1

Radio Script on

“U Niangkhung (Fall Army Worm) ha u Riewhadem-

Ka jing pynhusiar paidbah ia ki nongrep- da ka KVK East Khasi Hills”

Language: Khasi Language Duration: Approx 20 minutes

Date of Recording: 27th May 2019 Venue: AIR Shillong
Prepared and participated by:
1. Baiaishahlang Syiemlieh, Farm Manager, KVK East Khasi Hills

Ka Rep ka riang ka dei U Budlum jong ka ioh ka kot jong ka Ri- Lada don jingktah ia u
budlum, ka don ka ma ha ka jingioh jing kot. Kumba ngi tip u Riewhadem u dei u jait jingthung
lam symbai(Cereals) ba kongsan bha ha ka jylla ka jong ngi wat ha ka ri hi baroh kawei bad u ba
wan ba ar hadien u kba ha ka jingpynmih (ka jingmih kaba kot sha ka 1.5 t/ ha ha ka jylla ka jong
ngi) bad ia uba ngi pyndonkam ha shibun ki liang. Ha kane ka kynti, ka don kaei kaei kum kata
kaba dang jia bad ka long kaba kongsan haduh katta katta ban ia kren halor kane.
Mynta ka sngi ngin ioh ia ka jingiakren halor ka phang “U Niangkhung (Fall Army
Worm) ha u Riewhadem bad ki lad jingiada na u”. Nga U Baiaishahlang Syiemlieh, Farm
Manager ha ka ophis jong ka KVK East Khasi Hills kaba dei hapoh ka tnat Agriculture jong ka
sorkar Meghalaya.
Nyngkong eh, nga kwah ban iathuh sha ki para nongsngap ia kane ka prokram khamtam
lei lei ia baroh kito kiba rep ba riang ba ia kane ka phang ha kane ka sngi lah pynmih mardor
namar ka jingkongsan ka jong ka bad ruh ba donkam kyrkieh ban leh ei ei halor kata. Ka la don
ka jinglap dang shen ia une u khniang Fall Army Worm lane u Niangkhung ha u Riewhadem/
Sohriew hadien ka jing ujor na katto katne ki nongrep ha ka distrik. Nga shu kwah khyndiat ban
ai jingtip hangne ba-
• La lap/ shem da ki ophisar ka KVK East Khasi Hills ia ka jingboi ne sdang pynjulor
nyngkong ha Tynring, hadien ka jing batai/ ujor ki nongrep riewhadem
• Ha ka 16th u May 2019, ki ophisar ka ophis KVK East Khasi Hills ki ioh khubor
shaphang u wei u jait khniang thymmai ha ki kper riewhadem ha Tynring.
• U niangkhung (Fall Army worm, Spodoptera frugiperda), (Lepidoptera) udei u khniang
ba kynrei bha ha ki jaka kham syaid bad u dei na ka Ri America, bad ruh ha ki jylla ba
shathie ka USA. Hynrei mynta jan baroh kylleng ka pyrthei lah lap ia u.
• La tip ba une u khniang u long u ba pynjulor haduh katta katta ia ki jingthung na ka
longing jait phlang kum u Kba, u krai sorghum, u pai, u riewhadem bad shibun kiwei pat
ki jait jhur ha kylleng ki ri ka pyrthei.
• Wat ha ki jylla shatei lam mihngi ka ri India ruh la sdang lap ia ki kam pynjulor une u
khniang khamtam ha ka jylla Mizoram, Nagaland, Tripura bad Manipur.
• U ne u khniang u long u jait ba kynrei jur bha lada u ioh jaka rieh bad u ba kloi ban
kharoi stet bha.
• Ha Tynring lah lap ha ki katto katne ki hali ba ka jingpynjulor ka lah pur bha bad ktah ia
ki tynrai ba baroh ki rta. Katto katne ki hali, ka jingpynjulor ka lah sdang treikam naduh
kaba malu mala haduh kaba pdeng.
• Lah ai jingpyntip mar mar ia ki lad jing iada ban the lakam ia ka jing kharoi bad
 2

jingpynjulor, ia kiba lah batai ne ai da ka DOPPQS, Faridabad bad ICAR.

• Ia ki dur ba lah shon lah phah sha ICAR, Umiam ban pyntikna ia une u jait khniang la
udei ne em bad lah pyntikna ba U DEI!
Une u Khniang u lah ban wanrah ia ka jingduh kaba khraw ha ka rep ka riang bad kumba long ha
kiwei pat ki ri/ jaka une u khniang u lah wanrah ia ka Famine ne ka jingkyrduh bam ha ka ri,
Nakata ka daw, sa shisien, to ngin pynshah shkor ia kiei ki ban ngin sa ia mir ha kane ka por.
Shaphang U FAW
Ngan kren bad iathuh shaphang une u khniang ha ki kyntien ba lyngkot katba lah khnang
ban sngewthuh ia ka jingtreikam ka jong u bad ka jingkongsan ban leh ei ei mardor. Te ha kaba
sdang, Une u khniang Fall Army Worm, lane ngan ong noh da u niangkhung riewhadem, u dei u
jait khniang na ka juh hi ka long ing jong shibun kiwei pat ki jait niang khung.
Jaka tynrai- America
Jingshit jingkhriat ba iahap ia une u jait khniang- tang 10.9°C ba un ioh khie iohsan. Ki
nianglong ki ioh pyndep ia ka rta ka jingim jongki lada ioh jingsyaid kaba 4.6°C. Ki ksain pat ki
san bha wat ha ka jingsyaid kaba 28°C,
Ka jait khyndew- Khyndew shyiap lam dewbyrtha bad kiwei de ki jait khyndew ki iahap bha
ban ai jaka rieh ia ki nianglong bad ban mih pat ki thapbalong. Ka jing mih ki thapbalong na ki
nianglong ka long katkum ka jingshit jing khriat bad duna lada jur ka jingsngem (Humidity).
Ki thapbalong ba lah san ki lah ban her haduh 100 km ha ka shimiet. Ki kha pylleng
khambun sien ha ka por mynmiet ha ki sla jong u jingthung, ha ki bynta ba shapoh u sla ( ki sla
ba kham shapoh), ki kha ha ki kynhun kumba 100-300 tylli, teng teng ha baroh ar liang ki bynta
u sla. Ngi iohi ia ki kynja ksai thyrnia ba saphup ki ba sop ia kine ki kynhun pylleng. Na kine ki
pylleng ki sa mih ki ksain kiba sdang ban bam bad pynjulor. Ki Thapbalong kynthei ki lah ban
kha haduh 1000 tylli ki pylleng ha ka shi jingim ka jong ki. Ki Pylleng hi ki lam rong lieh ha
kaba sdang bad ki sa kylla rong lam ktieh. Ki ksain ki mih na ki pylleng tang ha ki 2-3 sngi. Ki
Ksain une u jait khniang ki don hynriew tylli ki bynta ka jingim jong u (lane 6 sien ka jing khoh
phler ka snieh mo ki ong) ha kaba sdang u lam rong ktieh bad hadien pat u sa kylla rong lam
jyrngam jngum. Ngi iohi ia ki ksain rit kham bunsien ha ki kynhun. Ia ki ksain une u khniang ngi
lah ban ithuh da ki saw tylli ki dak thoh ha ka bynta ba kut ka met ki ba wan dur sawdong bad
ruh ia ka jingdon ka jingthoh u DAK Y khongpong ha ka khlieh ka jong u. Ki ksain bal ah san
bha ki don saw jur ki kjat ba met ha ki bynta ka kpoh bad sa shi jur ha ka ba kut ka met. U ia
syriem ia u niangkhung bam soh ia u riewhadem ne kiwei pat ki jait niangkhung hynrei u iapher
ia ka jingdon ka jingthoh u dak Y khongpong ha khlieh.
Ki dak ki shin ba pynjulor ki iasyriem kum kiwei ha kaba sdang, ha kaba ngi lah ban
shem ia ki dak thliew ba lah pong ne sam ha ki sla bad khamtam ha ki shylluit ki sla thymmai ha
tduh ne ki sla ba sop ia u symphiah. Wat lada ki iasyriem ia ka jingjulor hynrei ka jing pur stet
ka jingjulor na u ne u khniang ka kham bun namar ka jing long jong u ba u bam bad miet bad
sngi bad shong thait por step bad nohphaisngi.
 3

Jingpynjulor:
• U Ksain u pynjulor da kaba bam khoit ia ki sla. Ki ksain ba dang rit ki mlien ban khoh ne
bam ia ka bynta ka sla shiliang bad ieh ia ka wei pat. Hadien ka jingkhoh phler ka
snep/snieh ka ba ar ne lai u ksain, u ne u khniang u la lah ban sam thliew wat ia u sla bad
ruh bam na tduh
• Ngin lap ia ki shylluit/ symphiah ba shah ktah bad shah pynmong ha ka dur ki thliew ha
ki lain. Ka jingdon ki ksain shi tynrai ka poi tang wei ne ar lada ka kynhun ki ksain ka jan
kawei na kawei, namar ka jinglong CANNIBAL ka jong ki.
• Ki ksain ba kham san ki bam duh bad ieh tang ki thied ne jaw bad u jyntang eh u
riewhadem.
• Ki ksain ki bsut ruh sha ki shylluit ne tduh thymmai bad ktah ia ka jingsan u jingthung, ki
khap dkhat noh ruh ia ki tduh ki sla.
• Ha u riewhadem, teng teng ki bsut wat sha ki soh kum kiwei pat ki ksain. Hynrei kim
bam ne sdang na ki shniuh u soh hynrei ki bam bad bsut na ka bynta ka met u soh.
• La lap ruh ba ha ki tynrai lung ki kham ai lad ia ka jing juh bad kharoi kine ki khniang,
bad ki ba kham iaw pat kim da khring, hynrei ki ksain ki shong bad pynjulor ha ki bynta
ba kham jem bad ha u soh ruh kumjuh ha ki shniuh u soh. Hynrei u shniuh soh um da
kham iahap ia ka jingsan kine ki ksain.
• Ki ksain kiba ioh ban shong bad bam ia ki symboh ki kham san bad kharoi bha
• Kumjuh ruh, wat lada ki sla ba kdup bha ia u symphiah ki ai lad ban im une u ksain,
hynrei kam da iahap ban heh ban san une u ksain.
• Ha kane ka dur, ki sla thymmai u symphiah ki long ki jaka ban rieh bad ai jingbam por ba
sdang u ksain hynrei ka jingjulor ka sdang bha hadien ba u ksain u ioh ban par sha ki
soh/symboh riewhadem.
 4

Kynmaw ki nianglong ki lah ban shong ne rieh hapoh khyndew bad teng teng ngi lap ruh
wat ha ki sla. Ki thapbalong ki mih na kine ki ngianglong ha ka por janmiet bad ka jinglah ka
jong ki ban her jngai bha shwa ban kha pylleng pat ka pynkynrei ia ka jing don une u jait
khniang.
Ngi lap ruh ia ka jing saphriang kine ki jait khniang na kaba ngi pynkit ne shalan ia ki jait
mar rep kum ki soh ne jhur da ki lieng duriaw ne lieng suin na kawei ka ri sha kawei pat. Teng
teng la lap ruh ba ki saphriang lyngba ki jait jingthung pynwan dur ( ornamentals)
Ban bynrap, kine ki long ki dak ki shin ka jingpynjulor:-
Ia u soh- bam ne pynmong na bar bad ruh shapoh
Ki tduh ne shylluit thymmai- bam ne pynmong na bar bad ruh shapoh, ki sam thliew ruh
Ha u symphiah/ syntiew- bam ne pynmong na bar
Ia ki sla- bam ne pynmong na bar
U jyntang - bam ne pynmong na bar
Ia u tynrai baroh uwei – ki dkhat na trai
Kiwei pat ki jingthung ba lah ban shah pynjulor/ ba u juh:
• Bun jait ki jingthung- haduh palat 80 jait.
• Kham juh bha ia ki jingthung longing Phlang.
• U kharoi bad juh bha ha u Riewhadem, riewhadem thiang, u krai sorghum, U Phlang
bermuda, kiwei dei ki phlang- crabgrass, Digitaria spp.
• Ki trei kam ne bud ia ka rukom long kum ki shipai haba ki lah ia bun. Ki lah ban bam duh
ia ka bynta ba long sla baroh u jingthung bad ki nang tur shaphrang bad klun lut naphang
ia ki jingthung ha ka lynti ka jong ki.
• Kiwei de ki mar rep ki shah ktah barabor kum u alfalfa, barley, Bermudagrass,
buckwheat, kynphad, u clover, riewhadem, u oat, krai, budam, kba, u rye, u sorghum, u
sugarbeet, u Sudan grass, rymbai ktung, pai, u timothy, duma, bad u kew.
• Napdeng ki jhur, u ba kham shah ktah khah khah u dei u reiwhadem thiang shet jhur.
Kiwei pat ki shah ktah teng teng.
• Kiwei de ki mar rep ki ba ju shah ktah tyngkhat ki long u soh apel, u kriep, u sohniamtra,
u sohkynphor, u soh phareng, u strawberry bad shibun jait ki Syntiew.
Ki kynbat ki ba khring bad ai jaka sah ba juh bha ia une u jait khniang ki long kum u bentgrass, u
Agrostis sp.; u crabgrass, u Digitariaspp.; Johnson grass, Sorghum halepense; morning
glory, Ipomoea spp.; nutsedge, Cyperus spp.; pigweed, Amaranthus spp.; bad u
sandspur, Cenchrus tribuloides.
Ki Lad Jingiada:
Ia ki lad jingiada dei ban sdang noh mar mar marsyn iohi ia ka jingdon ki kynhun pylleng la
kumno kumno 5 na ka 100 ki tynrai kiba don. Lane lada lap ia ka jingjulor kaba 25 na ka 100
katba ngi dang iohi ia ki ksain ki ba dang im. Kan long kaba eh ban teh lakam ia une u khniang
ynda haba u Ksain u la san bha bad ioh ban bsut ne rung ne rieh shapoh ki sop sla. Dei ban
synreit noh da ki dawai ba donkam shwa ba u ksain un rung ne bsut shapoh ki sla thymmai ba
sop ia u symphiah. Ngan jer ia ki lad harum kiba ngi lah ban leh ei ei ban teh lakam ia une u
khniang naduh kaba sdang. Ngan kiar katba lah na ka jingpyndonkam ia ki dawai karkhana
 5

namar ..........
• Donkam ban wad jingtip shaphang jong une u khniang na baroh ki jaka bad ban ai ki lad
jingiada kiba kham kloi
• Ban pyn duna ia ka jing mih une u khniang, donkam ka jing phikir ia ka por thung ia ki
riewhadem da kaba thung biang por (may-june) bad ym dei ban thung slem palat bad ia ki
riew hadem dei ban thung lut ha kajuh ka por.
• Tih kham jylliew ia ka lyngkha khnang ban wanrah ia ki ksain bad ki sop shajrong ka
khyndew bad ba ka sngi kan ioh thang ia ki lane kiwei pat ki jingthaw kin ioh pynduh ia
ki. Pynbiang ia ka sboh ha ka khyndew ban pynkhlain ia u jingthung, ka jing pynbiang ia
ka jingsngem kan pynspeh ia u tynrai riewhadem u ba khlain ban shah ia kine ki khniang.
Ka jing ai dawai sboh khlem jingthew khamtam lei lei ha lor ka jing ai ia ka Urea kaba
bakla kan pynroi ia ka jing kha pylleng ki khniang. Ialeh ban ieh khuid ia ka lum ka
lyngkha, weng ia ki kynbat katba lah ban khang lad ia ka jingshong rieh une u khniang.
• Lah ruh ban pdem ia ki symbai shwa ban thung, ha ki dawai khuid ka juk mynta lane ki
Bio pesticides khnang ban pynkhlain ia ki tynrai ba lung bad khanglad ia ka jing kha
pylleng.
• Ka jingwad bniah ban pynmih ki jait symbai riewhadem ba lah ban shah ia une u khniang
ka dang iai bteng. Kawei na ki mat ban thaw ne pynmih jait riewhadem ka long U
riewhadem uba don ia ka snep ka ba kham rben.
• Dei ban thung lang ia ki riew hadem bad kiwei pat ki jingthung kum ki kynja rymbai lane
bad ki syntiew dieng khnang ban khring ia ki khniang kiba bha lane ki nongshun jong
kine ki khniang kiba pynjulor ia ki riew hadem. La lap ba don shibun ki jait khniang na
ka longing ki Ngap kiba pynjulor ia ki pylleng niangkhung. Ha ka mariang hi, la lap ba ki
Kying ki lah ban pyniap ne bam ia ki ksain niangkhung kata haduh 20-70 na ka 100). U
Dhonia, u tiew myngngor-Marigold, U Fennel, bad kiwei kiwei de ki lah ban khring ia ki
khniang pynjulor ia une u niangkhung. Ki dieng hajan ki kper riewhadem ki khring ia ki
sim kiba lah ban pyniap/ pynjulor ia kine ki niangkhung. Ka buit "PUSH-PULL" ka dei
ka buit ha kaba thung uwei u jait jingthung ba beh ia u niangkhung bad uwei pat u jait
jingthung u ba khring ia ki nongshun une u niangkhung.

• Lada lap ia ki ksain bad ki sop jong kine ki khniang dei ban lum bad pynjulor ia ki da
kaba pdem ha ka umphniang sharak bad ia ki pylleng khniang ruh dei ban pynjulor noh
marmar.
• Ber da u shyiap uba tyrkhong lane da ka um ktieh lane da u dpei napdeng jong u jyntang
riew hadem shapoh ki sla mar syn iohi ia ka jingdon jong ki ksain.
• Lah ruh ban synreit da ki jingkhleh kum ka um sohmynken, um rynsun ,um piat, um
duma kane ka lah ban ai ka jingiada kaba kham kloi bad ban lait na ka jingshah pynjulor
• Synreit da ki dawai phngit jingim Biomagic (Metarhizium anisopliae) lane Biopower
(Beauveria bassiana) kumba 5g (Shi shamoit sha) ha ka shi litar ka um
• Lane lah ban pyndonkam da dawai phngit jingim Dipel (Bacillus thuringiensis var.
Kurstaki) kumba 2g (shiteng shamoit) ha ka shi litar ka um lane 400g na ka bynta ka jaka
 6

kaba shi akar

• Pyllait da ki khniang kiba rit Trichogramma pretiosum lane Telenomus remus kumba
50,000 na ka bynta ka jaka ba heh ar akar shiteng ha man la ka taiew.
• Buh da ki pheromone traps (Spodoptera frugiperda) kumba 15 tylli na ka bynta ka jaka
ba heh shi akar. Kane ka shrip ka khring ia ki thapbalong shynrang ha kaba ka jing kha
pylleng da ki thapbalong kynthei ka shah khanglad noh.
• Lane synreit da ki dawai ba shna na u neem kum ka multineem, nimbicidine kumba 4 ml
ha ka shi litar ka um
• Thung kumba 3 ne 4 lain u kynja phlang (Napier grass) ha baroh sawdong ka kper riew
hadem bad sa synreit da ki dawai ba shna na u dieng neem (Multineem ) mar syn iohi ia
ki dak shah pynjulor ha kine ki phlang
• Dei ban ai ia ki lad jingiada ha ka por kaba biang ban lait na ka jing saphriang jong une u
khniang sha kiwei pat ki jaka.
• Lah ruh ban ai da ki dawai karkhana kum ka Methomyl, Cyfluthrin, Methyl parathion, ka
Chlorpyrifos, malathion. Hynrei kynmaw kine ki dawai karkhana ki kham long bih bad
kin eh kham slem ha ka mariang bad ki lah ruh ban pynjulor kylla ia ka mariang
khamtam lei lei ia ki jingthaw kiba long paralok bad u nongrep. Lada pyndonkam, ia
kynduh shwa ia ki ophisar ne stad ka rep ka riang ba phin ioh ia ki jingthew ne jingkhein
kiba biang.
• Ka buit kyllum IPM ka long kaba bha eh ban teh lakam ia une u khniang ha kaba ngi
pyndonkam jan baroh ki buit naduh bas dang ka kam rep riewhadem haduh ban da ioh
kheit ia u soh. Ngi kham bud ia ki lad khuid ki ban ym ktah ia ka mariang
• Dei ban ai/ ioh shaphang jong une u khniang sha baroh ki nongrep lyngba ki training lane
ki jingialang
Ka jing iatrei lang jong baroh naduh ki nongrep, ki nongshong shnong bad ki briew ka tnat
sorkar ka long ka donkam ban khanglad iaka jinpynjulor une u Niangkhung Fall Army
Worm ha u Riewhadem
Te tang da kito ki jingbatai nga lah poi sha kaba kut jong kane ka jingkren halor kane ka Phang
U Niangkhung Fall Army Worm ha u Riewhadem, bad nga ngeit skhem ba ki paralok ki ba
sngap ki la ioh jingmyntoi ei ei khmatam eh ki paralok nongrep jongngi. Te ngi kyntu ia ki para
nongrep ba kin ialeh ban bud ia kine ki jingbatai kiba phi la iohsngew na kane ka prokram khang
ba kan wanrah ia ka jingmyntoi ha ka rep ka riang. Na ka bynta ki jingtip ba khambniah
sngewbha iakynduh ia ki Nongtrei sorkar ha ki Block lane ban wan ruh sha ki office treikam
jong ka Krishi Vigyan Kendra East Khasi Hills San Mer Upper Shillong bad kumjuh kiba don ha
man la ki distrik treikam jong ka jylla jongngi. Khublei shibun