LEHKHATHAWN VAKVAI By Sakte-a sec-I ( He thu hi tuallaia ka chharchhuah ve mai a ni a, Valentines Day lo thleng tur puala ZNP chhiartu

te tana ka tuai lum a ni e. He ni (Vals Day) hi thalaite tan chauh ni lovin mitin tan Hmangaih nei apiang te tan: Hmangaihna thu in hrilhhriat Ni a ni e.) Ni a liama, thla a rala, kum a vei ta; nimahsela, khatia inthlahrung leh zak tak chunga, Ka duh che a ni ti a hmai seen awp awp chunga I hnena ka sawi lai te leh min haw lo taka nui sen sen chunga min chhan lai hun kha ka mitthla ah hian ala thar renga. Nimin liam ta maia thil thleng ang main ala lang chiang a sin. Ka tan chuan khatih lai hun tluka hun hlimawm leh, ka mihring hriatna ina a hriatreng tur khawpa hlimna ka la tawng ngailo. Tawng leh dawn pawh ni ila ka phal tawhlo hial maithei. Ni e, nangmah vang hian ka hma a tihtur pawimawh, hahthlak tak leh harsa tak tak te pawh, phur takin ka hmachhawn a. Mihring nuna harsatna leh beidawnna lo thleng thin te pawh hi ka zuam ni hauh silo hian hmachhawn ka huam a ni. A ni tak atak asin, chhungkua leh ka mimal nuna manganna a lo thlen pawh in, I kianga ka awma, I aw nem taka beidawnglo leh tlawm mai lo tur a min fuihna te kha ka tan chuan tuifinriattui a fawn vel theih na tura thli a tangkai ang mai hian, he khawvel huai taka ka hmachawn theihna tura min chhem kaltu tangkai a ni takzet mai. Zan alo rala, zing alo in herchhuaka, kawl eng lawma sava anlo chiar nak nak te hian; hlimna in min tuam vela. Chung te chuan I hlim hmel leh nui ri min hriatchhuahtir bawk a. Chutih hunah chuan khawvel hi a mawi in alo duhawm thar leh a, he ka thinlung ah hian lungngaihna a lo chen ve ka phal ngailo. Nangmah vang hian Hmangaihna khur thuk takah ka tla lut vang vang ni in ka inhria a: Mahse eng thil chuan nge min mawlh ka hrelo, I kianga ka awma hlim taka kan lendun lai te khan ka kha a chih leh tlat thin si. Sawitur hrelo leh tihtur hre tak si a kan awm lai lah in I hmel ka en a piangin tihdanglamin ka awm leh thin si. Kan mihring zia a lo chhuah a mu leh mal pawh awmlo a kan inhau thin te kha aw ka thiamlo ani ti a ngaihdam min dil thei te kha alo van ropui em. Sawi ri lo mahla min hmangaih tih min hrilhna a ni tih ka hria a, kan inhau lovang tih mawlh kha ka hlau leh hnuhnawh thin asin. Lunglohtui dawn hma loh chuan aw ti a kan tiam lai te, hmalam hun thlira beiseina sang tak neia hun kan hman lai te khan kan hlim pui hle thin a nih kha. Tunahchuan khang hun te kha liam tawh mahse ka mitthla ah hian chiang taka hmuh theihin ala inpharh duai mai. Tun hunah hian hun liam tawh te ka chhuikir a, Lungleng taka kan awm lai te, mangang tak a min tantu zawnga kan hawi ruai ruai lai te leh chung thil duhawmlo te zawng zawng theihnghilh a duhthawh taka kan infawh vawng vawng lai te kha ka chhuikir a. Ka tan chuan khawvel ti famkimtu I ni takzet mai. I vanglai hun duhawm tak mai ka chan theih avang hian lawmthu ka sawi fo thin. Sawtna awmlo hle mahse lung a leng a, hlimna rau chuan minlo pawl leh ni hian ka hre hial mai. Khatia rinlawk leh tiam lawk pawh awm hauhlo a min liamsan ni khan eng tiang tak in nge ka nun hi a insawi nasat ang tih I ngaiahtuah an gem? tih hi ka hmuh leh hun che a ka zawh hmasak duhber che a ni. Ka tawrh nat zia thu erawh sawi ka tum lova, hlim taka I awm theih hi ka duh ber fo. Nun nuam zawk beiseia kal bo I ni si a I chunga ka rilru putdan pawh ka hrethiam ta vak lo. I lo kir leh ka ring ngam hauh lova mahse engtikah emaw chuan I lo kir leh ngei ang tih ka beisei tho si. Ka suangtuahna um in ka

hawi leh ruai thin a, eng nge ka hmuh a, eng nge ka tawn mek tih pawh ka theihnghilh thei hial a sin. Hetia kan nunhlui te chhuikira hun ka hman a piang hian kan pahnih a hun kan la hman dun ngai reng reng loh na Mualah kalin ka suangtuahna ka kawm a Ka tana I hlutzia te, sawi vanga chiang ni kherlo mahse ka hmangaih zia che ka lo hrilh mang hauh loh che avanga ka inchhir zia thu te ka hrilh thin asin. Diktak chuan, thupui fun meuhva kan chanchin a bo abang awm hauhlo a ka hrilh thin chu amah chauh hi a ni. Amah ngei hi I bulah pawh ka lo kaltir fo asin. Ka thian rinawm tak a ni. Lokir leh ni la chuan duhthawh takin Ka Hmangaih Che tiin ka hrilh tawh ngei ang chia, ka thian pawh hi ka hmelhriattir ngei ang che. Mahse, tih theih ka van nei tlem si em. Tuna ka tihtheih awmchhun chu he thu chhiartu apiang te hnena an Hmangaihte tana he tawngkam mawi tak Ka Hmangaih Che tih hi ui hauh lo tura chah mai a ni ta Theih nise, he ka kutziak chhuanawmloh tak, hawrawp mawi lemlo taka ka ziah hi, lungchim taka ka kuah mek: I THLANLUNG ah ngei hian mi zawng zawng chhiar theih tura tar ka duh hle mai.