Motto :

1. Isua Krista rinna leh amah anna kawnga thlalaite hruai. 2. Kohhran kut ke ni tura thalaite buatsaih. 3. Kohhran hnathawh tihpuitlin. 4. Krista Chanchin Tha puan darh.

Thupui Innghahna :
Thil tha ti atan Krista Isuaah chuan siama awmin, ama kutchhuak kan ni si a, chu thil tha tih chu kan awmna turin Pathianin a buatsaih lawk a ni. Ephesi 2:10

Volume X V I.No 5 An official organ of Kristian Thalai Pawl: Seling Branch 19 t h February, 2013

PRESBYTERIAN KOHHRAN KALHMANG

Hla sak: Hla lak nawn chungchang a ni ber. Eng hla pawh sain eng ang pawhin tui ila, Kohhranhoin mihring dan theih piah lama Thlarau Thianghlim pawlna kan dawn tum a nih lem loh chuan inkhawm tan hun su buai lo thei tura insiamrem thiam a tha fo. Tan hnua hla kan sak hian thuhriltu hun ngah zawngte, inkhawm rei zawngte a nghawng tih hriat reng a tha. Tanna hla kan sakin, zai boruak a that deuh leh lam an that deuh avanga hla lak nawn hian thuhriltu a nek chep thei. Tin, ban dawna hla sakah pawh kan inkhawm rei zawng ngaihtuah tel a tha. Hla kan sak reng reng hian tui tak an awm a, tui vak lo an awm a, tui lo tak an awm zel bawk. Chungho chu Kohhran mi, ang khat vek kan ni. Tui tak, lam tuala bial map map tlem azawng avanga tui vak lo te tana ninawm khawpa hla lak nawn te, tui lo tak te tana inkhawm leh zel peihawm loh phah khawpa hla lak nawn te chin loh a tha a; chutihrualin, tui vak lo leh tui lo tak te venthawn luat vanga tui tak te tuina tih reh sak khawpa in thunun (control) erawh a dik bik lovang. Hla hi vawi khat sak chhuah tur a ni a, Kohhranho kan hlim tlan laite, kan zai tui tlan riau tumte, lamtual lama Thlarau Thianghlim hnathawh duhawm taka a lo thlena kan zai tawp hleih theih loh changte hian lak nawn a ngaih chang a awm thin mai zawk a ni. Heng kil hrang hrang bakah mihring hriselna inchen loh thute thlenga ngaihtuah chungin, heti lama mawhphurtuten rilru tawngtaina nena Pathian rawn chunga Kohhranho zai an hruai thiam a pawimawh hle. Nilai thupui chungchang: Nilai/Beihrual zan inkhawmah thupui hawngtu neiin thupui awmsa kan zir thin. Thupui hawngtuin tawngkam hnih khat/tlem azawng a sawi belh hi a tulna chen a awm thei a, thui tak sawi belh loh erawh a tha. Mi tinin kan ngaihdan kan sawi theihna, sawihona hun thawl tha a awm a tul. Tin, thupui hawngtuten Chairman hnena sawiho tur hlan hi a tul lo - thil chuangtlai a ni. Chairman-in sawiho tur zawng zawng nena thupui hawngtu a hlan tel vek a nih chuan thu hran a ni a; mahse, chutiang chu a awm ngaih meuh lova, kan kalhmang a ni lem lo bawk. Nilai thupui sawi remchan takah chuan, nilai zan inkhawm hi Kohhran inkhawm tia sawi a ni deuh kher thin a, Dan zawhkim inkhawm hun tite pawhin an lo sawi thin a ni awm e. Hemi hunah hian Kohhran tihtur pawimawh (Lawm luh, lak luh, thunun etc) tih thin a ni a, tul bik thilah lo chuan heng hi hun dangah tih a ni ngai meuh lo. Chuvangin, nilai zan inkhawm hi Dan zawhkimte chuan kan ngai pawimawh em em tur a ni. Thilpek lakkhawm: Thilpek la khawmtuten kut zangthal zawngin thawhlawm khawnna ken tur a ni a, kut zungtang pahnih/pathum leka awlsam taka lek mai loh tur a ni. A theih chin chinah kut khing hniha ken hram a tha. Thilpek lak khawm chhungin hla sak a nih chuan, a la khawmtute lo zai ve zel a mawi. A theih hram chuan tlar hma atang zelin lak khawm nise a tha. Kan Kohhran hian thilpek rawngbawlna hi a ngai pawimawh em em a; Secretary thupuan chhungte, hla sak chhungten thilpek kan la khawm ngai meuh lova; thilpek lak khawm chhungin hla kan sa emaw, thupuan kan ngaithla thin zawk a ni. Thilpek lak khawm chhungin tih tur remchang dang kan ti thin tihna a ni ber awm e. Pathian Ram/Sawma pakhat: Ringtu tihtur pawimawh tak chu sawma pakhat pek hi a ni. Hemi atan hian Mizoram Presbyterian Kohhran chuan chhung tinte tan Pathian Ram ip a siam a, he ip-ah hian kan thawhchhuah/malsawmna kan dawn atanga sawma pakhat thun thin tur a ni. Ram, ran etc kan tih ralin, mi thenkhatin a man atanga sawma pakhat chu ip-a khung mai lovin, a hranpa-in an pe leh zeuh thin (hmun hrang hrangah). Kan rilrua a thawh dan a nih tlat chuan, A dik lo ve, in tihsak ngawt theih a nih loh rualin, Pathian Ram ip-a sawma pakhat thun mai hi Presbyterian Kohhran tihdan chu a ni.
Tin, Pathian Ram ip-ah hian thuang 3 - Pathian Ram, Ramthar leh Tualchhung tihte a awm hrang leh a, a zat then chungchangah chuan 3:2:1 hi Kohhranho inzirtirna a ni deuh ber. Entirnan: Rs. 1,000 thawh dawn ta ila - Pathian Ramah Rs. 500, Ramtharah Rs. 333, Tualchhungah Rs. 167 velin sem rual tur tihna a ni. A pawisa laklawh dan a zirin a dik thlap hian a tul kher lovang a, a tlangpuiin hetiang bawr vel hi nise tihna a ni mai awm e. Tualchhung Kohhranah induh thawh zual lai (Biak In sak lai etc) a awm ve theia, heng hun bikah erawh chuan Kohhran Committee-in emaw ni dang aia Tualchhung lama thahnemngai deuh turin Kohhranho a ngen thin a ni.

(Chhuak lehah chhunzawm a ni ang.. - Editor)

Printed at Loisbet offset printer Chanmary, Aizawl Copies- 200

Editor: Joint Editors: News Editor: Cir.Manager:

PC.Lalhmunsiama Robert Lalthanliana H.Lalrinmawia K.Lalthanmawia R.Lalramdinsanga

Ph: 8974638231 Ph: 9862344041 Ph: 8014680333 Ph: 9862382680 Ph: 9862622836

KOHHRAN HUN RUAT NA Dt. 16.2.2013 Inrinni Zan Pastor Bial fan programme Dt.17.2.2013 Pathianni SS. Tantu: Pi Thangpuii Pastor Bial fan programme Chawhma inkhawm ah hian Kohhran Upa thlan tur a ni. KOHHRAN HMEICHHIA Pathianni Chawhma ban Tawngtai inkhawm Group Committee Dt. 19.2.2013 Thawhlehni zan Inkhawm Chairman: Pi PC.Lalrimawii Tantu: Pi Ramthianghlimi Thilpek lakhawmtute: 1) Pi Lalchawikimi 2) Pi Zokhumi Thusawitu: Pi Lalnunziri K.T.P
February thla Thawhan zan Inkhawmna hruaitu Pu RD.Laltawnkima Leader Dt. 17.2.2013 Pathianni tlai Fellowship 3:00PM A hmun: Sunday School Hall Hruaitu: Tv. Robert Lalchhuanmawia Br comt. Tantu: Nl. C.Lalremruati Thilpek latu: Nl. Lalnunpari Items: Tawngtai rual Character Study- Tv. Robert Lalthanliana Br.comt Dt.18.2.2013 Thawhtan zan A hmun: Biak In Tantu: Pu R.Lalrinchhana Br Comt. Thilpek latu: Nl. Lalthansangi Sermon: Pu Lalbeiseia Br.Treasurer.

Editorial: Thlahdah taka rawngbawl hi thil theih nise a nuam ngawt ang. Mahse Bible chuan thlahdah taka rawngbawltu chu anchhe dawngin awm rawh se a ti miau si a. Hetih rual hian Ringtu hmalam pan lo chu hnungtawlh a ni a ti bawk. Kan kal mekna kawngah hian hahchawlhna hmun leh in thlahdahna hun a awmlo tih I hre reng ang u. Min kohna hi tinghet leh zual turin taimak chhuah sauh sauh ila, tichuan a nin chawl silo in hahdamna min pe ang a, hmalam pan zel thei turin kan tha min tih chak sak zel dawn a ni. UPA THLAN Tun Pathianni chawhma inkhawmah hian Kohhran Upa 4 thlan tur a ni dawn a, Naupang Sunday School lam pawh hming lamna te neih a nih hnuah Biak In pui lamah inthlang tura luh chhoh tur a ni. In thlanna buaipui tur hian Bialtu Pastor bakah Upa Vanlalthlana Thingsulthliah leh Upa K.Lalchawliana Tlangnuam te an lokal ang. Upa thlan chungchanga hriattur pawimawh te:1. Kohhran Dan zawhkim zawng zawng zatve tal an inkhawm loh chuan in thlanna neih theih a ni lovang. (Tuna Dan zawhkim zat hi mi 1076 kan ni a, mi 538 aia tlemlo kan inkhawm ngei ngei a ngai tihna a ni.) 2. Thlangtu zawng zawng hmun 3 a thena hmun 2 talin an thlan loh chuan tumah tlingah puan loh tur a ni. 3. Kum 5 chhung tal dan chhunga awmlo leh Dan zawhkim hnua uirena suala tlu te chu Upa atan tumah thlan loh tur a ni.
A chunga kan tarlan tak te hre rengin Kohhranho te inbuatsaih ila, Upa hmu ngei thei turin kan ngaihtuahna te I hmang theuh ang u. Kan Kohhran hian Upa hi vawi engemaw zat kan lo thlang hmu zo tawhlo thin. Thlan awm mi kan hriat loh chuan hetiang lama hre awm a kan ngaihte rawn thin te hi a fin thlak khawp ang. Tin, kan uluk lutukna lamah pawh hian kan hmuh loh phah fo thin. Tumah fel famkim sa a awm theih loh, Pathian in ama rawngbawltu chu a thuam thin tih hria in ngaihtuahna fim tak I hmang theuh ang u.

Thu Tawi Kumin hi Presbytery Thalai meet neih kum a ni a, meet neihna hmun tur leh a hun tur hi Meet committee in ala rel dawn a ni. Kar hmasa Thu leh Fri khan Upa Dara group ten Budged tuak nan Sangha an zuar a, Kg 35 vel bawr an hralh.
Thawhtan zan inkhawm zat -38 (Inkhawm kan chhe leh ta hle mai, member ten tan ila thar leh teh ang u. 10.65% inkhawm ang kan nied)

HLA ZIR Kar leh thawhleh zan ah Kohhran zaipawlten hla zir leh tawh tur a ni. Bial Inkhawmpuia rem tur hla thar zir tur a ni e. - Conductors

Pic: Kohhran Hmeichhe Inkhawmpui USHERS

Published by Kristian Thalai Pawl : Seling Branch, 2013