A Tel Huai Leh Ki Kheel Huai Thu *

Khazih sungah kong it sia te leh pawlpi mite khempeuh,

Gupna thu ah ahi zongin, leitung thu ah ahi zongin, buai na khatpeuh
aom ciangin, kilem kikna aom theih na dingin ama sa pen in ih khialhna te ih
kimuh ih kitel masak ding kisam hi. Tua khit ciangin kisik in kikhel aa, ki
niamkhiat na tawh khat leh khat kithum ki maisak ding ahi hi. Tua te om lo in
gupna a kingah theih loh mah bangin kilem kikna zong om thei lo hi. M a hi aa C
a hi zongin, khialhna te kimu thei kitel thei in, ki niamkhiat tek aa ki maisak zawh
tek nading leh ki itna tawh kipum khat kik aa Topa lungnuam tak aa biakkhop
theih na ding, Topa dawn khawm thei tek nading lunggulhna tawh hihlai hong
gelh ka hi hi.
A masa in laisim mi mal khempeuh, sia te leh pawlpi mi khempeuh
tungah telsiam na, sansiamna, kiniamkhiat na, kikhel na, ki itna leh ki pumkhat na
te Topa Khasiangtho in hong pia ta hen.

Upna leh Pasian Khasiangtho ih neih takpi leh ih mawh ih khialhna te

hong kigen ciangin heh lo in ih lungdam zaw ding hi. Hehna thangpaihna leh
muhdah na aa ih lak leh Pasian Khasiangtho maan tatak ih sungah kidim hetlo
cih ei leh ei ih kitel na hi pah ding hi. Khasiangtho nasep in mawhna khialhna te
pulaak na leh lahkhiatna ahi hi. John. 16:8.

Kawlgam SDA pawlpi sung buaina pen sia te sungah hi ta leh pawlpi
mi te sungah hi ta leh ih neih zah ding upna leh Khasiangtho ih neih loh man ahi
hi. Khasiangtho tawh kidim loh man in, khat leh khat ki hazaat na sanglua hi. Pan
mun iiplah nate lian lua hi. Mi nam deidan nate sang lua ahih man in khaa it nate
kiam sak hi. Hih te hang in khialhna tampi hong piangin, buaina te ki zomto to ahi
hi. Tua ahih man in ih deih mah mah Conference pen buai nadang te tawh
gawmkhawm in kalsuan toh pih khakna hangin lam pialna hong tun aa, SDA
Conference maan ta tak aki ngah thei lo ahi hi.
Khialhna Te
1. Minam vai aa sep na tawh khialh na:
Biakna vai, pawlpi vai te Khaa thu ahi hi. Minam vai/thu hi lo hi.
Biakna sungaa minam vai tawh uangsep/naksep luat na khempeuh khial hi.
Mission te in minam vai tawh naksep lua uh hi ci in ki mawh sak hi. Mission te in
minam vai tawh asepna te khial sa in man asalo te in minam pau lam in sepkik
loh ding ki sam hi. “Zomi na it leh Ei Zomi SDA te, na minam te panpih in,
langbawl ken” ci aa, minam vai tawh sep kik zel na in a mawhsak uh Mission te
mah tawh a khialhna uh kibang kik hi. Mi nam lungsim tawh sepding hi lo hi.
Mi nam it lua aa minam vai asem nuam te in Leitung politic ah sep ding ahi hi.
Biakna sungah zat ding hi lo hi. Laisiangtho in minam dei dan lo hi. Leitung
politic sem hi lo ih hih man in ih khensiam ding kisam hi. Minam it lo ki om lo
kha ding hi. Mi nam it na leh khaa it na kibang lo hi. Ih khensiam ding kisam hi.
Mission ih cih pen minam hi lo hi. Karen te aa! zong hi lo hi. Conference zong
minam hi lo hi. Zomi te aa! zong hituan lo hi. M leh C te a khialhna uh kibang uh
hi

Minam ka it hi, Zomi SDA te ka it hi ci ci na pi in, aminam pih, Zomi

SDA pih te mah ko ko in agen sia sia kik zel te, amah leh amah a kikhem khem
zuauphuak ahi hi. Zomi SDA te a it takpi te in, Zomi khat in Zomi SDA te alang
pan khaphial zongin tua nu/tuapa a it ve ve ding hi. Itna tawh ahuh theih na ah
ahuh ding aa, ahilh theih na aom leh ahilh ding hi. Mudah in ako sia kei ding hi.
Minam it takpi ih hih leh ko siatna sangin pahtawi na lam ih hanciam zaw ding hi.
Laisiangtho in mi gen siat kosiat ding deih lo aa pahtawi ding deih zaw hi. Khaa
lam ah picing (mature) in ih sungah Pasian Khasiangtho maan anei takpi te in, mi
ko ko in gen sia sia lo ding hi. Mi ko leh mi gensiat lam ih lawp aa, ih siam leh
Khaa lam ah picing (mature) zo nai lo, Pasian Khasiangtho kisam lai ih hih lam
kimuh khiat na hi pah hi. Zomi ahi aa, minam dang khat peuh ahi zongin Pasian
in a itna ki bang hi. Gen siat siat ding ko ko ding hi lo hi.

2. Pan mun kituh na hang khialhna:

Vantunga panmun sang deihluat na hang tawh alangpang Dawimangpa
(Satan) ukna Leitung ah om ih hih man in panmun sang deih lo ki om lo
ngiaumawk hi. Dawimangpa hong zawh na khat hi gige hi. Pasian Khasiangtho
maan takpi ih sungah om tek hi leh Pasian hong phalna/piakna pan mun tawh ih
lungkim ding hi. Ih za akhan ciangin ih lungdam mah bangin ih zakiat ciangin
zong ih sangsiam ding hi. M leh C te khial tuak in ki bang uh hi.

Panmun sang ngah leng Pasian nasep na alian zaw/ ataangzai zaw in
ki sem thei zaw hi ki ci tek hi. Maan mah hi. Ahi zongin panmun deih luat na
hangin ki hazaat na, kidem na, ki el na, ki deidan na leh ki muhdah nate ki zom to
ahi hi. Hihte khempeuh in Pasian thukham sawm (10th.) na palsat na ahi hi.
Buaina ki patna bulpi ahi hi. Dawimangpa khialhna kipat na ahi hi.

3. Kiteel na (election) ah khialh na

SDA pawlpi in pawlpi ki ukna dung zui in kiteel nadan ding rule/law
na koih khin hi. Panmun deih luat man, minam it man (or) ahang! khat pepeuh
tawh kiteel na thukhun pal sat aa sepna khempeuh khial hi. Ih Mission, Union te
zong khial mah uh hi. Hih thu tawh kisai Union Mission president Pr. Muller
Kyaw in akhialhna thu kei tungah hong pulaak ban ah, Kawlgam ah lai in hong at
khia hi. Hih pen kiniam khiat mah ning ci aa a kamciam na atang tung sak ahi hi.
Pasian deih lampi ahi hi. A ma lungsim tawng pen amah leh Pasian kikal hi.
MUC makai sia Kai Za Dal in ki niam khiat mah nung ci a hong kam ciam na, tu
dong khial mah ung ci in, kiniam khiatna gen ngei nai lo hi. M ten Khial mah ing
ci hi. MAC or MUC ten khial ung ci ngei nai lo uh hi. Ki bang nawn lo hi.

4. Tithe(1/10) leh (Offering) sumpi te ah khialh na

Myanmar Adventist Conference (MAC) or Myanmar Union
Conference (MUC) lam pan khial ing ci aa ki niamkhiat na kam om ngei nai lo
ahih man in, khialhna om lo takpi maw cih en suk dih ni. A zen zen in aom leh ki
niamkhiat in khial mah ing a cih ngam ding kisam hi. Tua pen Pasian deih na ahi
hi.

Pasian in bang hangin (1/10) tithe leh sumpi piak ding hongkal
hongdeih a hiam? Sum tang mah mah adeih man maw? Pasian zawnglua maw?
Hi peuhmah lo hi. A Mah um takpi maw? Um takpi lo. Muang takpi maw muang
takpi lo. A Ma tungah citak takpi maw citak takpi lo cih te hong et na bulpi ahi hi.
A Ma pawl ut takpi te, a Ma nungzui takpi maw zui takpi lo cih tel sit na ahi hi.
Leitung thugen leng sumpi pen Pasian tawh kipawl na membership fee (or) Pasian
Tax ahi hi. Leitung kipawl na khat pepeuh ah membership fee ki nei tek hi.
Membership fee ih piak kei leh tua ki pawlna member khat ki hi thei lo hi. Gam
khat peuh ah ih ten ciangin kumpi ah phiangsiah (tax) ih piak tawh ki bang hi.
(Pasian sum Pasian na pia un, Caesar sum Caesar kumpi pa na pia un) Zeisu in
ci hi. Matt. 22:17-18 Tithe leh sumpi te pen Pasian pawl ih hihna membership fee
hi.

Pawlpi sungah sumpi te Pasian ih piak ciangin pawlpi tungah kipia in

Pasian kiangah ki aap hi. Ih piak khit sa ih ap khit sa sum leh van te ei tawh ki
tam sai nawn lo hi. Pawlpi in a zeekzia a zat zia ding thukhun koih sa in nei uh hi.
Ih pawlpi tungah ih piak ding hi aa, ih pawlpi ah pia lo in kipawlna dang khat ah
ih piak leh ih pawlpi member hi nawn lo in ih sumpi piakna kipawlna te member
ih hi ta hi. Mission te in sumpi te adeih bangun zang uh hi ci in ki mawh sak hi.
Pasian sumpi azat khialh uh leh amau leh Pasian kikal thu hi aa, Pasian in hoih
asak na bang in akhen ding hi. M te in zong a sumpi te uh atuam in kipawlna
dangah apiak uh leh amau zong SDA member hi nawnlo pah ding uh hi. Sumpi te
SDA Mission ah pia nawnlo aa, MAC, MUC ah a piak ciangin MUC member
suak aa, SDA Mission pawlpi member hi nawn lo hi.
 SDA upna (doctrine) bulpi 27 +1= 28 teng maan hi ci aa a um a sang
teng SDA asuak ahi hi. Tui kiphum ding ciangin thu dotna ki nei aa, sawm a khat
(tithe) leh sumpi dang dang (offering) te tawh hih SDA pawlpi kahuh ka panpih
mah ding hi ci in kiciam na om hi. Tithe leh sumpi te mimal in SDA pawlpi ah
apiak loh na tawh pawlpi pan ki disfellowship thei lo hi. A hi zongin Tithe te leh
sumpi te SDA pawlpi ah pia lo in, kipawl na dang khat ah khia in apiak leh pawlpi
tuam suak ahih man in ki disfellship thei hi. Upna bulpi (Doctrine) te lak ah khat
nialna ahih man in SDA pawlpi pan in hong ki disband/disfellowship thei ahi hi.
Pawlpi ah tuiphum na tawh aki lut mah bangin hong ki disfellowship/disband
ciangin ih ki tuiphum na sa pen abei suakaa, tui kiphum ngeinai lo tawh aki bang
ahi hi. SDA pawlpi mi hi nawn lo ahih man in SDA pawlpi mi asuah kik nop leh
tui kiphum kik na tawh pawlpi mi suak kik thei bek hi. Upna bulpi 28 te lak ah
khat anial asang nawn lo ahi hi.

Pawlpi pan ki hawlkhia (disfellowship/disband) cih tawh ki sai in mi

tampi in kitel khial hi. A ki hawlkhiat (disband/disfellowship) man in pawlpua
suak hi lo hi. Pawlpi upna bulpi te apalsat (or) anial (or) a langpan ciangin
amah leh amah in pawlpi pua atungkhin ta ahi hi. Pawlpi pua atun khit man in
pawlpi in action lak loh pha mawh ahih man in action la in a ki hawlkhia ahi
hi. A palsat ma, akhialh ma, anial ma, a langpan ma in kua mah action la khol
in kihawl khia khol thei ngei lo hi .Upna bulpi (doctrine) nial na, palsat na ,
langpan nate bek pawlpi in disfellowship pia aa, policy palsat nate disfellowship
pia lo hi.

5. Disband/Disfellowship san khialh na

SDA pawlpi pen Matt. 16:18-19. “hih suangpi tungah ka pawlpi ka
lam ding hi. Leitung ah na hen te vantungin hendingaa, leitungah na khah te
vantungin khah ding hi” cih a um asang pawlpi ahi hi. SDA pawlpi in hong
disband/disfellowship leh SDA pawlpi mi hi nawn lo hi. Neu ngaihsut khak ding
hi lo hi. Hong ki disband (or) disfellowship khin napi in SDA pawlpi mi mah hi
ung ih cih tei tei pen ei leh ei ki khemna hi zaw hi. Pawlpi ii khensat na
khempeuh vantung in sangin thukim pih hi ci aa, a um asang pawlpi ahi hi.
Pawlpi te ii khensat na amaan kei leh Pasian leh a mau ki kal hi aa, Pasian in hoih
asak bangin thaman pia ding hi. SDA pawlpi mi a ut takpi veve ahih leh ki niam
khiat in SDA pawlpi ngei na bangin a ki ap kik aa tui kiphum kikding loh buang
lampi dang om lo hi. SDA up na bulpi 28 te lak ah khat nial na mah ahi hi.

Zeisu in hih suangpi tungah ka pawlpi (my churches=plural) te kalam

ding hi na ci lo hi. Ka pawlpi (church=singular) kalam ding hi na ci hi. Pawlpi
maan (churches) tampi om ding ci lo hi. Pawlpi maan khat bek (Ramnant Church)
om hi cih a um pawlpi a hi hi. Tua ahih man in, SDA pawlpi bulpi tawh aki zom
lo kipawl na (or) pawlpi khempeuh pawlpi maan SDA pawlpi hi lo hi. Upna
(doctrine) bulpi 28 teng um in sangin SDA pawlpi mi mah hi ing ih cih nop leh
tua upna bulpi 28 te amu khia leh anei SDA pawlpi tawh ki zom aa, tua SDA
pawlpi sungah ih om loh apha mawh ahi hi. Upna bulpi doctrine 28 te akim aa
sanglo aa, a nial te SDA pawlpi (or) pawlpi mi hi thei lo hi. Ih zuih lah nate leh
nial na te kibang lo hi. Ih khentel theih ding thupi mah mah hi.

6. Ngaihsut khialh na te
Pawlpi buai na vai ah a makai teng bek tawh ki sai hi lo aa, pawlpi mi
khempeuh tawh kisai ahih man in, SDA mission sia te in hih atunga khialhna te
mipi te tel dingin agen pih ding, a hilhcian phot ding uh kisam masa hi. A thu tel
lopi aa mi nung amawk zuih tampi te, pawlpi pan a hawlkhia kha ahih ding zong
hoih lo hi. Laisiangtho in Taang leh Tahum pokhawm sak phot un ci hi. Ih ngah
Khaa sangaa atam zaw khaa ih hawl khiat khak ding lau huai hi.

Confernce movement pen independent movement hi lo hi.

Independence ngah na ding dan khat aa ih gen gen pen khialhna lianpi khat ahi hi.
Conference ngah takpi leng zong Union te mah tawh aki sem khawm ding hi aa,
a kipelh thei ding hi lo hi. Minam deidan na, sim mawh na cih lungkim lohna
lungsim tawh conference thu gen gen pen man lo hi. Thang paih man, khasiat
man, guallelh man aa conference deih tawh ki bang hi. Pasian deih na tawh ki leh
bulh hi. Mood man lampi man hi lo hi. Tua teng hangin kitot kisel na asuak ahi
hi.Thu pai pi tel lo pawlpi mi tampi akai khia kha ih hih ding zong hoih lo hi. Ih
ngah zah Khaa sangin atam zaw Khaa ih kaih khiat khak ding lau huai hi.

Coference deih tatak ih hih leh lungsim man ngaihsut na maan mood
man tak tawh ih kalsuan theih ding kisam hi. Lungsim siangtho tak leh itna tawh
Pasian nasepna te ah hanciam ding, Pasian nasepna atangzai zawk na dingin,
pawlpi mite leh sia te itna tawh kipawl khawm in Pasian na sem khawm ding, bul
lam pan aa hongpai huhna tawh ding nawnlo ding. Ei leh ei tha tawh ding tek ding
cih na hi. Na khat peuh ih sep ih hanciam ciangin hong langpan hong langdo a om
pen Leitung mihing te ngei na ahi hi. Bang bang in hong ki langpan zongin Pasian
deihna bangin lampi man tawh kalsuan in hanciam peuh leng Pasian in hong
thukimpih in, atawp na ah ih deihna kingah ding ahi hi. Mihing in hong khaktan zo
lo ding hi.

Lungsim mood aman loh man in Pasian in conference ngah ding

hong phal nai lo hi zaw ding hi. Lungsim mantak tawh sem hi lehang conference
aki ngah lua ding hi. Hong pia ding pen GC, Division, Union te hi masa lo hi.
Hong pia ding pen Pasian ahi hi. Pasian in hong pia leh GC, Division, Union,
Section ten bangzah ta in hong khaktan nop uh hangun hong khaktan zo peuhmah
lo ding uh hi. Ei tha hatna suangaa ih kalsuan khak man in MUC conferece ki
ngah aa, SDA conferece aki ngah lo suak hi.

SDA pawlpi athei lo, SDA pawlpi mi ahi lo Pasian um aa Pasian deih
na banga a nungta gupna ngah mi om ding hi ci aa Mrs.White gen na paulam in
aki hehnem zong om hi. Hih pen SDA pawlpi om lam thei kha man lo, ki zopna
nei kha lo mi citak te gen na hi bek hi. SDA pawlpi thei khin aa, pawlpi sungah
om khin in, lungkim loh na tuam tuam hang tawh a ki khenkhia te gen na hi lo hi.
Tua kam mal tawh ki hehnep theih hi lo hi.

Ih Kawlgam aa Mission leh MUC te sungah upna leh zuihna aki

bangtak pi ahih mawk leh Reformation hun lai aa pawlpi buaina te, pawlpi kitap
nate, ki bawlsiat nate tawh kiteh kak thei lo hi. A mau pen upna (Doctrine) kibat
loh man a buai aa kitam uh ahi hi. Pawlpi tuam tek in hong dingtek pah uh hi. A
hi zongin ih Kawlgam a SDA sung buai na ah, upna kibang hi hang ih kam in ih
cih cih hangin upna (doctrine) bulpi pawl khat ki nial (kizui lo) ahih manin
reformation hun lai mah bangin pawlpi ki tam hi ta hi. SDA Mission te in amau
Policy, Church Manual leh Working policy te bek zang hen la, MUC in zong
amau policy te, Church Manual te leh working policy te zang tuak le uh ki tot tot
om nawn lo ding hi. Pawlpi kibanglo nih in policy khat kizang khawm thei lo hi.
M te in amau van te zang hen la, C te in zong amau van te bek zangin ki zat sak
kei le uh, kumpi zum ah gospel pai kul nawn lo ding hi.

Leitung mihing aki cing khat beek ki omlo hi. (No man is perfect). Khialhna
nei vive ih hi hi. Ei te khat leh khat ih mawh ih khialhna te ki pulaak in, kithum aa ih ki
maisak ding pen Pasian deihna leh Khasiangtho deihna ahi hi. Tua lampi ih zuih theih
leh mi hampha ki hi ding hi. Khial tang nuam lo, ki niamkhiat nuamlo, ih khialhna te
thuum nuam lo in khat leh khat khialhna te ki maisak nuam lo (or) zawh kei leh Pasian
leh Khasiangtho a nial ih hi ding hi. Muhdah et sat na te leh mi ko siam (hat) na te in
Vangam hong tun lo ding hi. Ki niam khiat in Topa tung ki ap aa, Topa kei mawhnei pa
hing ka mawhna te hong maisak in ci a ih thum ding ki sam hi. Topa in itna tawh hong
ngak gige hi.
Minam itna tawh Leitung politic sem hi lehang ih makai te maan in
maan ta kei leh ih gup ih pom sa khat ih gup ih pom teta tek ding mah ahi hi.
Makai or Mihing tunga kinga ahi hi. A hi zongin Biakna thu leh Khaa thu ah tua
bang hi lo hi. Pasian tungah ih ki ngak ding kisam hi. Pasian deihna tawh ki tuak
maw ki tuak lo, Pawlpi upna tawh kituak maw kituak lo, Pawlpi thu khun tawh ki
tuak maw ki tuak lo cih te et akul hi. A ki tuah kei leh mittaw sialkhau let aa gup
gup zuih zuih ding hi lo hi.

M ih hi aa C ih hi zongin a tunga ih gen khialhna te ei leh ei ih kimuh

theih ding ki sam hi. Ih heh ih thangpaih nate leh ih khasiat na te, ih ki muhdah
na te nusia in, ki niamkhiat in khat leh khat ki thuum in ki maisak tek ding ahi hi.
Khaa lam ah khangcing (mature) takpi ihih leh ih ki maisak zawh loh nading
khialhna om lo hi. Milim biate sabuai mai ah kitun lo in, SDA te sabuai kiim ah
tukhawm in kikup khop ding ahi hi. Khut kilen in khukdin aa Topa tung thunget
khopna tawh ki maisak aa sian sak ding ahi hi. Ki mai sak zawh loh ding khialhna
khat zong om lo hi. Pasian tung ki ap takpi aa, ama Khasiangtho ih ki makaih sak
nak leh kilem kik zawh loh nading leh kipawl kik zawh loh nading thu om lo hi.
Mission a hi a MUC ahi zongin, hehna thangpaihna, muhdah etsat na, hazat nate
leh minam vai paulap nate nung ngat in, itna Pasian ki niamkhiat na Pasian,
kilemna Pasian ki makaih sak zawk ding kisam ka sa hi.

M ahi a C ahi zongin Thumaan Lam hilh Khasiangtho a neih kei leh a tel
siam a sangsiam kei dingaa, a neih takpi leh telsiam in a sangsiam ding hi. Hih a tungaa
khialhna kong pulaak te sangsiam tek in, kiniam khiat na tawh ki maisak zo tek leh
buai na tuamtuam khempeuh siang dingaa, a kipawl kik thei ding hi. Ki niamkhiat lo
in ih sansiam kei leh pawltuam tuak hi suak ding hi. Van leh Lei ah aki khen suak ding
lobuang lampi dang om lo hi. Sabbath tang, beh te cih dingbek lo buang cih nading
dang om lo hi. Kiniam khiat in Vangam teel thei leng hoih zaw ding hi. Nang teel
Nang khensat ding ahi hi. Biakna vai ah minam sangin khaa it huai zaw hi. Pasian
Khasiangtho in telsiam na, saansiam na leh kikhel na hong pia ciat ta hen.

Itna leh deihsak na tawh

Khazih sungah lai at

Pa Thang Khan Dal (Dal Tawng) USA

“Biakna thu leh Khaa thu te ah Khaa it dinghi aa, Leitung politics te
ah minam it ding hi.” by Daltawng