Zvenigovo

Zvenigovo
Звенигово (ven.)
Провой (mägimar. i nitmar.)
	Lidnanznam;
Valdkund	Venäma
Eläjiden lugu (2023)	10,822 ristitud
Pind	5 km²
Pämez'	Vladimir Davidov; (eloku 2015—,; Владимир Давыдов)
Telefonkod	+7−83 645-xx-xxx
Avtokod	12
Aigvö	UTC+3 (MSK+0)

Zvenigovo (ven.: Звени́гово, mägimar. i nitmar.: Провой) om Venäman lidn da lidnankund Marii Elan Tazovaldkundan suves. Se om Zvenigovon rajonan administrativine keskuz.

Istorii

Eländpunktan aluz om pandud Kostroman gubernijan edheotajil vl 1860 kuti laivansauvomižen tegim da sen Čekuri-külä i Zvenižskii-žilo. Zvenigovo-žilo sai lidnan statusad vl 1974.

Zvenigovon ižandusen järedad edheotandad oma laivansauvomižen da kohendusen tegim (om bankrotnendan pordhal vn 2024 sulakuspäi), sauvondgipsan tegim, meckombinat i maidkombinat.

Geografijan andmused

Lidn sijadase rajonan suves, Volg-jogen hural randal (Kuibiševan vezivaradim), 60 m ü.m.t. keskmäižel korktusel.

Matkad Joškar-Olhasai om 74 km pohjoižhe orhal vai 91 km «Vätk»-avtotedme. Lähembaine lidn om Volžsk 25 km suvipäivnouzmha orhal vai jogedme i 37 km avtotedme.

Tobmuz

Pen' Čuvaš-Otari-külä (ven.: Чуваш-Отары, 358 rist. vl 2016) mülüb lidnankundha Zvenigovon ližaks. Lidnankundan pind om 45,24 km².

Lidnankundan tobmuden pämez' om sen Deputatoiden suiman ezimez'. Lidnan Administracijan pämez' om Aleksei Kulalaev vn 2020 kül'mkuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 11 946 ristitud, lidnankundan — 12 319 ristitud, rajonan kaks' seičemendest, vn 2021 lidnan — 10 994 ristitud, vn 2021 kaiken lidnankundan — 11 283 ristitud. Vl 2017 kaik 11 734 eläjad oli lidnankundas. Kaikiš suremb lidnan ristitišt oli enamba 14 tuh. eläjid vozil 1989−2001 (14 800 rist. vl 1992).

Ortodoksižen hristanuskondan kaks' pühäpertid^[1] oma kaičenus i saudud lidnas: ph. Mikulai-čudonsädajan jumalanpert' (vspäi 1877), časoun' kaumžomal.

Lapsiden opendusen aluzkundad oma severz'-se päivkodid, Zvenigovon licei (ende keskškol nomer 2), kaks' keskškolad (nomer 1 i 3), sanatorine škol-internat, lapsiden sädamižen keskuz, čomamahtoiden škol. Lähembaine professionaližen opendusen aluzkund radab Krasnii Jar-žilos kuz' kilometrad pohjoižhe lidnaspäi, se om Marii Elan Tazovaldkundan transportiž-energetine tehnikum^[2].

Homaičendad

Irdkosketused

	Marii Elan Tazovaldkundan lidnad
	Joškar-Ol \| Koz'modem'jansk \| Zvenigovo \| Volžsk

[1] Zvenigovon pühäpertid sobory.ru-saital. (ven.)

[2] Marii Elan Tazovaldkundan transportiž-energetine tehnikum edu.mari.ru-saital. (ven.)

[1]

[2]