DIAKKAWN BÛNG CHHUI CHIANNA

K. Zalawma

Thuhma : Tuna Diakkawn Square an tih tâk-ah hian 1959 kumah Bûng phun a ni a,
kum 45 lai a ding a, he Bûng hi a phuntu sawi dan inan loh avangin a chhui
chianna ka ziak a, chu chu Kolasib Writers’ Club Monthly Mengazine LAISUH
December 1999 Isue-a chhuah a ni.

Diankkawn Bûng hi khawlai zau laia awm a nih avangin a hlim hnuai hi bazar nân
te, Public Meeting nân te, khualzin tur leh feh kal tur innghah khâwm nân leh
chawlh khâwm nân hmangin miin an bêl nasa em em ṭhin. Engtik lai emaw khân
mi ṭhenkhan zâna tawm khawm ten a bulah mei an lo chhêm a, a pang chu hâwng
nei leh thei lo khawpin a ro ta a. Tin, a bul hi lungrema hung a ni bawk a, a vel hi
kawngpui alkatra luan vek a nih bawk avangin lei tha leh tui a hmu ṭha lo ni
bawkin a lang.
Kum 2004 a lo her chhuah meuh chuan a kung chu a lo ro zo ta a; January ni 4,
2005 chuan a kung ro chu kiha senghawi a ni ta a. Kum khat leh a chanve zet chu a
ruak huai a, June ni 8, 2006-ah Bûng dang phun a ni leh ta a; chutih lai a MP(RS)
Pu Lalmingliana chu phuntir a ni a, Tunah hian a buk ṭha leh tawh viau a ni. Hei hi
Diakkawn Bûng II-na a ni.

Khai le, Diakkawn Bûng I-na phuntu chhui chianna chu i lo chhiar ang ule…

1. Zaiin ka chawi nâng che – Diakkawn Bûngpui,

Ami zalêng zinga dâwn thuipa’n a lo phun che;
‘Sib khawpui laitual màwiin i lo seilian,
Zalêng zawngte belhlai Bûngpui dam reng rawh.
Hei ang belhlai siahthing dang awm ve maw?
Van hnuai hnam tin naufa I zâr hnuaiah;
Zârva iangin kan lêng e- chhûn leh zânin’
_Hringfate tân belh ninawm loh –Diakkawn Bûngpui.
2. Chhak leh thlang, chhim leh hmara ramṭuan tûr
Leh, zawrhsum tin rêng nghâktu leh chhingkhual kâr hlâ’ mi’n;
I zâr hnuai daihlim an bêl, kir an rêl lo,
Chung Pathian ruat ngei lo ni – DIAKKAWN BUNGPUI. (¹)

1. SAWI HAWNNA: Kan thupui hi ‘Diakkawn Bûng chhui chianna’ tih a ni a,

mi tam takin Diakkawn Bûng hi tu phun nge tih leh, engtik kuma phun nge
tih te kan ngaihvenin ni-a kan hriat dân te kan sawi ṭhin a, ziak mêk te pawh
kan awm zêl niin ka hria a; a hre chiang duhte tân a la ṭangkai ringin ka theih
ang angin ka han chhui chiang ve a ni.
2.
Kolasib Diakkawnah hian Bûng lian tawh tak tak pathum lai, inhlat lo tê têah a
awm hlawm avangin, kan chhui tur ber chu tuna Diakkawn Biakin leh Salem Veng
kawng leh, Silchar kawng leh Venglai lam panna kawng peng ṭhuam lai taka ding
hi a ni a; a behbâwmah a dangte pawh kan sawi tel nual ang.

Kan Mizo Histoty-ah chuan Kâwlzâwl Bûngpui chanchin a awm a, kan pi pu-ten
thlang an tlâk dawnin kawlzâwlah bûng an phun a, “ ‘He Bûng zâr hian lei a sik
hunah kan lo kir leh ang’ an ti e,” an ti a. Tun thlengin he Bûng zungpuak hi a la
awm a ni âwm e. Bûng hi thing lian duh tak, dam rei thei tak a niin hming chher
nân pawha ṭha tak a ni a, chi hrang hrang a tam mai. Hla thuah chuan ‘Phunbûng’
an ti ṭhin.
Chutiangin tuna kan sawi tûr ber pawh hi a awmna hmun a lailiin mihring tân
ṭangkaina leh hnawksakna te pawh a neih theih avangin ngaihthah mai chi a ni lo
va; nakinah chuan a chanchin hi chîk zâwka chhuia chhinchhiah duhte kan la awm
takin a chanchin lo ziak hi thil ṭangkai ni tûrah ngai ila.

Kolasib-ah hian Bûng chi hrang hrang a awm nual a, entirnan:- Khuangpuilam
thlânmual hluia mi te, Venglai thlanmuala mi te, ICAR Office bula mi te, PWD
E.E.Office kawta mi te, etc. Hengte pawh hi record fel taka vawn a ṭha khawp mai.
Govt. Kolasib Middle School, Kolasib kawta Rihmîm bûng pawh hi a phuntu nia
insawi an tam khawp mai an ti.

Kolasib chhim lam, Thingdawl lam aṭanga i lo kal chuan, Diakkawnah ṭhelrêt
bûng, a bui aṭanga pêng - ṭhuam thum laia kâk i hmu ang a, hei hi Pu P.C.
Thanvêlan(fam) 1972 kuma a phun a ni. Chu bûng aṭanga hla lo têah Bûng lian tak
a lo awm leh ang a, hei ngei hi ‘Diakkawn Bûng’ kan tih chu a ni.

2. A HRIATE SAWI DAN:

Diakkawn Bûng hi engtia phun nge ni a, engnge an phun chhan tih leh, engtik
kuma phun nge tih leh, tu phun nge? tih zawhna chhannate:-
1. Pu R.S. Engliana sawi dan (²):

“Tuna Eldorado, Pu Sangkhuma in awmna vêlah khian khiang thing a ding a, chu
chu ka pa R. Thanghleian sikul sak nân Pu Ch. Saprawnga, CEM hnenah kih a dil
a, a aiah a hminga thing dang phun tura a tih angin he Bûng hi 1959 kumah a phun
ta a ni. Pawl thum kan zir kum a ni a, Pawmngên tlânga bûng zâr kan han la a, chu
chu kan phun ta a ni.”

2. Upa Lalruanga, Zirtirtu Rtd. Sawi dan (³):

“Kum 1957-ah Venglai thlanmuala bûng, Pu Kâpa, Pawmngên tlânga mi phun zâ.r
saw kan la a, Diakkawn-ah hian kan phun ta a ni. Pu Lalchungnunga DIS hmingin
kan Sikul kawt (P/S II)-ah hian kan phun bawk. D.C Rest House kawta mi te nen
hian kan phun rual vek a ni. Pu CH. Saprawngan Diakkawna mi hi, ‘Ka hminga in
phun a nih chuan lo hung ula,” a tih angin a hnuah pawh kan hung nghe nghe."

3. Pu P.C Hmingthanga sawi dan (⁴):

“Kum 1959-ah Diakkawn Primary School naupang, Class III zirlai mipa
naupangten Venglai Pawmngên tlânga Pu Thangvela pa Pu Kâpa bûng zâr thlâkin
Diakkawn Bûng hi kan phun a ni. Phun dawn laiin Lalmaka, tuna College Venga
awm hi a chilh ṭap nghe nghe a ni. Phun chhan hi Pu R. Thanghleia sawi dân
chuan, ‘School Inspector Pu Dârthankiman, In lo phun thei ang em?’ a tih vanga
phun niin naupangte min hrilh. He mi rual hian D.C. Rest House Compound-ah leh
tuna puanṭhuiho luah lane-ah hian in a la din hmain phun tel nghal a ni a, inhmun
atâna pêk a nih tâkah tunah hian hmuh tur a awm tawh lo a, D.C. Rest House
Compound-a mi pawh a ṭhen chu a awm tawh lo a ni.”

4. Pu Lalmaka sawi d^n (5):

“1957 kumah Diakkawn Primary School naupangten Pawmngên tlânga mi bûng,
Pu Phunga (Pu Kâpa nupuia pa) bûng zâr kan la a, a sât thlatu pawh ka ni nghe
nghe. Chu chu kan phun a, Rest House kawtah te, tuna Pu J. Sânglûra building
bulah te, Pi Ngûrchhingite in thlengin kan phun chho thluah a, School kawtah
pawh kan phun. Diakkawna mi khu a zâr lian bik kan phun a ni. Tuna Rest House
bula bûng la awm khu chu mi dangin tlai deuh zawka an phun niin ka hria. He tih
laia kan Head Teacher chu Pi Thangṭhuami, Ṭumpui a ni a, 1959-ah chuan Middle
School-ah pawl nga ka zir tawh,”

5. Pu Lalsangliana sawi dan (6):*

1957-ah Lunglei aṭangin Kolasib-ah kan lo pêm phei a, 1958-ah pawl hnih ka zir a,
1959-ah pawl thum. He mi kum hian Pawmngên tlânga bûng zâr khi sat thlain
Diakkawn Bûng hi kan phun a, kan phun tûr zâr hian Lalmaka chem a delh kawi
lehnghal. Diakkawn Bûng hi a zâr lian ber kan phun a ni a, a dang chu Rest House
kawtah te, tuna Pu Sanglura in bulah leh Pi Ngûrchhingi te in zâwnah te khian kan
phun chho thluah a; chûngho chu inhmun atân an pêk avângin a awm tawh lo.
Diakkawn Primary School kawta mi kha chu kan lo pêm pawhin a awm tawh.”

6. Pu Laldingliana sawi dan (7):

“Ka pa hi Kolasib Block-a thawk tûra sawn a nih avangin 1958 January thlaah
Kolasib-ah Lunglei aṭangin kan lo phei a. 1959-ah pawl hnih kan nih kumin
Pawmngên tlânga mi Pu Phunga bûng zâr kan zâwn thla a, a lian ber chu
Diakkawnah kan phun a, Pakhat chu Pu Sanglura inhmunah khian kan phun
bawk.”

7. Pi Thangṭhuami, Head Teacher Rtd. Sawi dan (8): “Diakkawn Bûng hi Pu

Thanghleian, ‘Nakin atân a hlim a la nuam dâwn a, I phun ang u,’ tiin naupangho a
phunpui a ni a. Hetih lai hian Head Teacher-in Diakkawn Primary School-ah hian
ka awm. Tin, School kawtah hian Pu Lalchungnunga kan phuntir bawk; a kum
chiah erawh ka hre ta lo.”

3. DIAKKAWN BUNG HI ENG VANGA PHUN NGE?:

Diakkawn Bûng phun chhan hi sawi dân a inang lo nual a, Pu R.S. Engliana chuan
sikul hmanrua tur khiang aia phun leh, hetih laia Mizoram C.E.M hminga phun
niin a sawi a; hei hi Zirtirtu Lalruanga pawhin a thlâwp a. Pu P.C. Hmingthanga
erawh chuan Pu Dârthankiman lo phun rawh u a tih vânga phun niin a sawi thung
a. Hetih laia Head Teacher Pi Thangṭhuami chuan a hlim a la nawm dâwn avanga
phun niin a sawi thung a; naupan laia thil hriat chu a naupang thil hriat deuhah ngai
ta ila, zirtirtu Lalruanga te hriat dân hi mi pahnih ṭan dunna a nih avangin dik tûrah
i lo ngai phawt teh ang; Pi Thangṭhuami hriat dan nên pawh hian a ṭang tlâng thei
tho awm e, hetiangin :- Diakkawn Bûng hi Pu Ch. Sâprâwnga hmingin Primary
School zirtirtu Pu R. Thanghleia leh Pu Lalruanga hoin pawl thum zirlai naupangte
nen a hlim nakina la hman ṭangkai atân an phun a ni.

4. KHAWIA MI NGE AN PHUN?:

Diakkawn Bûng hi khawia mi nge phun a nih tih hriat dân pawh a la dang ta zêl a.
Zirtirtu Lalruanga chuan Venglai thlân mual, Project Venga Pu Kâpa bûng phun
zâr niin a sawi a; mi dangte hian Pawmngên tlânga Pu Phunga bûng zâr niin an
sawi thung a. Pi Aiziki (9) sawi dan chuan, “Pawmngên tlânga bûng kha (tunah
chuan an kit tawh a) ka pain 1938 kum vêla a phun a ni a, chumi hnuah Venglai
thlanmuala mi saw ka u Kâpan (ka u pasal) a phun leh a ni, a phun kum chiah ka
hre ta lo,” a ti. He thuah hian School naupang , bûng zâr latu ho-ten an hriat dân a
inan vek avangin Pawmngên tlânga mi ngei niin a lang.

5. ENG TIK KUMA PHUN NGE?:

Diakkawn Bûng phun kum hi hriat dan a la inang lo ta cheu a, a sawitute hian an
hre chiang viau mai bawk si a; ṭum hnih phun lah a ni âwm bawk si lo. 1957 kuma
phun nia sawitu Upa Lalruanga, zirtirtu leh Pu Lalmaka te bâkah Pu R. Thanghleia
zirtirtu (10) note bu 1987 kuma a ziakah hetiang hian a chuang : “Diakkawn
Primary School hawn ni - 12.6.1957. Diakkawn Bûng phun ni – ni 7.7.1957. July
1987-ah Bûng kum 30 a tling”_ tiin. Pu R. Thanghleia sawi hi Diakkawn Bûng hi a
nih tak tak chuan 1957 kuma phun ngei ni âwmin a lang thei. A note bua ziak
erawh a chĭrĭ deuh.

1959 kum nia hriate ṭanhmun pawh hi a chiang viau mai. Pu Lalsangliana te unauin
Lunglei aṭanga Kolasib-a an lo pêm phei kum an hriat dan hi a inang lo deuh nâ a,
Pu Laldingliana hian a thla nen lam a sawi theih avang hian a dik zawkah ngaiin
January 1958-ah an lo phei niah pawm ila; an lo pem nachhan pawh an pa Pu
Bawngleia chu Kolasib Block-a thawk tura sawn a nih vâng a ni a. Pu H.
Thankunga (¹¹) chuan, “1957 October thlaah Ṭumpui Field-ah Pu A. Thanglura’n
Kolasib Block a hawng a, mahse, 1958-ah function chauh a ni,” a ti. Pu
Lalsangliana te unau hi January 1958-ah Kolasib-a lo phei chauh an nih leh,
Kolasib Block function tak tak hi 1958 a nih thu hi a induh hle a. Pu Laldingliana
hian 1958-ah chuan Class I a nih thu leh, Class II a nih kuma Bûng hi phun a nih
thu a sawi te, Pu P.C. Hmingthanga’n 1957-ah chuan phai lamah a la awm thu a
sawi chian theih bawk avangin Diakkawn Bûng phun kum hi 1959 niah a pawm
ngam ang.

Chuti a nih chuan Zirtirtu Thanghleia note bu-a Diakkawn Bûng phun ni 7.7.1957
tih hi a dik lo emni ta ang? Pu Lalruangan Pu Lalchungnunga DIS hmingin school
kawtah bûng an phun bawk tih a sawi kha, Pi Aiziki pawhin, “School kawta bûng
kha D.I. bûng kan ti ṭhin,” a lo ti ve bawk a. He bûng hi Pu Lalsangliana chuan,
“Kan lo pêm phei chuan a lo awm tawh,” a ti bawk a, kei pawhin he bûng hi ka
hmu ve hman a, 1980 thleng kha chuan a la dingin ka hria.
Pu R. Thanghleia’n 1958 kuma bûng hla a phuah - a thupuia ‘Pu L. Chungnunga
B.A.,B.T.,D.I.S’ tih a vuah ---
Phunbûng pui leh sikul rûnpui kâra’n,
Uai lo te’n chûn chawi lai kan lêng ṭhin;
Lal lai pâr tlàn sihnau ang kan nui,

Chung tûrni kan tawi thlangtiang khûm zo ṭhin… tih hla aṭang hian, he sikul kawta
bûng hi ni 7.7.1957-ah an phun zawk ni âwm tak a ni. School hi ni 12.6.1957-ah
hawn a nih chuan, thla khat pawh la tling lo, a thla leh lawkah he School kawta
bûng hi an phun ta a niang. Hei hi Pu R. Thanghleia hian a hnu kum 30 lai liam
tawh 1987 kumah a note ziakah hian Diakkawna mi nen hian a ngaih pawlh ta a ni
ang e.

6. BUNG PHUN DANGTE KHA:

Diakkawn Bûng phun rual hian a dang pawh phun thluah niin an sawi hlawm ṭheuh
va. Pi Thangṭhuami, Head Teacher chuan, “Pu Thanghleia khân thing phun a uar
khawp a,” a ti a. D.C. Rest House kawt vêlah leh Pi Ngûrchhingi kawt thleng khian
phun chhoh niin a lang a. Tuna Pu Sangkhuma (fam) in hlui zâwk kawmthlang, Pu
Sanglura in bula mi pawh kha kei pawhin ka hmu hman a, ui pum rual zet a nih
hnuah kum sâwm lai liam taah khân he bûng hi a awm ta lo a ni.

Kan thu lâknate hi tuna D.C. Rest House kawt sir Pu Sailianpuia choka chung
zâwna mi hi Diakkawn Bûng phun ruala phun nia hria leh, a hnua phun nia hriate
an nih thu kan hre tawh a; tuna bûng dinhmun leh nihna chu hetiang hi a ni : A
variety – A thuhmun, A len lam – Teh kualin Rest House bula mi - cm 378 dia.
Diakkawn Bûng – cm 322 dia. Cm 56 chauhin a inthlau. A sân zawng: lei aṭanga a
kâkpui – Rest House bula mi – cm 144, Diakkawn Bûng – cm 378 a ni thung.
Chuvangin an pahnih hian phun rual ni âwm tak a ni. A hre chiang zawk kan awm
chuan sawi chian a hun hle mai. _D.C Rest House bula mi hi a phuntu dang hria
kan awm loh chuan Diakkawn Primary School naupangte phun niah a pawm ngam
ang._

7. DIAKKAWN BUNG HI TU PHUN NGE?:

Diakkawn Bûng phun chungchânga kan mi kawmte sawi dân aṭang hi chuan tu
phun nge tih hriat a har viau awm e. Pu R.S. Engliana leh Pi Thangṭhuami te sawi
dân aṭang chauh hian Pu Thanghleia phun nia puh theih dân kan nei ta a; Pi
Thangṭhuamin, “‘Nakinah a hlim a la nuam dawn a, I phun ang u,’ tiin naupangte
Pu Thanghleian a phunpui,” a tih aṭang hian.

Mi tam berin kan lo ngaihdân chuan ‘Pu Thanghleia phun’ tih hi a ni ṭhin a. “Hetih
lai hian Head Teacher i ni si a, I phun a ni zawk lo maw? Pu Thanghleia phun tih
hi i pawm em?” tia zawhna chu Pi Thangṭhuami chuan, “A phuntu nihnaah chuan
engmah hauh leh chuh ka nei lo,” tiin min chhang a ni. Tin, a phunnaa tel lo
pawhin an zirtirtuThanghleia hoa phun a nih thu hi an sawi ṭheuh avangin Pu R.
Thanghleia hi a bul tumtu niah pawm mai ila a hahdam thlak ber ang - ama ziakah
chuan a phun a nih thu a lang lo nâ a.

8. TLANGKAWMNA: Diakkawn Bûng chungchângah hian hetiang hian thutlûkna

lo siam dâwn ta ila: Diakkawn Primary School (tuna P/S II) hi ni 12.6.1957-ah
hawn a ni a, zirtirtute chu Pi Thangṭhuami, Head Teacher, Pu R. Thanghleia leh Pu
Lalruanga te an ni. Ni 7.7.1957-ah School kawt zâwl tâwpah Pu Lalchungnunga
D.I.S chu bûng phuntir a ni a; 1958-ah Pu R. Thanghleian hla-in a phuah a, a
thupuiah ‘Pu L. Chungnunga, B,A.,B,T.,D.I.S’ tiin a tlar tin hawrawp bul zelah a
hmang.

1959-ah Pu R. Thanghleia hoin Pu Lalruanga leh Primary School Pawl thum

naupangten Pawmngên tlânga Pu Phunga bûng zâr la thlain Pu Ch. Saprawnga
C.E.M hmingin Diakkawn Bûng hi an phun a, a bul kawng dungah leh D.C. Rest
House kawtah pawh bûng hi an phun nghal bawk; a huaihawttu ber a nih avangin
‘Pu R. Thanghleia phun’ tih a ni ta zêl a ni.

Diakkawn Bûng hi khawlai laili taka awm a nih avangin hnawkna tam tak a nei ve
a, a ṭang leh a hnah tla mai bâkah a zârin electric hruite a hawlh ṭhin a, thlâk a ngai
fo ṭhin. Hêng avângte hian tihbo duh pawh lo awm ila thil âwm tak a ni ang.
Amaherawhchu, hetiang thil hmingthang leh a buk hlim nuam tak hi humhim zêl a,
a lo hrisel zâwk theih nan mi tinin theihtawp chhuah ṭheuh a, khawtlang thuneitute
pawhin hùmhìm zêl zâwk chi a ni. Kan thu tawp nân he thu ziaktuin a boral mai
hlaua hlaa a lo phuahna châng hian hnû i han khâr teh ang :
3. Ka zâwt vêl van hnuai hnam tin naufa lêng,
Hei ang malsawm siahthing vângkhaw mawitu awm ve maw?
Lo kai ve u a zâr hnuai daihlim bêlin,
Sakruang damna leh duh tin a kim mahna.

4. Mahse khua rei tinkim han dâwn châng leh,

Ram leh hnam, vângkawpui ṭhang zêl tur thlir châng ni hian;
Zalêng zawngte’n lung lâwma belh lai Bungpui,
Hringnun iangin fam I chan ka hlau leh ṭhin.
(Hlauh ang ngeiin he Bûng hi a lo ro ta a, January ni 4, 2005-ah kih a ni ta a ni.)
……………………..
References:-
1. 1993 thleng kha chuan Diakkawn Bûng hnuaiah hian Bazar leh thil zuar hote
zalên takin kan inzuar ṭhin a, chu chu he hla chang hian a rawn sawi a ni.
2. Pu R.S. Engliana hi Ztu. R. Thanghleia , Pi Thangṭhuami zawha Primary School
II-a Head Teacher ni ta Fapa a ni a, Diakkawn Bûng phun lai hian Class III a ni.
He thu ziah lai hian PHE Dept.-ah J.E a ni a, Kolasib Vengtharah a nupui fanaute
nen an khawsa.
3. Ztu. Lalruanga (Upa) hi 1957-ah Diakkawn Primary School hawn tharah hian
rawn sawn a ni. He thu ziah lai hian Diakkawna ama inah an chhungkuain an
khawsa mêk.
4. Pu P.C. Hmingthanga hi Diakkawn Bûng phun kum hian Class III zirlai a ni a,
Diakkawn Govt. M/S-ah Craft Teacher a ni a, he thu ziah lai hian Kolasib
Vengthar Upper Kolasibah a nupui fanaute nen an khawsa mek.
5. Pu Lalmaka hi Diakkawn Bûng phun kum hian Class III zirlai a ni a, he thu ziah
lai hian P&E Dept. E.E. Office-ah Peon a ni a, College Vêngah a nupui fanaute nen
an khawsa a ni.
6. Pu Lalsangliana hi Diakkawn Bûng phun lai hian Class III zirlai a ni a, he thu
ziah lai hian P.W.D Divisionah Head Clerk a ni a, A nupui Fanaute nen Nursery
Vengah an khawsa a ni.
7. Pu Laldingliana hi Diakkawn Bûng phun lai hian Class II zirlai a ni a, he thu
ziah lai hian Fishery Dept.-ah E.O niin Aizawlah a awm mêk.
8. Pi Thangṭhuami hi Diakkawn Primary School-a Head Teacher hmasa ber ni turin
J.B. School aṭangin sawn phei a ni a, 1966-a training tura a kal thlengin Head
Teacher a ni a, a traing zawh hnuin 1985 kuma a pension thlengin J.B School-ah
Head Teacher a ni leh a ni. He thu ziah lai hian Ṭumpuia an mahni inah a tu leh
fate nen an khawsa a ni.
9. Pi Aiziki (81) hi Pu Phunga fanu a ni a, he thu ziah lai hian Diakkawn Biak in
bulah a tu leh fate nên an khawsa a ni.
10. Zirtirtu R. Thanghleia hi Diakkawn Primary School hawn thara zirtirtu ni tûra
sawn luh ve nghal a ni. Pi Thangṭhuami aiin senior mahse sorkar-ah a Junior zawk
avangin Head a ni mai lo va, 1966 aṭangin a pension thlengin he School-ah hian
Head Teacher a ni ta a ni. Diakkawn Bûng chhak lawkah hian an chhungkuain an
awm.
11. Pu H. Thankunga hi Kolasib Block-a IV Grade hna thawk ṭhin a ni a, he thu
ziah lai hian New Diakkawnah a nupui fanaute nen ama inah an khawsa mek a ni.
Note: Diakkawn Bûng hmasa hi tunah awm tawh lo mahse, Kolasib History-a thil
pawimawh tak pakhat a nih ve avangin he article hi Face Book lama dah ṭhat atân
ka han post a ni e. K. Zalawma. 15.8.2021.