1

Karai A Shaman Chyeju Hpe Chye na Hkam La Lu Ai Asak Hkrung Lam A Lak Lai
Ai Lam
1. Karai a shaman chyeju hpe n chye na ai wa.
(a) Hkiba lit li nna, Yubak a, Tsadan a, Mungkan marin marit lam a, hkum sai shan a gyit
hkang da hkrum ai. Lam shagu hpe hkit tsang let myit n sim ai asak hkrung lam hta sak
hkrung nga ra ai. Myit masin kaw na, ngai gaw n kaja ai, yubak lu ai wa re ngu ai yubak tara
a jahkrit shama ai hkrum nga ra ai.
(b) Ngai kaja ai lam galaw lu jang she ngai kaja ai lam hkam la lu na re ngu hkpala kam sham
ai. N kaja ai galaw jang n kaja ai akyu sha hkam la lu na re ngu nna asak hkrung ai. Dai
majaw tinang hkum tinang kaja na matu (sh) shaman chyeju lu na matu tinang a atsam the
shakut taw nga ra ai.
© N kau mi kam sham nna hkye hkrang la hkrum ai chyeju lu la tim, hki ba nna lit li gun let
asak hkrung nga ai. Kaja ai bungli galaw lu ai shaloi, shaman chyeju grau lu la sana re; n
galaw lu ai shani gaw shaman chyeju grit yawm mat wa sana re ngu ai, tinang hkum tinang
mara shagun ai myit kaw ru jung taw nga ai. Lam shagu hta tinang hkum tinang shadawn gyit
na shatai ai. Ngai Karai hpe kade daram tsaw ra ai, ngai Karai a matu gade daram galaw ya lu
sai ngu ai lam hpe shadawn gyit na shatai ai. Ngai Karai a matu kade daram ap nawng lu ai
ngu ai n tsa shadawn gyit na shatai ai. Shinggyim masha gaw galoi n hkum tsup lu ai majaw,
tinang a myit hta myit kaji ai, myit n gut ai, mara lu dum ai, myit hte sak hkrung nga ai.
2. Chye na ai wa
(a) Yubak a, Tsadan a, Mungkan marin marit lam a, hkum sai shan a gyit hkang da hkrum ai
lam n nga, ban sa lu ai, myit pyaw lu ai, myit dik lu ai asak hkrung lam hta sak hkrung lu ai.
Yubak hte Mungkan lam ni hkum shan lam ni a gyit hkang da ai kawn lawt lu ai chyeju Karai
jaw da ngut sai hpe lu la ai hpe atsawm chye na let asak hkrung nga lu ai.
(b) Ngai n kaja ai wa re. Rai ti mung, nye a n kaja ai lam ni yawng a matu Yesu gaw hka wa
kau ya sai. Ngai gaw Yesu a marang e, Karai a man hta ngai kaja ai, n kaja ai hte n seng
sai.Yesu wudang hta ‘ngut mat sali ai’ ngu ai hta nye a matu mung lawm ngut sai majaw,
Yesu a chyeju tara a majaw galoi mung shaman chyeju lu la na wa re ngu myit mang ai lam
galai mat sai wa re. Kam sham ai lam galai mat sai wa re. Hki ba lit li gun ai lam n nga sai
sha, atsang awang sak hkrung lu ai wa tai mat sai. Shaman chyeju lu la na matu tinang hkum
tinang shakut nna asak hkrung ai asak hkrung lam n re. Shaman chyeju n hpaw n ya hkam la
lu ai majaw, Karai a hpung shingkang dan hkrung na matu shakut nna asak hkrung ai, ap
nawng ai, daw jau ai wa she rai mat sai majaw, kabu gara ai hte, arawng la ai hte ap nawng
daw jau ai. Ap nawng daw jau lu na ahkaw ahkang lu la ai majaw, chyeju dum ai myit masin
hte sasana amu bungli galaw ai. Masha ni hpe jaw lu ai majaw chyeju dum ai myit masin hte
gam jaw gam ya ai wa tai nga lu ai asak hkrung lam re.
(c)Yesu wudang ntsa jen hkam let jaw ya ai chyeju tara hpe chye nna, Yesu Hkristu hpe gara
hku dap mada na, Yesu hta gara hku tsap nna asak hkrung na ngu ai lam ni hpe chye ai hte,
wudang hpe mada shagu, myit dum shagu wenyi myi grau grau hpaw ya ai hpe hkam la lu ai.
Ga shadawn, yubak lu ai wa gaw hkungga hpe la sa wa ai hpe hkinjawng wa gaw yu jep ya
ai. Hkinjawng wa gaw, yubak galaw ai wa hpe n jep sagawn ai sha, dun sa wa ai/la sa wa ai
hkungga hpe madaw jep sagawn ai. Shaman chyeju lu na n lu na ngu ai gaw, dai hkungga sa
nawng ai wa, yubak galaw lai wa sai lam hte n seng mat ai. Shi la sa ai hkungga hte she seng
mat ai. Dai hkungga dai hkum tsup ai, dinghpring/man ai majaw Karai Kasang hkap la ai nga
jang hkum tsup mat sai. Hkungga la sa ai wa mung, mara raw dat ai hkrum nna, hkum tsup
 2

sai ngu masat ya hkrum sai. Karai a man myi man pa ai hte shaman chyeju ni hkam la lu na
rai sai. Dai majaw chyeju tara hpe chye na ai wa gaw, tinang a matu wu dang n tsa hta
hkungga tai let nawng ya ai Yesu Hkristu gaw, hkungga shatai na la sa ai sagu kasha zawn
amyu myu jep sagawn hkam sai. Rai tim Yesu Hkristu hta yubak mara hpa mung n mu ai.
Hkungga sagu hpe Karai Kasng hkap la sai majaw dai hkungga la sa ai wa gaw, yubak raw
dat ya ai hkrum ai, shaman chyeju hkam la lu ai,Karai a man hta myiman pa ai. Dai majaw,
Yesu Hkristu a hkum tsup kup ai lam chye na wa magang, Yesu a dinghpring ai lam hpe grau
garau chye na wa magang, ngai gaw dai Yesu ngu ai hkungga a majaw galoi mung Karai
Kasang a man hta dinghpring ai wa ngu masat hkrum ai, akyu hpyi ai lam ni lu la ai, Karai a
man hta galoi mung myit man pa lu ai ngu ai hpe chye na kam sham ai asak hkrung lam lu la
nga ai wa re. Karai Kasang tsaw ra na matu, Karai a shaman chyeju lu la na matu tinang
hkum tinang shakut nga ai lam wa n re. Yesu tinang a ntsa kade daram mai kaja nga ai ngu ai
lam grau grau chye n awa lu nna, myit pyaw lu la nga ai, myit dik lam lu la nga ai, ban sa lam
lu la nga ai wa re. Lama ma hpe galaw lu ai shaloi, Karai a chyeju hte lu galaw ai lam re.
Gawng kya ai shaloi mung, Karai a hpung shingkang gaw hkum tsup nga ai ngu ai makam
hta sak hkrung nga lu ai. Masha ni hpe mung waw ra galaw u, n dai hkum galaw ngu nna,
tinang mung n galaw lu ai hpe tsun ai wa n re sai. Yesu gaw shinggyim masha ni hpe hpa
galaw ra ai lam ni hpe hkaw tsun ai washangun ai n rai, Yesu shi nan wudang ntsa hta anhte a
matu hpa galaw ya sai ngu ai hpe hkaw tsun shangun nga ai. Dai majaw sak hkrung lam gaw
Yesu a kang dang hpai ai hta tsang ai, tinang wu dang tinang hpai nna Yesu hpang hkan ai
lam hta tsang ai, kabu ai, ban sa lu ai, myit sim sa ai asak hkrung lam lu la nga ai wa re.

Ginlen shalai ai,

Lahpai Awng Li (Ph.D)