. Sub-Headquarters YMA hnuaia
awmte chuan Sub-Headquarters YMA kaltlangin Central YMA-ah an thlen thîn
ang.
15. Central YMA zawmna Fee :
Branch YMA ding thar rêng rêngin an din atanga thla hnih ral hma ngeiin Central
YMA zawmna Fee Rs. 400/- (chêng zali) pein Central YMA an zawm ang.
Central YMA zawm lo chu Branch YMA an ni lo va, YMA hming an hmang thei lo
vang.
16. Branch YMA Annual Fee :
1) Branch YMA tinin Central YMA-ah Branch Annual Fee Rs. 200/- (chêng zahnih)
kumtin April thla ral hma ngeiin an pe ang.
2) Branch YMA ding thar pawhin Central YMA an zawm kumin Annual Fee an pe
ang.
3) April thla ral hmain Annual Fee hi pêk ngei tûr a ni.
Annual Fee pe lo chuan General Conference-ah rorêl palai an tîr thei lo ang a,
Vote pawh an thlak thei lo vang.
4) Annual Fee pêk rualin Member zât Mipa_____, Hmeichhia________, Life
Member________, pêk luh tûr a ni.

BUNG III
MEMBER NIH DAN

17. Member ni thei te :

1) Mizo tupawh, tleirâwl/râwlthar chin chunglam chu, YMA thiltum leh dinchhan te, a
 thuvawn te, a thuthlung leh a kaihhruaina te anga awm inhuam apiangte.
2) An khawsak dân phung ena Branch Executive Committee-in YMA member-a a
pawm theihte.
18. Member chi hnih an awm ang :
Annual Member leh Life Member te.
19. Membership Fee :
1) Annual Membership Fee Rs. 5/- (chêng ngâ) a ni ang. Annual Membership Fee
chu mahni awmna vênga Branch YMA-ah ngei pêk tûr a ni.
2) Life Membership Fee chu Rs. 500/- (chêng zangâ) a ni ang.
20. Membership Fee pêk dân :
1) Annual Membership Fee chu hruaitu tharten an khawn ang.
2) Branch YMA tinin member hming ziakna Register bu neih tûr a ni a, member
hming ziaknaah chuan Hming, Kum leh Pa hming ziah tûr a ni.
3) Life Member nih duh chuan YMA Member-ah kum 5 a awm hnuah a awmna
Branch YMA-ah a dîl ang a, Branch Executive Committee-in Life Member ni tlâka
a hriat chuan Group YMA-ah a dilpui ang a, Group YMA Conference-in a remtih
chuan Central YMA Office-ah Life Membership Fee pein Life Member a ni ang.
4) Sub-Headquarters YMA leh Central YMA huam chhûnga mite chuan an awmna
Branch YMA-ah kum 5 member a nih tawh hnuin a dîl ang a, Sub-Headquarters
Executive Committee-in emaw, Central Executive
Committee-in emaw rem a tih hnuah Central YMA
Office-ah Life Membership Fee pein Life Member a ni ang.
21. Member nihna hloh dân :
1) YMA Member, a awmna Branch YMA-in YMA Dân Bu Bung III chang 17 kalh nia
hriat, vawihnih aia tlem lo insiamtha tûra a hrilh tawh hnua member ni ve lo se
tha zawka a ngaihte chu an member nihna a paihsak thei ang a, a hun rei zâwng
te leh tûl dang chu Branch YMA-in a rêl ang.
2) YMA Life Member, a chetdân leh nunphung ena YMA Dan Bu Bung III chang 17-
na kalh nia a hriat, an awmna Branch YMA-ten insiamtha tûra vawihnih aia tlem
lo a hrilh tawh hnua an Life Member nihna hlihsak tha zawka a hriatte chu, Life
Member an nihna hlihsak theih an ni ang. Life Member an nihna hlihsak tûra
Branch YMA-in a rêl thluk tawh chu Group YMA leh Sub-Headquarters YMA
kaltlanga Central YMA-ah thlen a ni ang a, tûl a tih chuan Life Member nihna a
hlihsak ang.
A nunphung a sim a, Life Member nih a duh leh hunah chuan Life Member
nih dân phung pangngai engkim zawmin a dîl tha leh ang.
BUNG IV
PAWL HRUAITUTE LEH AN DIN HMUN

22. Central YMA Hruaitute :

Central YMA chuan hetiangin hruaitu a nei ang :
1. President
2. Vice President
3. General Secretary
4. Assistant Secretary
5. Treasurer
6. Finance Secretary
23. Hruaitu Dangte :
Sub-Headquarters YMA, Group YMA leh Branch YMA chuan hetiangin hruaitu a
nei ang :
1. President
2. Vice President
3. Secretary
4. Assistant Secretary
5. Treasurer
6. Finance Secretary
24. YMA Office Bearers dinhmun :

1) Central YMA Office Bearer-te dinhmun leh an mawhphurhna chu hetiang hi a ni

ang :
President : Pâwl hruaitu ber a ni a, Central Executive Committee-ah te,
Central Co-ordination Committee-ah te, General Conference
leh Central YMA hminga thiltih leh inkhâwm buatsaihah
hruaitu a ni ang.
Vice President : President thachhang dâwltu a ni a, a theih ang angin
President a puiin, thurâwn pein a tawiawm ang. President
awm lohvin a ai a awh thîn ang.
General Secretary : President râwnin Central Executive Committee a ko
thin ang. Central Executive thurêlte, Central YMA hminga
hmalâkna leh bawhzui tûr dangte bawhzuiin, Central YMA
hmalâkna tihlawhtling tûrin theihtâwp a chhuah thîn ang.
Assistant Secretary : General Secretary thachhang dâwltu a ni a, General
Secretary finchhuahtu leh tawiawmtu a ni. General Secretary
awm lohvin General Secretary chanvo a la ang.
Treasurer : Central YMA sum him taka vawngtu a ni. A hnêna sum lût leh
chhuak rêng rêng chu Finance
 Secretary kaltlanga tih tûr a ni.
Finance Secretary : Central YMA sum ziaktu a ni a, pâwl sum lût leh chhuak
zawng zawng fel takin a chhinchhiah ang.
2) Sub-Headquarters YMA leh Group YMA Office Bearer te dinhmun leh an
mawhphurhna theuhte chu hetiang hi a ni ang :
President : Sub-Headquarters/Group YMA hruaitu ber a ni a,
SubHeadquarters/Group Executive Committee-ah te, SubHeadquarters/Group
YMA Conference leh SubHeadquarters/Group YMA hminga thil tih leh inkhâwm
buatsaihah hruaitu a ni ang.
Vice President : President thachhang dâwltu a ni a, a theih angin President a
puiin thurâwn pein a tawiawm ang. President awm lohvin a ai
a awh thîn ang.
Secretary : President râwnin Sub-Headquarters/Group Executive
Committee a ko thin ang. Sub-Headquarters/Group Executive
Committee thurêl te, Sub-Headquarters/Group YMA hminga
hmalâkna leh bawhzui tûr dangte bawhzuiin, SubHeadquarters/Group YMA
hmalâkna tihlawhtling tûrin
theihtâwp a chhuah thîn ang.
Assistant Secretary : Secretary thachhang dâwltu a ni a, Secretary
finchhuahtu leh tawiawmtu a ni. Secretary awm lohvin
Secretary chanvo a la ang.
Treasurer : Sub-Headquarters/Group YMA sum him taka vawngtu a ni. A
hnêna sum lût leh chhuak rêng rêng chu Finance Secretary
kaltlanga tih tûr a ni.
Finance Secretary : Sub-Headquarters/GroupYMA sum ziaktu a ni a, pâwl sum
lût leh chhuak zawng zawng fel takin a chhinchhiah ang.
3) Branch YMA Office Bearers dinhmun :
Branch YMA Office Bearer-te dinhmun leh an mawhphurhna theuhte chu
hetiang hi a ni ang :
President : Branch YMA hruaitu ber a ni a, Branch Executive Committeeah te
Branch YMA hminga thiltih leh inkhâwm buatsaihah
hruaitu a ni ang.
Vice President : President thachhang dâwltu a ni a, a theih angin President a
puiin thurâwn pein a tawiawm ang. President awm lohvin a ai
a awh thîn ang.
Secretary : Branch Executive Committee thurêlte Branch YMA hminga
hmalâkna leh bawhzui tûr dangte bawhzuiin, Branch YMA
hmalâkna tihlawhtling tûrin theihtawp a chhuah thîn ang.
President râwnin Branch Executive Committee a ko thîn ang.
Assistant Secretary : Secretary thachhang dâwltu a ni a, Secretary
 finchhuahtu leh tawiawmtu a ni. Secretary awm lohvin
Secretary chanvo a la ang.
Treasurer : Branch YMA sum him taka vawngtu a ni a. A hnêna sum lût
leh chhuak rêng rêng chu Finance Secretary kaltlanga tihtûr a
ni.
Finance Secretary : Branch YMA sum ziaktu a ni a, pâwl sum lût leh chhuak
zawng zawng fel takin a chhinchhiah ang.
25.
a) Central/Sub-Headquarters/Group/Branch YMA Office Bearer-te chu
MLA/MP/MDC/Councilor/LC/VC-ah an ding dâwn a nih chuan Nomination an file
hmain, YMA-a an nihna an inhnukdâwk tûr a ni.
b) YMA Hruaitu hlun chawimawina hetiang hian pêk thîn a ni ang :
i) Mipa: A zâwna kum 10 (sâwm) chhûng Central / SubHeadquarters /
Group / Branch YMA Office Bearer tang tawh te; a zâwn lo
a nih chuan kum 15 (sâwm leh panga) tang tawh te.
ii) Hmeichhia: A zâwna kum 5 (ngâ) chhûng Central / SubHeadquarters /
Group / Branch YMA Office Bearer tang tawh te; a zâwn lo
a nih chuan kum 8 (riat) tang tawh te.

BUNG V
PAWL HRUAITU THLAN DAN

26. Central YMA hruaitu thlan dân :

1) Central YMA Office Bearer-te chu General Conference-in kum hnih chhûng atân
a thlang ang.
2) Central YMA Office Bearer atân chuan Mizoram khawpui Aizâwl a awm ngei
thlan tûr a ni.
3) Central YMA Office Bearer-ah nihna ngai a zâwnin term hnih bâk chelh theih a ni
lo.
4) NOMINATION :
(a) Central Executive Committee-in a tûl a tih chuan mi 5 (pangâ)aia tam lo a rawt
thei ang.
(b) Sub-Headquarters Executive Committee pawhin an duh chuan mi pathum aia
tam lo an rawt thei ang.
(c) Group Executive Committee-in an duh chuan mi pahnih aia tam lo an rawt thei
ang.
(d) Aizâwl khawpui chhûnga Branch YMA-tin Executive Committee-in Central YMA
Office Bearer tûr mi pakhat a rawt thei ang a, anmahni Branch chhûnga mi kher
lo pawh a rawt thei ang.
(e) Aizâwl khawpui chhûnga Branch YMA awmna a mi, kum 5(pangâ) tal YMA
 Member ni tawh leh Sub Headquarters / Group / Branch YMA Office Bearer lo ni
tawh rawt tûr a ni.
(f) Central YMA Office Bearer atâna rawtte hi anmahni remtihna an la hmasa tûr a
ni.
(g) Rawtte hi an inhnukdawk duh a nih chuan, rawtna thehluh hun tawp hnu kar khat
chhûngin an inhnukdawk tûr a ni.
(h) Rawtte hi Central Executive Committee-in A AW B-a an hming hmasak dân
indawtin a remfel ang, chungho atang chuan Central YMA Office Bearer tûr thlan
a ni ang.
5. RETURNING OFFICER :
Central Executive Committee-in Returning Officer leh a tanpuitu tûr tûl a tih zât a
ruat ang a, chûngte chu rawtte zinga tel lo an ni tûr a ni.
6. INTHLAN DAN :
(a) A mal mal (post by post) a inthlan a ni ang.
(b) Inthlanna chu Secret ballot-in thlan tûr a ni a, vote hmu sâng ber chu tlinga puan
a ni ang. Vote hmu sâng inang an awm chuan, a sâng inzâtho atang khân thlan
that leh tûr a ni ang.
(c) Central Executive Committee in a tul dân a zirin YMA Office Bearer inthlanna
atân ‘Election Manual’ a siam ang.
7. VOTE PE THEI :
(a) Central YMA Office Bearers;
(b) Central Executive Committee Members;
(c) Central YMA Office Bearer lo ni tawh te;
(d) Sub-Headquarters Office Bearers;
(e) Sub-Headquarters Executive Committee Member 10 (sâwm);
(f) Group YMA Office Bearers;
(g) Branch YMA-tin atangin Branch YMA aiawh mi 6 (paruk) zêl, inthlannaa
vote nei
tûra Branch Executive Committee-in a ruatte;
(h) Hêng a chunga sawi te zing ami, nihna pakhat aia tam chelh an awm thei a,
chutiang mite chuan vote khat chauh zêl an nei thei ang.

8. Hun laklawhah Office Bearer hmun ruak a awm chuan, Central Executive
Committee-in an aiawhtu tûr a ruat ang a, term puitlinga chhiar a ni ang.

27. Sub-Headquarters YMA hruaitu thlan dân :

1) Sub-Headquarters YMA Office Bearer te chu Sub-Headquarters Conference-in
kum hnih chhûng atân a thlang ang.
2) Sub-Headquarters thuthmun leh Direct-a awp Branch-ten mi pakhat, Group-in mi
pathum, Sub-Headquarters Executive Committee-in mi 10 aia tam lo a rawt thei
 ang.
3) Sub-Headquarters YMA Office Bearer-ah nihna ngai a zâwnin Term hnih bâk
chelh theih a ni lo.
4) Sub-Headquarters YMA Office Bearer atân chuan
Sub-Headquarters thuthmun khawpui chhûng a mi ngei ruat tûr a ni.
5) Sub-Headquarters YMA Office Bearer atâna rawt te chu kum 5 (ngâ) tal YMA
Member ni tawh leh Central YMA/Sub Headquarters/Group/Branch YMA Office
Bearer lo ni tawh an ni tûr a ni.
6) VOTE NEI THEI :
(a) Sub-Headquarters YMA Office Bearer leh Executive Member te;
(b) Group YMA aiawh mi 6(paruk),
(c) Branch YMA tin atanga mi 6 (paruk) thlan chhuah te.
7) INTHLAN DAN :
(a) A mal malin emaw, mi 6 (paruk) a rualin emaw thlan a ni ang.
(b) Mi 6 (paruk) thlan chhuah an nih chuan thlantlinten nihna an invuah ang.
(c) Inthlanna chu Secret Ballot-in thlan a ni ang a, vote hmu sâng ber chu tlinga
puan a ni ang.Vote hmu sâng inang an awm chuan, a sâng inzâtho atang khân
thlan that leh tûr a ni ang.
8) Sub-Headquarters Executive Committee-in inthlan buaipui tûrin Returning Officer
leh a tanpuitu tûl a tih zât a ruat ang.
9) Hun laklawhah Office Bearer hmun ruak a awm chuan Sub-Headquarters
Executive Committee-in an aiawh a ruat ang a, term puitlinga chhiar a ni ang.
10) Hruaitu thlan tharte chu thlan atanga thla khat ral hma ngeiin Central YMA
Officeah hriattîr tûr a ni.
28. Group YMA hruaitu thlan dân :
1) Group YMA Office Bearer te chu Group YMA Conference-in kum hnih chhûng
atân a thlang ang.
2) Group YMA Office Bearer-ah nihna ngai a zâwnin term hnih bâk chelh theih a ni
lo.
3) Group Executive Committee-in mi paruk aia tam lo leh Branch-in mi pathum aia
tam lo an rawt thei ang.
4) Group YMA hruaitu thlannaah hian Branch YMA aiawh mi 10 (sâwm)
thlanchhuahte leh Group Executive
Committee Member-ten vote an nei ang.
5) Group Executive Committee-in thlanpuitu atân Returning Officer leh a tanpuitu tûl
a tih zât a ruat ang.
6) A mal malin emaw, mi 6 (paruk) a rualin emaw thlan chhuah tûr a ni a, mi 6
(paruk) a ruala thlan an nih chuan thlantlinten nihna an invuah ang.
7) Inthlanna chu Secret Ballot-in thlan a ni ang a, vote hmu sâng ber chu tlinga
puan a ni ang.Vote hmu sâng inang an awm chuan, a sâng inzâtho atang khân
 thlan that leh tûr a ni ang.
8) Hun laklawhah Office Bearer hmun ruak a awm chuan Group Executive
Committee-in an aiawh a ruat ang a, term puitlingah chhiar a ni ang.
9) Group YMA Office Bearer thlan tharte chu thlan atanga thla khat ral hma ngeiin,
Central YMA Office-ah hriattîr tûr a ni.
29. Branch YMA hruaitu thlan dân :
1) Branch YMA Office Bearer te chu member kalkhâwmin kum khat atân a thlang
ang.
2) Inthlanna chu kum tin January thla ral hmain neih tûr a ni.
3) Inthlan hmain chawlhkâr khat tal member-te hriattîrna chiang leh fel tak a awm
hmasa tûr a ni.
4) Inthlan hmain Branch Executive Committee-in a tûl a tih chuan thlan awm mi a
rawt (nominate) thei ang a, chutiang rawt a neih chuan mi 12 (sâwm pahnih) tal
rawt tûr a ni. Inthlannaah member kalten a tûl an tih chuan mi 3 (pathum) aia tam
lo an rawt belh thei ang.
5) (a) A mal mal (post by post) in emaw, mi 6 (paruk) a rualin emaw thlan a ni ang.
(b) Mi 6 (paruk) thlan chhuah an nih chuan thlantlinten nihna an invuah ang.
(c) Secret Ballot-in thlan a ni ang a, vote hmu sâng ber chu tlinga puan a ni
ang.Vote hmu sâng inang an awm chuan, a sâng inzâtho atang khân thlan that
leh tûr a ni ang.
6) Branch Executive Committee-in thlanpuitu atân Returning Officer leh a tanpuitu
tûl a tih zât a ruat ang. Inthlan buaipuitute chu thlan theih a ni lo vang.
7) Branch YMA hruaitu tharte chu April thla ral hmain Central YMA Office-ah hriattîr
tûr a ni.
8) Hun laklawhah Office Bearer hmun ruak a awm chuan Branch Executive
Committee zîng atangin a aiawh tûr ruat a ni ang a, term puitlinga chhiar a ni
ang.
9) Branch YMA Office Bearer atâna rawtte chu kum nga tal YMA Member lo ni tawh
an ni tûr a ni.
10) Branch YMA Office Bearer-ah nihna ngai a zâwnin kum thum bâk chelh theih a ni
lo.
30. Charge inhlanna :
Central YMA, Sub-Headquarters YMA, Group YMA leh Branch YMA Office
Bearer kalchhuak tûrten inthlan atanga ni 7 (sarih) ral hma ngeiin charge an hlan
tûr a ni.
BUNG VI
COMMITTEE HRANG HRANG LEH AN MAWHPHURHNA
31. Central Co-ordination Committee (CCC) :
1) Central Co-ordination Committee chu YMA General Conference dawta thuneitu
sâng a ni a; YMA Programme duan chhuah te, General Conference thurêl tûr
(Agenda) thlitfim te, General Conference thurêl bawhzui te chu a hna a ni ang.
2) |ûl zualah chuan Special Conference a ko thei ang.
3) Kum tin November, April leh September thlaa Nilaini vawi hnihnaah te an thu
thîn ang.
4) CENTRAL CO-ORDINATION COMMITTEE
MEMBER TE:
(a) Central YMA Office Bearers;
(b) Central Executive Committee Members;
(c) Sub-Headquarters YMA aiawh 6 (paruk);
(d) Group YMA aiawh 2 (pahnih);
(e) Aizâwl khawpui Branch YMA aiawh pakhat;
32. Central Executive Committee (CEC) :
1) Central Executive Committee chu YMA pumpui khaikhâwmtu, kaihruaitu leh
thawhhona kawnga mawhphurtu ber a ni.
2) A HNA PUAL :
(a) General Conference leh Central Co-ordination Committee thurêl a bawhzui ang.
(b) YMA Office chu Central Executive Committee-in a enkawl ang a, hnathawktu lâk
leh enkawl pawh a mawhphurhna a ni ang.
(c) Central Executive Committee chuan kawng hrang hranga hma a lâknaah tûl a tih
angin kum khat atân Sub-Committee peng hrang hrang a siam thei ang.
(d) YMA kalphung leh awmdân tûr anga awm lo ni a Central Executive Committee-in
a ngaih Branch YMA, Group YMA leh Sub-Hqrs. YMA te chu tûl a tih angin,
Central Executive Committee-in an chungah thutâwp a nei ang.
3) Thla khatah vawi khat tal Central Executive Committee Meeting an nei tûr a ni.
President nên inrâwnin General Secretary-in a ko thîn ang.
4) CENTRAL EXECUTIVE COMMITTEE
MEMBER-TE :
(a) Central YMA Office Bearers.
(b) Central YMA Office Bearer-ten Executive Committee Member 20 (sawmhnih) an
ruat te;
(c) Central Executive Committee-in a ruat Sub-Committee Chairman leh Secretaryte.
(d) Central YMA Office Bearer te, Office Bearer-ten
Executive Committee Member an ruat te, Sub-Committee Chairman leh
Secretary te chu a huhova hna an thawhna leh mawh an phurh tlânnaah ‘Central
Executive Committee’ tih a ni ang.
33. Sub-Headquarters Executive Committee :
1) Sub-Headquarters Executive Committee chuan a huam chhûnga Group YMA leh
Branch YMA-te thawhhona leh tan lâk dân tûr a ngaihtuah ang.
2) Central Co-ordination Committee leh Central Executive Committee-in tih tûr
chanvo a tuk te chu tihhlawhtlin a tum tûr a ni.
3) Sub-Headquarters Executive Committee chuan kawng hrang hranga hma a
lâknaah tûl a tih angin Committee peng a siam thei ang.
4) Kum tin September thlaah Central YMA-ah report a pe ang.
5) A tûl angin Sub-Headquarters Executive Committee neih tûr a ni. President nên
inrâwnin Secretary-in a ko thîn ang.
6) SUB-HEADQUARTERS EXECUTIVE
COMMITTEE MEMBER TE :
(a) Sub-Headquarters YMA Office Bearers;
(b) Sub-Headquarters YMA Office Bearer-ten mi 10 (sâwm) an ruat te;
(c) Sub-Headquarters thuthmun President/Branch aiawh mi 1 (pakhat);
(d) Sub-Headquarters Executive Committee-in Committee peng a ruat Chairman leh
Secretary te.
7) A tul angin Sub-Headquarters YMA Co-ordination
Committee (SCC) a din thei ang.
Sub-Headquarters YMA Co-ordination Committee (SCC) chu SubHeadquarters
Conference dawta thuneitu sâng a ni a, YMA programme duan te,
Sub-Headquarters YMA Conference thurêl tûr (Agenda) thlitfim te,
Sub-Headquarters YMA Conference thurêl bawhzui te chu a hna a ni ang.
34. Group Executive Committee :
1) Group Executive Committee chuan a huam chhûnga Branch YMA hrang hrangte
thawhhona dân tûr leh hmalâk dân tûr a ngaihtuah ang a, Branch YMA chak lo
deuh an awm chuan a chakna tûrin kawng a dap pui ang.
2) Central Co-ordination Committee-in emaw, Central Executive Committee-in
emaw, Sub-Headquarters Executive Committee-in emaw tih tûr a tukte chu
tihhlawhtlin a tum tûr a ni.
3) Kum tin September thlaah Central YMA Office-ah report a pe ang.
4) Kum khatah vawi hnih tal Group Executive Committee neih tûr a ni.
5) GROUP EXECUTIVE COMMITTEE
MEMBER TE :
(a) Group YMA Office Bearers;
(b) Group YMA Office Bearer-ten tûl an tih zât Executive Committee Member an
ruatte;
(c) Group YMA Office Bearer te leh Group Committee Member-te hi a huhova an
thawhnaah leh mawh an phurh tlânnaah chuan ‘Group Executive Committee’ tih
a ni ang.
35. Branch Executive Committee :
1) YMA thil tum leh din chhan te, Kaihhruaina leh Thuthlung tihlawhtling tûrin tih tak
zetin hma a la ang.
2) Khawtlâng nun a lo mawi a, hma a sâwn theih nân hma a la ang a, khawtlâng
thenfai leh hmasâwnna lamah a tûl angin Sawrkar hmalâkna a tawiawm ang.
3) Mizo tlâwmngaihna chawisâng zêlin, mite zirtîr zêlin, Mizo khawsak chunga
Chhiatni |hatni a, Mizo tlâwmngaihna hlenchhuak zêl tûrin a kaihruai ang.
4) YMA thawhhona leh inzawmna tinghet tûrin Group,
Sub-Headquarters leh Central YMA-in tihtûr leh chanvo a tukte tihhlawhtlin a tum
ngei tûr a ni.
5) Kohhran, Khawtlâng hruaitu leh tlâwmngai pâwl dangte lungrual taka thawhpui
thiam tûr a ni.
6) Branch Executive Committee-in kawng hrang hranga hma a lâknaah a tûl a nih
chuan Sub-Committee te, Incharge Secretary te a siam ang.
7) September thlaah Central YMA-ah report a pe ang.
8) Branch YMA-in hmunhma record fel takin a vawng ang a, Central YMA-ah report
a pe ang.
9) Branch Executive Committee Meeting chu thlatin vawi khat tal neih tûr a ni a,
President nên inrâwnin Secretary-in a ko thîn ang.
10) BRANCH EXECUTIVE COMMITTEE
MEMBER TE:
(a) Branch YMA Office Bearers;
(b) Branch YMA Office Bearer-ten Executive Committee Member tul an tih zât an
ruat te;
(c) Branch YMA-in Adviser tûl a tih zât a ruat te.
11) SECTION YMA :
(a) Branch Executive Committee-in Branch tichak tûra tûl a tih chuan Section
YMA a siam thei ang. Section siam a nih chuan hetiang hian hruaitu an awm ang
:
1. Leader 2. Assistant Leader
3. Secretary 4. Assistant Secretary
5. Treasurer 6. Finance Secretary
(b) Section YMA chu a dintute hun chhûng zêl atân a ni ang.
(c) Section YMA hian a dintute term tawp dâwnah Minute Bu, pawisa te
Branch YMA in a enfel hnuah Branch YMA-ah a pe lût ang.
(d) Bungrua a nei hrang tûr a ni lo.
(e) Hêng bâkah hian Branch-in tûl a tih chuan Section Kaihhruaina a siam thei
ang.
(f) Hun laklawhah pawh tûl a tih chuan Branch Executive Committee-in Section a
thiat thei ang.
12) YMA Chhang din lo chuan YMA thiltum leh a din chhante, Mizo hnamzia leh
nunphung tha naupangte hnêna zirtîr kawngah hma a la ang.
36. Office Bearers Meeting :
Thu hmanhmawh bik ngaihtuah tûr te, Executive Committee thurêl bawhzui tûr
an kuta awm ngaihtuah tûr tein a tûl hun apiangah Office Bearers Meeting a thu thîn
ang. An thurêl leh an bawhzui dân te chu Executive
Committee awm hmasa berah an thlen ang.
37. Rorel thei chin :
Executive Committee Meeting-ah hian Executive Committee Member hmun
thuma thena hmun khat an kal chuan rorêl theih a ni ang a; amaherawhchu, Office
Bearer 2 (pahnih) tal an tel loh chuan Committee Meeting neih theih a ni lo vang.
38. Thurêl nun hun chhûng :
YMA Committee rêng rêngin term khat chhûnga a thu pass tawh chu, pass-tuten
an hlip a nih loh emaw, hman zui theih loh a nih bawk si loh emaw, term danga
hruaituten an paih emaw a nih loh chuan, term dangah pawh hman zui zêl tûra ngaih a
ni ang.
39. Member ni sa :
Central Executive Committee, Sub-Headquarters
Executive Committee leh Group Executive Committee Member te chu an awmna
Branch YMA Executive Committee-ah member ni sa (Ex-Officio Member) an ni ang.
40. Joint YMA :
Aizâwl khawpui pâwn leh Sub-Hqrs. thuthmun pâwn lamah chauh Branch YMA
pakhat aia tamin, an thawhhona atân thil tûl bik a awm a nih chuan Joint YMA an nei
thei ang.
Joint YMA chu, Group YMA awmnaah chuan, Group YMA kaltlangin Central
Executive Committee remtihna la hmasain din theih a ni ang a, anmahni chhûngah kum
tin Office Bearers inthlang/inruatin Executive Committee peng dang dang pawh a siam
thei ang. Joint YMA hnênah chuan Central,
Sub-Headquarters leh Group YMA atanga thu chhuakte a tûl dân a zirin hriattîr thîn a ni
ang. A remchân dân angin mawhphurhna leh chanvo hrang hrang pêk theih a ni ang a,
tûl bik thilah chuan tihtûr bik pawh pêk an ni ang a, a tûl ang zêlin report pawh a pelet
tûr a ni.
Joint YMA chhûngah buaina a awm chuan Group YMA-ah thlen a ni ang a,
SubHeadquarters YMA huam chhûnga Group YMA-ten an theih bâk chinfel ngai a awm
chuan,
Sub-Headquarters YMA-ah an thlen ang. Sub-Headquarters YMA awm lohna Group
YMA-ah erawh chuan Central YMA-ah an thlen ang.
BUNG VII
CONFERENCE
41. General Conference :
1) YMA General Conference chu kum khat danah neih a ni ang a, Central Executive
Committee-in a ko thin ang. YMA General Conference hi YMA thuneitu sâng ber
a ni. YMA General Conference neih loh kum chuan rorêl inkhâwm neih thin a ni
ang.
2) General Conference-ah hian infuihna lam chi thupui neih thin tûr a ni.
3) ROREL LEH ROREL PALAI :
(a) Central YMA Office Bearers;
(b) Central Executive Committee Members;
(c) Central YMA Office Bearer lo ni tawh te;
(d) Sub-Headquarters Office Bearers;
(e) Sub-Headquarters Executive Committee Member 10 (sâwm);
(f) Group YMA aiawh mi 6 (paruk);
(g) Branch YMA aiawh mi 6 (paruk)
4) CONFERENCE AGENDA LUH DAN :
(a) Group YMA Conference leh Group Executive Committee te, SubHeadquarters YMA
Conference leh Sub-Headquarters Executive Committee te
leh Central Executive Committee atanga thu lo lûtte chu Central
Co-ordination Committee-in a thlifîm ang a, Central Co-ordination Committee-in
tûl a tih te Conference Agenda a ni ang.
(b) Aizâwl khawpui chhûng Branch/Direct-a a awp Branch YMA-te chuan
General Conference Agenda atân an thlen duhte chu Central Executive
Committee-ah an thlen ang a, Central Executive Committee-in tûl a tihte chu
Central Co-ordination Committee-ah a thlen ang.
42. Sub-Headquarters YMA Conference :
1) Sub-Headquarters YMA-a thuneitu sâng ber a ni a,
Sub-Headquarters inrêlbâwl dân ngaihtuahtu a ni.
2) Sub-Headquarters YMA Conference chu kum khat danah neih tûr a ni.
SubHeadquarters YMA Conference neih loh kumah rorêl inkhâwm neih tûr a ni.
3) ROREL LEH ROREL PALAI :
Branch YMA tin atanga Branch YMA aiawh mi 6 (paruk) te, Group Executive
Committee Member te, Sub-Headquarters Executive Committee Member te leh
Sub-HeadquartersYMA hnuaia Committee hrang hrang Member-ten ro an rêl ang
a, chu chu Sub Headquarters YMA Conference rorêl a ni ang.
4) CONFERENCE AGENDA LUH DAN :
1) Agenda chu Group YMA Conference/Executive
Committee-in Sub-Headquarters Executive Committee-ah a thlen ang a,
SubHeadquarters Executive Committee pawhin tûl a tih chuan Agenda a nei thei
bawk ang.
2) Sub-Headquarters YMA thuthmun khâwpui chhûng Branch-ten Agenda tûr hi an
thawh thei ang a, Sub-Headquarters Executive Committee-in a thlifim leh ang.
43. Group YMA Conference :
1) Kum khat danah Group YMA Conference neih tûr a ni. Group Conference neih
loh kumin Group rorêl a awm ang.
2) ROREL LEH ROREL PALAI
Group YMA Conference-a rorêl tûrte chu Group Executive Committee leh Branch
Executive Committee Member-te an ni ang.
3) CONFERENCE AGENDA LUH DAN :
Group YMA Conference Agenda atâna Branch YMA rawtna te chu Group
Executive Committee-ah thlen a ni ang a, Group Executive Committee pawhin tûl
a tih chuan Agenda a nei thei bawk ang.
4) Group YMA Conference-ah hian member-ten an sâwtpui tûr chi thupui, infuihna
lam neih tûr a ni ang.
5) Group YMA Conference report leh thurêlte chu Central YMA Office-ah thehluh tûr
a ni a. Sub-Headquarters YMA huam chhûnga Group YMA-te chuan
Sub-Headquarters-ah an thehlût tûr a ni.
BUNG VIII
YMA CHHANG
44. YMA Chhang din dân :
1) Naupang kaihhruai nân Branch YMA-in tûl a tih chuan ‘YMA Chhang’ a din thei
ang.
2) YMA Chhang hi pâwl hrang ni lo vin, Branch YMA hnuaia naupang kaihhruaina a
ni.
3) Kum bithliah awm chuang lo vin, YMA Member la ni rih lo naupang tân a ni.
45. YMA Chhang thil tum :
1) |anpui ngaite tanpui
2) Mizo tlâwmngaihna chawisân
3) Khua leh tui tha nih
4) Aia upa zah
5) Zirna ngaihpawimawh.
46. Membership Fee :
Membership Fee Rs. 2/- (Cheng hnih)
47. YMA Chhang hruaitu :
Branch YMA-in kum khat tang tûrin YMA Chhang ngaihtuah tûr mi pahnih, mipa
leh hmeichhia a ruat ang a, an kaihhruaina hnuaiah kum khat tang tûrin YMA
Chhang hruaitu a hnuaia mi ang hian an awm ang :
1. Leader 2. Assistant Leader
3. Secretary 4. Assistant Secretary
5. Treasurer 6. Finance Secretary
Hruaitute hi YMA Chhang kalkhâwmin an thlang ang a, YMA Chhang Member
zînga mi ngei thlan tûr a ni.
48. Pawisa chungchâng :
A theih angin a mamawh chu a tuak ve ang a, Branch Executive Committee
remtihnain Branch YMA pawisa a hmang thei ang.
BUNG IX
PAWL CHHUNG THUBUAI
49.
1) BRANCH THUBUAI :
(a) Branch YMA-ah inrem lohna leh hruaitute kara buaina leh Branch YMA leh
Branch YMA inkâra buaina a awm chuan, Group Executive Committee-in a rêl
ang. Group Executive Committee-in a rêl fel thei lo a nih chuan, SubHeadquarters
Executive Committee-in emaw, Central Executive Committee-in
emaw a rêl ang.
(b) Group YMA awm lohna hmunah chuan Sub-Headquarters Executive Committeein
emaw, Central Executive Committee-in emaw a rêl ang.
2) GROUP THUBUAI :
(a) Group YMA-ah buaina lo awm sela, Sub-Headquarters YMA huam chhûng
Group YMA te chu Sub-Headquarters Executive Committee-in a rêl ang.
(b) Group YMA dang erawh chu Central Executive Committee-in a rêl ang.
3) SUB-HEADQUARTERS THUBUAI :
Sub-Headquarters YMA chhûngah buaina lo awm sela, Central Executive
Committee-in a rêl ang.
4) CENTRAL YMA BUAINA :
Central YMA-ah buaina a lo awm chuan Central Co-ordination Committee-in a rêl
ang.
5) THUBUAI DANG :
(a) YMA leh Pâwl dang emaw, mimal kârah emaw, thubuai hlabuai lo awm sela,
YMA aiawhin President a ding ang.
(b) A theih hrâm chuan YMA chhûngkaw buaina hi rorêlna (Court)-a thlen loh tûr a
ni.
BUNG X
DAN SIAM LEH DAN SIAM |HAT CHUNGCHANG
50. Dân siam that :
YMA General Conference-in YMA Dânpui (Constitution) hi a tûl ang zêlin belh
ngai belh a, paih ngai paih a, a thlak ngai thlak a, a chiang lo lai tichiangin a siam tha
thei ang. Dân siam that hi kum ngâ a ral hma chuan siam that loh ni se.
51. Dan siam that rawtna :
1) YMA General Conference te, Sub-Headquarters YMA Conference te, Central
Executive Committee leh Central Co-ordination Committee-ten dân siam that tûl
ni a an hriat lai emaw, paih ngai emaw, siam belh ngai emaw, tihdanglam ngai
emaw awma an hriat chuan, rawtna an siam thei ang.
2) DAN SIAM |HAT ATANA RAWTNA CHU :
(a) Sub-Headquarters YMA leh Group YMA chhûnga Branch YMA hrang hrangte
rawtna chu, Group YMA leh Sub-Headquarters YMA te pawmpui a nih hnuah
Central Executive Committee-ah thlen tûr a ni.
(b) Aizâwl khawpui chhung Branch YMA leh direct-a awp Branch YMA te, Group
YMA Conference te leh
Sub-Headquarters YMA te chuan an rawtna chu Central Executive Committee-ah
an thlen ang.
(c) Central Executive Commttee-a rawtna lût, Central Executive Committee
pawmpui chinte leh Central Executive Committee rawtna rêng rêng chu, Central
Co-ordination Committee-ah put luh a ni ang a, Central Co-ordination
Committee-in rem a tih hnuah General Conference-ah put luh a ni ang.
(d) Dân siam that thu chu, General Conference rorel palai
2/3 (hmun thuma thena hmun hnih)-in rem a tih chuan General Conference zawh
ni atangin Dân a hman nghal tûr a ni ang.
YMA Dan bu ennawn rawtna a awmin General Conference-ah rorel palai
2/3(hmun thuma thena hmun hnih) in rem an tih chauhin ennawn theih a ni ang.
BUNG XI
YMA SUM VAWN DAN
52.
1) YMA sum chu Finance Secretary kutah a lût hmasa ang a, Receipt bu-ah a
dawng ang a, Account bu-ah a ziah fel hnuin Treasurer hnênah a hlan ang.
2) YMA sum hmanralna thuneitu chu Executive Committee a ni ang.
3) YMA pawisa hmanna rêng rêngah hmanral a ni ngei tih hriatna (Voucher) a tel
ngei tûr a ni.
4) YMA sum hi kum tin vawi khat endik (audit) tûr a ni a, Executive Committee-in a
endiktu a ruat ang.
5) YMA sum hi tibo emaw, hmang dik lo emaw chuan a rûl leh ngei tûr a ni.
6) A theih hrâm chuan YMA sum hi Bank-ah dah tûr a ni a, Central YMA leh
SubHeadquarters YMA chuan an dah ngei tûr a ni.
7) Receipt bu leh Voucher-te hi audit hnuah Executive Committee-in a pawm hma
chu tihral theih a ni lo.
8) Central YMA leh Sub-Headquarters YMA chu Office neia hnathawktu awm a nih
avângin Executive Committee-in Financial Rules an siam ang.
BUNG XII
YMA INLEH LEH TIHTAWP
53. Pâwl danga YMA inleh :
1) Engvâng pawhin Branch YMA pâwl danga a inleh chuan, YMA pawisa, bungrua
leh thil neih dangte Group YMA Executive kutah a awm ang.
2) Group YMA awm lohnaah chuan Sub-Headquarters Executive Committee emaw,
Central Executive
Committee kutah emaw a awm ang.
54. YMA tihtâwp :
YMA hi tihtâwp tûr a nih ngai chuan, tihtâwp theihna neitu chu Special
Conference a ni ang a, bungraw tih sawn theih leh tih sawn theih lohte dehral
thuah pawh thutâwp a siam ang.