Dmitrovsk

Dmitrovsk (ven.: Дмитро́вск) om Venäman lidn da lidnankund Orelan agjan suvipäivlaskmas. Se om Dmitrovskan rajonan administrativine keskuz da pala.

Dmitrovsk
Дмитровск

Lidnanznam
Valdkund	Venäma
Eläjiden lugu (2022)	4,880 ristitud
Pind	43,57 km²
Pämez'	Jurii Dujev (sügüz'ku 2016—)
Telefonkod	+7−48 649-xx-xxx
Avtokod	57
Aigvö	UTC+3 (MSK+0)

Ph. Dmitrii Solunalaižen jumalanpert', vn 2020 nägu

Istorii

Eländpunktan aluz om pandud vl 1711 kuti Dmitrovk-žilo usadibanke (ven.: село Дмитровка vai Дмитриевка) sirdanudel Moldovan ruhtinazkundan Dmitrii Kantemir-gospodaril (1676−1723). Nened rahvahad eliba žilos: moldovalaižed, romanijalaižed, ukrainalaižed i baškiralaižed. Žilo kändihe valdkundaližeks vl 1780 i sai makundan lidnan statusad vl 1782 nügüdläiženke nimitisenke, no nimitihe Mitrijevk:aks paginkeles 20. voz'sadahasai. Usadiban territorii om kaičenus tähäsai lidnan suves. Lidn šingotihe käziradoil i torguindal, revolücijan jäl'ghe — tegimil-ki. Vll 1928−2005 lidnan nimituz oli Dmitrovsk-Orlovskii, muga erasil-se kartoil tähäsai, erištamha Kurskan agjan Dmitrijev-lidnaspäi. Toižen mail'man sodan aigan lidn oli okkupiruidud nacistoil (2. reduku 1941 — 12. eloku 1943), muretihe sidä lujas.

Dmitrovsk šingotase sömtegimištol (sagudmaidtegim, leibtegim, lihakombinat) i linkapken edheotandal.

Geografijan andmused

Lidn sijadase rajonan päivlaskmas, Neruss-jogen üläjoksmusen hural randal (ven.: Неру́сса 161 km pitte, Desnan hura ližajogi), 212 m ü.m.t. keskmäižel korktusel. Obščeric-jogi (ven. Общерица 19 km pitte) ümbärdab lidnad suvipäivlaskmaspäi da lankteb Nerussha, uit om saudud lidnan suviröunal. Matkad Bränskan agjhasai om 8 km päivlaskmha orhal. Matkad Orelhasai om 80 km pohjoižpäivnouzmha orhal vai 92 km avtotel. Lähembaine lidn om Železnogorsk (Kurskan agj, raudtestancijanke) 24 km suvipäivnouzmha orhal vai 29 km avtotedme.

Klimat om ven kontinentaline. Voden keskmäine lämuz om +5,5 C°, kezakun-elokun +17..+19 C°, vilukun-uhokun — −8..−9 C°. Paneb sadegid 608 mm vodes, enamba kezakus-heinkus (72..81 mm kus), vähemba vilukus-keväz'kus (30..38 mm kus).

Dmitrovsk om lidnankundan üks'jäine eländpunkt. Lidnankundan pind — 56,38 km².

Eläjad

Vl 1897 lidnan ristitišt oli 5 291 eläjad, vl 1939 — 5 421 eläjad. Vn 2010 Venäman rahvahanlugemižen mödhe lidnan eläjiden lugu oli 5 648 ristitud, rajonan pol'. Kaikiš suremb lidnan ristitišt oli 10 400 eläjad vl 1913 i 7 000 eläjid vl 1996. Vl 2017 lidnan ristitišt oli 5 181 eläjad.

Rahvahad (2010): venälaižed — 98,0%, toižed rahvahad — 2,0%.

Ortodoksižen hristanuskondan koume pühäpertid oma avaitud lidnas: ph. Dmitrii Solunalaižen jumalanpert' (om saudud vll 1721−1725), puine ph. Johann-edelkävujan Sündundan jumalanpert' (letihe vodele 2014) i ph. Stroican časoun' (2004). 19. voz'sadan lopus kaik seičeme jumalanpertid i koume časounäd oli avaitud lidnas.

Orelan agrotehnologijoiden da transportan tehnikum — Dmitrovskan filial om lidnan professionaližen opendusen aluzkundaks.

Lidnankundan pämez' om Rahvahan deputatoiden Nevondkundan ezimez'. Lidnan Administracii om likvidiruidud vn 2017 keväz'kus, rajonan administracii tegeb sen velgusid.

Irdkosketused

• Lidnankundan lehtpoled rajonan tobmuden aluzkundoiden dmitrovsk-orel.ru-saital. (ven.)