Sinte-Pietersabdy (Oednburg)
De Sinte-Pietersabdy in Oednburg was 'n abdy van benediktynn die bestoan êt van 1084 toe an 1797. In de Fransche tyd wierd d' abdy ip 16 februoari 1797 ofgeschaft en al d' eigndommn wierdn verkocht. De gebown wierdn vo 't grotste stik ofgebrookn.
Geschiednisse
[bewerkn | brontekst bewerken]D' abdy wierd ipgericht deur den illign Arnoldus, biskop van 't bisdom Soissons, die ip vredesmisje was in Vloandern. Gervinus van Oednburg was abt van 1095 toe 1105, woanoa datn kluuznoare wierd. De Benediktynn zorgdn vor undr eign inkommn en oendroed en z' addn 'n eigen ofstee.
D' abdy wierd binst de Fransche oovrêerschienge ip 't ende van den 18ste êewe ofgeschaft. Achtrnoa wierden de mêeste gebown mê de groend glykgemakt. Allêene mo 't abtsgebow en de abdy-oeve blêevn bestoan. De latste monnik was Veremundus (doopnoame) of Norbertus Daghelet (1770-1852) die, achtre veele roenddôolienge en bedieniengn, in 1821 pastre van Oednburg wierd en dadde blêef toe an zyn dôod.
't Domein wierd verkocht en kwam in privé-andn. Drie geslachtn landbowrs êndr ier geboerd. In 1989 zyn de gebown nog e kêe verkocht en is d' abdy-oeve hêelegans gerestoreerd. Nu ist 'n otêl, restorang en wellnesscenter met de toepasslikke noame ‘De Abdijhoeve’.
In 1934 krêeg d' abdy van Stêenbrugge 't ipvolgiengsrecht van de Sinte-Pietersabdy en ze mocht ook die noame voddr droagn.
Teegnwôordige situoasje
[bewerkn | brontekst bewerken]'t Abtsgebow an de Martstroate 28 is van 't joar 1756. 't Wierd gebowd in ipdracht van abt Maurus Eloy. Ierin is nu 't Romeins Archeologisch Museum te vienn, dat ook e poar oovrbluufsls van d' abdy bezit, lik e bas-reliëf dat Arnoldus en Sinte-Jakob vôornstelt. Dat is verzeekrs gemakt in ipdracht van abt Jaak Jacobs, die dôodgienk in 1500.
D' abdy-oeve an de Martstroate 1 êt e toegankspôorte die 't joartol 1671 droagt. De boerdery wierd gebowd in ipdracht van abt Karel Geleyns.
De middelêewsche vierkante duuvetorre die ook by d' abdy-oeve ôorde, stoatr nog oltyd en bewyst de macht van d' abdy. Binst de Twidde Weirldôorlooge ên de Duutsche van die tôorn 'n uutkykpost gemakt mê schietgoatn, wa vandoage nog oltyd te ziene is.
In 2008 wierd de klôostre-tuun ipniew ingericht.
De browery ist nie mêe. Da was e hêel belangryk dêel van d' abdy, den Illige Arnoldus is de patrôonillige van de browers. E dêel van de grôote scheure gienk in de 19e êewe in de vlammn ip.
E bitje voddr kykn
[bewerkn | brontekst bewerken]- (nl) Hoste Anselm 1984 : De geschiedenis van de Sint-Pietersabdij te Oudenburg, Oudenburg.
- (fr) Van de Putte F. 1843 : Chronique du monastère d'Oudenbourg de l'Ordre de S. Benoit. Publiée pour la première fois d'après un manuscrit du XV-e siècle, Gand, C. Annoot-Braeckman, xii-134 p.